Samuɛli 2, 5 - Bibeli do fee

Davidi í jɛ bomma si ilɛi Izirɛli fei

¹ Dimii inɛi Izirɛli ŋa fei à koo à ba Davidi Eborɔ̃ɔ bɛ nɔ à sɔ̃ɔ à ni, wee awa mɔ à jɛ dimiɛ ŋa do nyaanzeɛ ŋa.

² Tako wo, waati iyi Saulu wa jɛ ilaalu nwa, awɔi ì ya maa cua soogei inɛi Izirɛli ŋa bii à waa bɔ igũ do bii à waa baa. Nɔ Aɔ̃ Lafɛ̃ɛ í sɔ̃ɛ í ni awɔi aa maa gbã zamaai nŋu inɛi Izirɛli ŋa nɔ awɔi aa jɛ ilaalu nŋa.

³ Do yaase bɛɛbɛi inɛ ngboi ilɛi Izirɛli ŋau fei à bɔ Eborɔ̃ɔ bi ilaaluu, nɔ í dĩ akabuu aŋaò ŋa si wajui Aɔ̃ Lafɛ̃ɛ. Ŋɔi à tontooa ikpo si iri à cicaɛ ku jɛ ilaalui inɛi Izirɛli ŋa.

⁴ Davidi í nɛ adɔ̃ kuntaa waati iyi à biiɛ bommau Eborɔ̃ɔ nɔ í ce adɔ̃ ciiji si bommau.

⁵ Waati iyi í wa Eborɔ̃ɔ, í mu ilɛi Zudaa adɔ̃ mɛɛje do cukpa mɛɛfa. Hai Zeruzalɛmu má nɔ í jɛ bomma si ilɛi Izirɛli do ti Zudaa fei adɔ̃ kuntaa do mɛɛta.

Davidi í gba Zeruzalɛmu

⁶ Ŋɔi Davidi do inɛɛ ŋa à dede à waa bɔ igũ Zeruzalɛmu si inɛi Zebusi ŋa. Ŋɔi inɛi Zebusi ŋau à waa yaako Davidi à waa ni, i kaa yɔkɔ i lɔ wa ihɛ̃, domi baa fɛɛju ŋa do ilu kutɛ akã ŋa aa yɔkɔ a leleɛ.

⁷ Amma Davidi í gba ilui Zeruzalɛmu waatɔ iri kutai Siɔ̃ɔ iyi à na à kpe ilui Davidiu.

⁸ Bɛi Davidi í ce í gbaò iluu wee. Í tako í fɔ wo í ni, inɛ baa yooma iyi wa bi nŋu ku jɛ inɛi Zebusi ŋau igũ fei, koo too wa do acãi inyi iyi à tu si lɛlɛi ilɛ. Ǹ cé ŋai, aŋa fɛɛju do ilu kutɛ akã ŋau. Na ŋɔi í jɔ̀ inɛ ŋa à ya maa ni, fɛɛju do ilu kutɛ akã ŋa a kaa lɔ inɔ kpasɛ̃i Ilaaɔ̃u.

⁹ Davidi í koo í buba si iri kutau nɔ í sɔɔ ilui Davidi. Nɔ í ma bindi hai kpasɛ̃i nŋu takaɛ hee ku bɔ bantuma iyi à ya kpe Miloo.

¹⁰ Gbugbãi Davidi í la wa kɔ̃ɔsi nɔ Aɔ̃ Lafɛ̃ɛi lele do ilɛ í wɛɛ do nŋu.

¹¹ Hiramu, ilaalui Tii í bɛ akaweɛ gɔ ŋa do woo gbe jĩi ŋa do woo gbe kuta ŋa bi Davidi, nɔ í jɔ̀ à kooa jĩi ndii sɛɛdi ŋa. Nɔ woo ce icɛ ŋau à koo à maa kpasɛ̃.

¹² Ŋɔi Davidi í mà kãm kãm iyi Aɔ̃ Lafɛ̃ɛi í so nŋu ku jɛ ilaalui ilɛi Izirɛli nɔ í jɔ̀ bɛɛrɛi bommau wa kɔ̃ɔsi na zamaaɛ, inɛi Izirɛli ŋa.

Amu ŋa iyi Davidi í bí Zeruzalɛmu

¹³ Waati iyi Davidi í nɛ hai Eborɔ̃ɔ í koo í buba Zeruzalɛmu, ŋɔi í so abo gɔ ŋa má nɔ à bíaa ama inɛmɔkɔ do ama inaabo ŋa.

¹⁴ Irii amu ŋa iyi í bí Zeruzalɛmu wee. Samua do Sobabu do Natãa do Salomɔɔ,

¹⁵ do Yibaa do Elisua do Nefɛgi do Yafia,

¹⁶ do Elisama do Eliada do Elifelɛti.

Davidi í jɛ inɛi Filisi ŋa igũ

¹⁷ Inɛi Filisi ŋau à gbɔ iyi à cica Davidi ku jɛ ilaalui ilɛi Izirɛli, ŋɔi aŋa fei à dede à waa koo siɛ igũ. Iyi à na à sɔ̃ Davidi, ŋɔi í sa í koo í manji tengi bii à kaa yɔɔ.

¹⁸ Iyi inɛi Filisi ŋau à to Refaimu ŋɔi à fangaa si lɔɔmau.

¹⁹ Ŋɔi Davidi í bee Aɔ̃ Lafɛ̃ɛ í ni, n dede n koo si inɛi Filisi ŋau? Aa so ŋa i daam si awɔ? Nɔ Aɔ̃ Lafɛ̃ɛ í jɛaa í ni, dede i koo domi an so ŋa n daaɛ si awɔ.

²⁰ Ŋɔi Davidi í dede í bɔ Baali-Perasimu. Bɛi í jɛ ŋa igũ. Nɔ í ni, Aɔ̃ Lafɛ̃ɛ í jɔ̀ faata í ce si gãmɛi mbɛɛm ŋa bɛi bii inyi wa cã í ya ga geete ku jɔ̀ faata ku ce. Nɔ à kpe inyau Baali-Perasimu, waatɔ lafɛ̃ɛ iyi í jɔ̀ faata í ce.

²¹ Nɔ inɛi Filisi ŋau à sa à jɔ̀ iwɛ̃ nŋa ŋa bɛ, nɔ Davidi do inɛɛ ŋa à so ŋa à nɛò.

²² Ŋɔi inɛi Filisi ŋau à na à nyi wa si ŋa igũ Refaimu nɔ à fangaa si lɔɔmau má.

²³ Nɔ Davidi í bee Aɔ̃ Lafɛ̃ɛ má í ni, n koo si ŋa má? Ŋɔi Aɔ̃ Lafɛ̃ɛ í jɛaa í ni, koo, amma maà bɔ do waju nŋa. Bɔ do anyi nŋa wa nɔ i koo i ba ŋa kɔkɔi agbou.

²⁴ Waati iyi aa na i gbɔ ibai isɛɛnɛ si antaii jĩi ŋau, i ya ce gbãa gbãa, domi amu Aɔ̃ Lafɛ̃ɛi ǹ wa n nɛ do wajuɛ n koo n kpa soogei Filisi ŋau.

²⁵ Ŋɔi Davidi í ce bɛi Aɔ̃ Lafɛ̃ɛ í sɔ̃ɔu. Nɔ í jɛ inɛi Filisi ŋau igũ, í kpa ŋa wa hai Geba hee à toò wa Gezɛɛ.