Samuɛli 2, 7 - Bibeli do fee

Kuwã iyi Ilaaɔ̃ í cea Davidi do tɔkuɛ ŋa

¹ Aɔ̃ Lafɛ̃ɛ í faaba Davidi ilaaluu hai si awɔi mbɛɛ ŋa iyi à waa kaakoɛ nɔ í muaa kusĩmi. Ŋɔi Davidi í koo í buba kpasɛ̃ɛ.

² Ajɔ nŋu gɔ í sɔ̃ walii Natãa í ni, cɔ de. Ile iyi à ce do jĩi ndii sɛɛdii ǹ wa n sũ si, nɔ kpakoi Ilaaɔ̃ wa jilɛ si inɔ ilei acɔ.

³ Ŋɔi Natãa í jɛaa í ni, koo i ce iyi í wa si idɔɛ fei, domi Aɔ̃ Lafɛ̃ɛ í wɛɛ do awɔ.

⁴ Amma idũu Aɔ̃ Lafɛ̃ɛ í sɔ̃ Natãa í ni,

⁵ koo sɔ̃ woo ce icɛm Davidi i ni amu Aɔ̃ Lafɛ̃ɛ ǹ ni, awɔi aa maam ile n coo bi kuwa?

⁶ N kù sũ si ile hai ajɔ iyi ǹ nya inɛi Izirɛli ŋa wa hai ilɛi Ezibiti hee ku baa nnyi. Ǹ ya n wai si ilei acɔ tengi bii à waa bɔ fei.

⁷ Si isɛɛnɛ iyi awaò inɛi Izirɛli ŋau à ce fei, n kù sɔ̃ inɛ ngbo nŋa gɔ baa akã si aŋa iyi ǹ ni a maa gbã zamaam inɛi Izirɛli ŋau n kù ni, na mii í ce i kù maam ile do jĩi ndii sɛɛdi ŋa.

⁸ Nsɛi koo i sɔ̃ Davidi woo ce icɛm i ni, Aɔ̃ Lafɛ̃ɛi lele do ilɛ í ni, ǹ soɛ wai hai bi ku degbe angudã ŋa ku ba i na i jɛ woo gbãi zamaam inɛi Izirɛli ŋa.

⁹ Ǹ wɛɛ do awɔ tengi bii ì bɔ fei. Ǹ kpa mbɛɛɛ ŋau fei, nɔ an jɔ̀ i nya iri bɛi inɛ nla nlai andunya ŋa.

¹⁰ An mua zamaam nɔu bi kuwa, nɔ n lɔɔ n jɔ̀ ku ce icã ku mi ilɛ ku ba ku maà yaya má, nɔ inɛ laalɔ ŋa a maà wahalaɛ bɛi à tako à ce wo

¹¹ hai waati iyi ǹ jilɛ inɛ ngbo ŋa iyi aa maa gbã Izirɛli inɛm ŋau. An muuɛ kusĩmi n faabaɛ hai si awɔi mbɛɛɛ ŋa fei. Nɔ amu Aɔ̃ Lafɛ̃ɛ ǹ wa n sɔ̃ɛ iyi an jɔ̀ tɔkuɛ nkpɔ ku na ku jɛ bomma si anyiɛ.

¹² Bii ì na ì kú nɔ à siɛ bi balaɛ ŋa, an nya amaɛ akã ku jɛ bomma si agbɛɛ, nɔ n jɔ̀ bommaɛ ku nɛ gbugbã.

¹³ Nŋui á na ku ma ileu do irim, nɔ an jɔ̀ kitãi bommaɛ ku ba gbugbã hee do ajɔ fei.

¹⁴ Amui an jɛ baaɛ, nɔ nŋu mɔ á jɛ amam. Bii wa ce laalɔ an cãa n kpãa ijui bɛi baa í ya cã amaɛ.

¹⁵ Amma n kaa n leekĩ jiida ku jɛm si gãmɛɛ bɛi ǹ cea Saulu, nŋu iyi ǹ kɔ̀si nɔ ǹ jɔ̀ ì sãsi agbɛɛu.

