Samuɛli 2, 8 - Bibeli do fee

Davidi í jɛ inɛi ilɛ ŋa iyi à wa kɔkɔɛ igũ

¹ Si anyiɛ, ŋɔi Davidi í jɛ inɛi Filisi ŋa igũ í dasi ŋa anyɔ. Nɔ í gba ilu nla nŋau í jɛ lafɛ̃ɛɛ.

² Si anyiɛ nɔ í koo í jɛ inɛi Moabu ŋa mɔ igũ. Inɛ ŋa iyi í mu ŋau í jɔ̀ à sũ ilɛ fii fii tuuba mɛɛta. Nɔ í kpa fii minji, nɔ í jɔ̀ fii akã. Si anyiɛ, inɛi Moabu ŋau à jɛ arui Davidi nɔ í jilɛ nŋa mii iyi aa ya maa sã adɔ̃ fei.

³ Ajɔ nŋu gɔ, Davidi í dasi kpãa wa bɔ igũ ku ba ku gba ilɛ iyi í wa kɔkɔi idoi Efaratau má. Ŋɔi Davidi í jɛ Hadadezɛɛ amai Rehobu ilaalui Soba igũ.

⁴ Nɔ í gba siɛ masa dubu akã do cĩɔ mɛɛje (1.700) do sooge woo nɛ do isɛ ŋa aŋa dubu kɔnfia (20.000). Nɔ í bu atĩi kɔbisii acĩ ŋau fei, í gbe acĩ cĩɔ (100) iyi í jɔ̀a araɛ na sarɛtii igũ ku fa.

⁵ Ŋɔi inɛi Siri ŋa à naa Hadadezɛɛ ku sobi hai ilui Damasi wa. Nɔ Davidi í kpa inɛi Siri dubu kɔnfia do minji (22.000),

⁶ nɔ í jilɛ soogeɛ ŋa Siri bɛ. Do yaase bɛɛbɛi inɛi Siri ŋa à baa à jɛ aruɛ ŋa nɔ í jilɛ nŋa mii iyi aa maa sã adɔ̃ fei. Aɔ̃ Lafɛ̃ɛ í ya jɔ̀ Davidi ku jɛ igũi bii í bɔ fei.

⁷ Nɔ Davidi í gba tɛlii wura ŋa iyi woo degbei Hadadezɛɛ ŋa à waa mu í nɛò Zeruzalɛmu.

⁸ Ŋɔi í gba isɔ nkpa nkpɔ nkpɔ má hai ilui Beta do hai ilui Berotai ilui Hadadezɛɛ ŋau.

⁹ Ŋɔi Toi ilaalui Amati í gbɔ iyi Davidi í koo í jɛ soogei Hadadezɛɛ ŋau fei igũ,

¹⁰ nɔ í bɛ Yoramu amaɛ wa ku na ku coo fɔɔ nɔ ku saabuɛ si bɛi í bɔ igũ bi Hadadezɛɛ nɔ í kãmiaɛ. Toiu í tako wa ce igũi wo do Hadadezɛɛ. Nɔ Yoramu í kooa Davidi jĩnɛ ŋa iyi à ce do isɔ fũfũ do wura do isɔ nkpa.

¹¹ Nɔ Davidi í koo í jilɛa Aɔ̃ Lafɛ̃ɛ jĩnɛ ŋau, bɛi í tako í jilɛa isɔ fũfũ do wura iyi í ba wa hai ilɛ bii í jɛ igũ ŋau fei.

¹² Mii iyi í gba hai bi inɛi Edɔmu ŋa do inɛi Moabu ŋa do inɛi Amɔɔ ŋa do inɛi Filisi ŋa do inɛi Amalɛki ŋa í jilɛa fei ndɛɛi hee do amani iyi í gba si Hadadezɛɛ amai Rehobu ilaalui Soba.

¹³ Nɔ Davidi í nya iri má waati iyi í baa hai Lɔɔma ku da Imuu tengi bii í kpa soogei Edɔmu dubu mɛɛwa do mɛɛjɔ (18.000).

¹⁴ Ŋɔi í jilɛ soogeɛ ŋa si ilɛi Edɔmu fei, nɔ inɛi Edɔmu ŋau fei à baa à jɛ aruɛ ŋa. Aɔ̃ Lafɛ̃ɛ í ya jɔ̀ Davidi ku jɛ igũi tengi bii í bɔ fei.

Akawei Davidi ŋa

¹⁵ Davidi í jɛ bomma si ilɛi Izirɛli fei, nɔ wa mu ilɛu dee dee, wa cea inɛ fei kiiti si ntɔ.

¹⁶ Zoabu amai Seruyai í jɛ inɛ ngboi sooge ŋa. Zozafati amai Ahiludui í jɛ woo singa tia ŋau.

¹⁷ Sadɔku amai Ahitubu do Ahimelɛki amai Abiataa ŋai à jɛ woo wee ŋa. Serayai í jɛ woo kɔ tia.

¹⁸ Benaya amai Yehoyadai í jɛ inɛ ngboi inɛi Kerɛti do inɛi Pelɛti ŋa iyi à jɛ woo degbe Davidi. Nɔ amai Davidi ŋa à jɛ inɛ ngboi ilɛu.