Samuɛli 2, 3 - Bibeli do fee

¹ Kpasɛ̃i Saulu do ti Davidi à kpɛ si igũ. Nɔ gbugbãi Davidi í wasi ku kɔ̃ɔsi amma kpasɛ̃i Saulu wa mɔngɔ nɔ í kua gbugbã wa baa.

Ama inɛmɔkɔ ŋa iyi Davidi í bí Eborɔ̃ɔ

² Hai Eborɔ̃ɔ bɛi Davidi í bí ama inɛmɔkɔ gɔ ŋa. Ama sinteui à ya kpe Amunɔɔ, amai Ahinoamu inɛi Yizireɛliu,

³ minjisiau mɔ Kileabu amai Abigali jaaɔ̃i Nabali inɛi Kaamɛli, mɛɛtasiaɛ mɔ Abusalɔmu amai Maaka. Maakau, ama inaaboi ilaalui Gɛsuui iyi à ya kpe Talimai.

⁴ Ama mɛɛsiau mɔ Adɔnia amai Hagiti, miiusiau mɔ Sefatia amai Abitali,

⁵ do mɛɛfasia nŋa iyi à ya kpe Yitereamu amai Egila. Egilau mɔ inɛ akãi aboi Davidi ŋaui. Amu ŋa iyi Davidi í bí mbɛ si waati iyi í wa Eborɔ̃ɔ.

Abinɛɛ do Isebosɛti a kù gbɔsi njɛ

⁶ Si waati iyi kpasɛ̃i Saulu do ti Davidi ŋa à waa ce igũu, anyii kpasɛ̃i Saului Abinɛɛ í wa nɔ í ba gbugbã wa kɔ̃ɔsi.

⁷ Nɔ wee Saulu í nɛ abo gɔ iyi à ya kpe Risipa, ama inaaboi Ayai. Nɔ Isebosɛti í bee Abinɛɛ í ni, bɛirei í ce ì tɔtɔɔ sɛ̃ɛ do aboi baam.

⁸ Ŋɔi idɔi Abinɛɛ í kɔ̃ hee í caa na ide ŋa iyi Isebosɛti í fɔu. Nɔ í ni, zamba yoomai ǹ ceɛ. Amu aja iyi wa degbe inɛi Zudaa ŋai? Waati kãma fei, ǹ wa n cea kpasɛ̃i baaɛ Saulu icɛ, nŋu do nyaanzeɛ do kpaasiɛ ŋa, nɔ ǹ ce baa yooma fei ku ba Davidi ku maà toɛ awɔ, nɔ nnyi bɛbɛi awɔi ì waa yɛ taalem si idei abou ihɛ̃.

⁹ Ilaaɔ̃ ku kpãm iju bii n kù jɔ̀ kuwã iyi Aɔ̃ Lafɛ̃ɛ í cea Davidiu kù kɔ̃

¹⁰ waati iyi í ni nŋu á nya bommau wa hai si kpasɛ̃i Saulu nɔ ku jilɛ bommai Davidi si ilɛi Izirɛli do si ilɛi Zudaa hai Dãa wa hee ku bɔ Bɛɛseba.

¹¹ Ŋɔi Isebosɛti kù jɛa Abinɛɛ ide baa icu akã domi njo í muu hee í caa.

Abinɛɛ do Davidi à gbɔsi njɛ

¹² Si anyiɛ Abinɛɛ í bɛ inɛ ŋa bi Davidi a koo a beeɛ a ni, ilɛu ti yooi. Nɔ a sɔ̃ɔ a ni ku jɔ̀ aŋa a dĩ akabuu, nɔ nŋu ku sobiɛ ku ba ku gba ilɛi Izirɛli fei ku baa ku jɛ tɛɛ.

¹³ Nɔ à sɔ̃ɔ ideu fei, ŋɔi Davidi í jɛ nŋa í ni, í sĩa. An dĩ akabuu do nŋu. Amma mii akã gɔi an tɔɔɛ. Bii wa naa bi tom ku naaò Mikali ama inaaboi Sauluu wa titã. Bii kù jɛ bɛɛbɛ kaa yɛm mɔm.

¹⁴ Nɔ Davidi í bɛ inɛ ŋa bi Isebosɛti amai Sauluu a sɔ̃ɔ a ni ku naa nŋu Mikali abo iyi nŋu í dɛdɛ do jɔnfɔlɔ cĩɔi inɛi Filisi ŋau wa.

¹⁵ Nɔ Isebosɛti í jɔ̀ à koo à gbãa wa hai idei mɔkɔɛ Patiɛli amai Laisi.

¹⁶ Ŋɔi mɔkɔɛu wa tooɛ wa do kukpata hee à koo à to Bahurimu. Hai bɛ nɔ Abinɛɛ í sɔ̃ mɔkɔu í ni ku sinda ku nyi nɔ í sinda í nɛ.

