Samuɛli 2, 4 - Bibeli do fee

Baana do Rekabu à kpa Isebosɛti

¹ Iyi Isebosɛti amai Sauluu í gbɔ Abinɛɛ í ku Eborɔ̃ɔ, ŋɔi awɔɛ fei í kua gbugbã nɔ njo í mu inɛi Izirɛli ŋau fei.

² Wee Isebosɛti í nɛ inɛ ngbo minjii wuaai sooge gɔ ŋa. Inɛ akã à ya kpoo Baana, inɛ minjisiau mɔ Rekabu. Aŋa fei amai Rimɔɔ inɛi ilui Berɔti ŋai hai si dimii Bɛnzamɛɛ.

³ Wee à waa ka ilui Berɔti mɔi si ilɛi dimii Bɛnzamɛɛ si na iyi í jɔ̀ inɛ ŋa iyi à tako à wa bɛ ŋau à sa à nɛ ilui Gitaimu tengi bii tɔku nŋa ŋa à wa hee ku baa nnyi.

⁴ Nɔ wee Zonatãa amai Sauluu mɔ í nɛ ama inɛmɔkɔ. Amau í ba adɔ̃ miiu waati iyi à toò laabaaui ikui Zonatãa do Saulu wa hai Yizireɛli, ŋɔi abo iyi wa wo amau í soo wa saaɛ. Si bɛi wa sɛi do saasa, ŋɔi amau í cuku nɔ í baa í jɛ wɛɛgɛ. Amaui à ya kpe Mefibosɛti.

⁵ Ajɔ nŋu gɔ Baana do Rekabu à bɔ kpasɛ̃i Isebosɛti si waati iyi inya wa gbãa. Waati bɛɛbɛ Isebosɛti í sũ wa sĩmi zakai dasãu.

^6-7 Nɔ à lɔ hee inɔ ileu bɛi inɛ ŋa iyi à naa bilee ku so, nɔ à ba Isebosɛti wa sũ si daayiɛ hee ilaawa. Ŋɔi à koo à gũu si caaka à kpaa à bu iriɛ à saò. Nɔ à koo à too kpãai icei idoi Zuudɛ̃ɛ idũu bɛ fei.

⁸ Ŋɔi à nɛò iriɛu Eborɔ̃ɔ bi Davidi. Nɔ à sɔ̃ɔ à ni, irii Isebosɛti amai Saulu mbɛɛɛ iyi wa dɛ ku kpaɛu wee. Aɔ̃ Lafɛ̃ɛi í jaa ilaalu lafɛ̃ɛ nwa í sãa gbese si Saulu do dimiɛ ŋa.

^9-11 Ŋɔi Davidi í sɔ̃ ŋa í ni, inɛ iyi í sɔ̃m í ni Saulu í kuu, wa tamaa bɛi laabaau jiidai nŋu í naa ku sɔ̃m, amma ǹ jɔ̀ à mu à kpaa Sikilagi. Nɔ ikui í jɛ ribai laabaauɛ. Aa fɔ idei iŋɛ inɛ laalɔ ŋa iyi ì koo ì kpa inɛ iyi kù ce taale kãma gɔ hee ilaawa bi ku sũɛ? Do irii Aɔ̃ Lafɛ̃ɛ nŋu iyi í faabam hai si wahala baa yooma fei an kpa iŋɛ mɔi n sãaò gbese.

¹² Ŋɔi Davidi í sɔ̃ soogeɛ ŋa í ni a kpa ŋa. À bu awɔ nŋa do isɛ nŋa ŋa nɔ à koo à kɔa ŋa si jĩi kɔkɔi fatamai Eborɔ̃ɔ. Si anyiɛ nɔ à so irii Isebosɛti mɔ à koo à suu inɔ balɛi Abinɛɛ Eborɔ̃ɔ bɛ.