¹⁶ Inɛi kpasɛ̃ɛ gɔi á ya jɛ bomma waati kãma fei. Nɔ bommaɛ á maa nɛ gbugbãi hee do ajɔ fei.

¹⁷ Ŋɔi Natãa í koo í sɔ̃ Davidi ide ŋa iyi í gbɔ si kuyɛu fei.

Kutɔɔi Davidi

¹⁸ Nɔ ilaalu Davidi í koo í tɔɔ Aɔ̃ Lafɛ̃ɛ í ni, Aɔ̃ Lafɛ̃ɛm, mii kpasɛ̃m í jɛ nɔ yooi ǹ jɛ iyi ì jɔ̀ ǹ to bii ǹ wau ihɛ̃.

¹⁹ Amma ì waa cɔɔ mii keeke bi tɛɛ, nɔ ì nyi ì jɔ̀ ǹ mà bɛi tɔkum ŋa aa na a jɛ ala má. Nɔ amu amanɛ, amui ì waa sɔ̃ ide ŋau ihɛ̃.

²⁰ Mii ǹ nɛ an sɔ̃ɛ má. Ì màm tã, amu woo ce icɛɛ.

²¹ Awɔi ì ce mii nla nla ŋau bɛ fei na ideɛ si bɛi idɔɛ í bi, nɔ ì nyisim.

²² Ì la, awɔ Aɔ̃ Lafɛ̃ɛ, nɔ inɛ kãma kù jɛ saaɛ, nɔ Aɔ̃ mmu kãma kù wɛɛ má bii kù jɛ awɔ, si bɛi à sisi nwa ideɛ à gbɔɔ do itĩ nwa.

²³ Dimi yoomai í wɛɛ má si andunya iyi í yɛ bɛi zamaaɛ inɛi Izirɛli ŋau. Iwɛ̃ yoomai í ya inɛ ŋa ku ba ku ce ŋa zamaaɛ nɔ ku nya iri na saabu nŋa. Iwɛ̃ yoomai í ce maamaake ŋa í leleò dimi mmu ŋa si waju nŋa. Awɔ akãi ì ce bɛɛbɛ ì nya waò hai ilɛi Ezibiti nɔ ì kãmia iwɛ̃ɛ ŋa.

²⁴ Awɔi ì jilɛ inɛi Izirɛli ŋa ku ba a jɛ zamaaɛ hee do ajɔ fei. Nɔ awɔi ì baa ì jɛ Lafɛ̃ɛ nŋa.

²⁵ Bɛbɛi Aɔ̃ Lafɛ̃ɛ, jɔ̀ ide iyi ì fɔa amu woo ce icɛɛ do kpasɛ̃m ku ce hee do ajɔ fei.

²⁶ Amboe ku jɛ tɛɛ hee do ajɔ fei nɔ amanɛ ŋa a ni, Aɔ̃ Lafɛ̃ɛi lele do ilɛi í jɛ Lafɛ̃ɛi inɛi Izirɛli ŋa. Nɔ i jɔ̀ kpasɛ̃i amu Davidi woo ce icɛɛ ku ba gbugbã bi tɛɛ.

²⁷ Do ntɔ, Aɔ̃ Lafɛ̃ɛi lele do ilɛ, awɔ iyi ì jɛ Lafɛ̃ɛi inɛi Izirɛli ŋa, awɔi ì sɔ̃m ì ni aa jɔ̀ tɔkum ŋa a jɛ bomma si anyim. Na nŋu, ǹ dasi wɔɔkɔ n wa n tɔɔɛ.

²⁸ Aɔ̃ Lafɛ̃ɛ, awɔ Ilaaɔ̃i, nɔ ideɛ fei ntɔi, awɔi ì sɔ̃m idei didɔ̃u ihɛ̃.

²⁹ Debɛi jɔ̀ i weea kpasɛ̃m ku ba ku maa wɛɛ hee do ajɔ fei na iriɛ. Awɔi ì fɔɔ, nɔ do saabui kuweeɛu kpasɛ̃i amu woo ce icɛɛ á ba kuwee hee do ajɔ fei.