Samuɛli 2, 6 - Bibeli do fee

Davidi í dasi idɔ nŋu ku baaò kpakoi akabuui Aɔ̃ Lafɛ̃ɛu wa Zeruzalɛmu

¹ Si anyii nŋu, ŋɔi Davidi í tɔtɔɔ soogei nlai ilɛi Izirɛli ŋau fei amanɛ dubu kuntaa (30.000).

² Nɔ Davidi do zamaa iyi í wa bi tɛɛu fei à dede à bɔ Baale si ilɛi Zudaa ku ba a so kpakoi Ilaaɔ̃u wa. Kpakoui à ya kpe kpakoi Aɔ̃ Lafɛ̃ɛi lele do ilɛ iyi wa buba si antaiɛ si afei amaleka ŋa iyi à ce iyi à ya kpe serubɛ̃ɛ ŋau bɛ.

³ Nɔ à koo à so kpakou wa do sarɛti titɔ̃ hai inɔ kpasɛ̃i Abinadabu iyi í wa si antaii geeteu. Nɔ Uza do Ahiyo, amai Abinadabu ŋau à waa mu imɔi kɛtɛ ŋau à waa nɛò.

⁴ Uza wa nɛ kɔkɔi kpakou nɔ Ahiyo mɔ wa cuaa.

⁵ Nɔ Davidi do inɛi Izirɛli ŋau fei [à waa too ŋa] à waa cã jɔlɔ do mɔɔlɔ do ama gãgã do kitigbo do londi ŋa. Nɔ à wasi iri ku kɔ̃ à waa cĩ Aɔ̃ Lafɛ̃ɛ do inɔ didɔ̃ nla nla.

⁶ Waati iyi à to si bantuma bi ku kpokpo bileei Nakɔ̃ɔ, ŋɔi kɛtɛ ŋau à koosɛ nɔ Uza í yɔ awɔ í mu kpakou.

⁷ Ŋɔi idɔi Aɔ̃ Lafɛ̃ɛ í dede si Uza nɔ í kpaa tengi bɛ gbakã kɔkɔi kpakoi Ilaaɔ̃u na kuraraɛ.

⁸ Ŋɔi idɔi Davidi í kɔ̃ si na iyi í jɔ̀ Aɔ̃ Lafɛ̃ɛ í kpa Uza do idɔɔkɔ̃. Nɔ í kpe inyau Perɛsi-Uza waatɔ idɔɔkɔ̃i Aɔ̃ Lafɛ̃ɛ í kpa Uza anu akã. Nɔ bɛɛbɛi à ya kpe inyau baa nnyi.

⁹ Ajɔ nŋu bɛ njo í mu Davidi si Aɔ̃ Lafɛ̃ɛ nɔ í ni, iwoi amu mɔ an jɛ a lɔò kpakoi akabuui Aɔ̃ Lafɛ̃ɛu ihɛ̃ wa si ilum má.

¹⁰ Ŋɔi Davidi í kɔ̀ a bɔò kpakou iluɛ nɔ í jɔ̀ à koo à jilɔɔ kpasɛ̃i Obɛdi-Edɔmu inɛi Gatiu.

¹¹ Nɔ kpakoi Aɔ̃ Lafɛ̃ɛu í ce cukpa mɛɛta kpasɛ̃i Obɛdi-Edɔmu bɛ nɔ Aɔ̃ Lafɛ̃ɛ í weea nŋu do kpasɛ̃ɛ fei.

Kpakoi akabuui Aɔ̃ Lafɛ̃ɛ í to wa Zeruzalɛmu

¹² Si anyiɛ, ŋɔi à naa à sɔ̃ Davidi iyi Aɔ̃ Lafɛ̃ɛ í weea kpasɛ̃i Obɛdi-Edɔmu do mii ŋa iyi í nɛ fei, na kpakoi Ilaaɔ̃u. Nɔ Davidi í dede í dasi kpãa, í jɔ̀ à koo à so kpakou wa hai kpasɛ̃i Obɛdi-Edɔmu à waa bɔò hee ilui Davidiu do inɔ didɔ̃.

¹³ Iyi woo so kpako ŋau à nɛ agbãasɛ mɛɛfa, ŋɔi Davidi í jɔ̀ à ce kuwee do kɛtɛ kombo akã do ama kɛtɛ ku dɔ̃ ala gɔ.

¹⁴ Davidi wa dasi ibɔi acɔ ku nɛ gbugbã iyi í jɔ efodui woo wee ŋa, nɔ wa jojo do gbugbãɛ fei si wajui Aɔ̃ Lafɛ̃ɛ.

¹⁵ Ŋɔi Davidi do inɛi Izirɛli ŋau fei à waa dɔ̃ anu do inɔ didɔ̃ nɔ à waa fã kuu ŋa, à soò kpakou à waa nɛòɛ.

¹⁶ Iyi à waa lɔò kpakoi Aɔ̃ Lafɛ̃ɛu si inɔ iluu, ŋɔi Mikali ama inaaboi Sauluu wa cɔ ilu hai do fɛrɛnti. Nɔ í yɛ ilaalu Davidi í fo wa dingaa wa jojo si wajui Aɔ̃ Lafɛ̃ɛ, ŋɔi í dondaɛ.

¹⁷ Iyi à toò kpakou wa ŋɔi à koo à jilɔɔ si ilei acɔ iyi Davidi í gũaa. Nɔ Davidi í ce kuwee iyi à ya jo si ina fei sãa sãa do kuweei anu akã ŋa.

¹⁸ Waati iyi Davidi í ce kuwee ŋau í tã, ŋɔi í weea zamaau do irii Aɔ̃ Lafɛ̃ɛi lele do ilɛ.

¹⁹ Si anyiɛ nɔ í kpɛ̃a inɛi Izirɛli ŋau fei sɔnda, hai inɛmɔkɔ do inaabo, inɛ fei í ba pɛ̃ɛ akã do iŋa ku banda koko akã do kaai isoi rezɛ̃ɛ akã. Iyi inɛ nŋu í tã nɔ inɛ fei í bɔ ideɛ.

²⁰ Ŋɔi Davidi wa nyi kpasɛ̃ɛ koo weea inɛɛ ŋa, nɔ Mikali amai Saulu í fita í kòo wa. Ŋɔi wa nya fũnɛɛ wa ni, irei ì gbɔ dimii amboe iyi ilaalui Izirɛli í nɛ nnyi. Awɔ ilaalu ì fita basĩ bɛi inɛ nfe gɔ si wajui inaabo à ce icɛi woo ce icɛɛ ŋa.

²¹ Ŋɔi Davidi í jɛa Mikali í ni, Aɔ̃ Lafɛ̃ɛi ǹ jojoa, nŋu iyi í jɔ̀ baaɛ do inɛi kpasɛ̃ɛ ŋa fei nɔ í cicam n jɛ woo gbãi inɛi Izirɛli zamaaɛ ŋa.

²² Ǹ wa n bi n sisi n ce bɛɛbɛ má, nɔ n kaye aram. Do nŋu fei an nɛ bɛɛrɛ si wajui inaabo woo ce icɛ ŋa iyi ì waa fãau bɛ.

²³ Nɔ wee Mikali amai Sauluu kù ba ama hee í koo í kuò.