¹⁷ Ŋɔi Abinɛɛ do inɛ ngboi inɛi Izirɛli ŋa à busi njɛ nɔ í sɔ̃ ŋa í ni, hai ku kpɛ mɔm wo, ì waa bi i so Davidi ku jɛ ilaalu nŋɛ ŋa.

¹⁸ To, i soo bɛbɛi ŋa, domi Aɔ̃ Lafɛ̃ɛ í cea Davidi kuwã í ni, do saabui awɔ amaacɛm nɔui, an faabaò zamaam inɛi Izirɛli ŋau hai si awɔi inɛi Filisi ŋa do hai si awɔi mbɛɛ nŋa ŋa fei.

¹⁹ Si anyiɛ Abinɛɛ do dimii Bɛnzamɛɛ ŋa à gbɔsi njɛ. Nɔ í bɔ Eborɔ̃ɔ bɛ í koo í sɔ̃ Davidi mii ŋa iyi inɛi Izirɛli ŋa à jilɛ do dimii Bɛnzamɛɛ ŋau fei.

²⁰ Abinɛɛ í to Eborɔ̃ɔ bɛi do amanɛ kɔnfia ŋa iyi à waa tooɛ. Nɔ Davidi í ce nŋa jingau.

²¹ Nɔ Abinɛɛ í sɔ̃ Davidi í ni, lafɛ̃ɛ ilaalum, an dede n nɛ n koo n tɔtɔɔ inɛi Izirɛli ŋa fei ku ba a dĩ akabuu do awɔ. Nɔ awɔi aa jɛ bomma si ilɛi Izirɛli fei bɛi ì biu. Nɔ Davidi í ni, koo nɛ. Nɔ Abinɛɛ í nɛ do laakai ku sũ.

Zoabu í kpa Abinɛɛ

²² Iyi í ce sãa ŋɔi Zoabu do inɛi Davidi ŋa à waa baa hai igũ nɔ à baaò amani nla nla wa. Waati bɛɛbɛ í kò Abinɛɛ kù wa Eborɔ̃ɔ bi Davidi bɛ má domi Davidi í jɔ̀ɔ í nɛ do laakai ku sũ.

²³ Iyi Zoabu do sooge ŋau fei à to wa, ŋɔi à sɔ̃ɔ à ni, Abinɛɛ amai Nɛɛu í naa bi ilaalu ihɛ̃, nɔ ilaalu í jɔ̀ɔ í nɛ do laakai ku sũ.

²⁴ Ŋɔi Zoabu í bɔ bi ilaaluu í beeɛ í ni, mii awɔ mɔ ì ce. Abinɛɛ wee í naa bi tɛɛ, bɛirei í ce ì jɔ̀ɔ nɔ ì ni ku nɛ.

²⁵ Ì mà Abinɛɛ sãa sãa. Í naa bi tɛɛi ku ba ku lɛlɛɛ nɔ ku mà bɛi ì ya ceò sɔɔlui igũ do mii ŋa iyi ì waa ce fei.

²⁶ Iyi Zoabu í fita í jɔ̀ Davidi bɛ, ŋɔi í bɛ inɛ ŋa a da hãmɛi Abinɛɛ wa. Nɔ woo bɛ ŋau à koo à sindaɛ wa hai lɔgɔi Sira. Amma kù jɛ do kumàsii Davidi.

²⁷ Iyi Abinɛɛ í sinda í baa Eborɔ̃ɔ bɛ má, ŋɔi Zoabu í kpoo kɔkɔlɛ hee kɔkɔi andɛ koofai iluu, bɛi wa bi ku baa idei asii gɔ ku fɔ. Nɔ í gũu si caakaɛ í kpaa, í sãò gbesei ifɔɛ Azaɛli iyi Abinɛɛ í tako í kpau wo.

²⁸ Si anyiɛ iyi Davidi í gbɔ ideu, ŋɔi í ni, n kù nɛ taale kãma si wajui Aɔ̃ Lafɛ̃ɛ na njɛi Abinɛɛ amai Nɛɛu nɔ bommam mɔ kù nɛ taale gɔ.

²⁹ Njɛu bɛ ku baa ku bii si irii Zoabu do si inɛi kpasɛ̃ɛ ŋa fei. Nɔ waati kãma fei inɛ gɔ ku ya maa ce bɔ̃ɔi kentu fũfũ walakɔ bɔ̃ɔi batai ara, walakɔ inɛ gɔ ku ya maa lɔkɔ si golo, walakɔ inɛ gɔ ku ya kú si igũ nɔ inɛ gɔ ku ya maa ce ari si kpasɛ̃u.

³⁰ Bɛɛbɛi Zoabu do ifɔɛ Abisai à kpaò Abinɛɛ si na iyi í jɔ̀ í kpa ifɔ nŋa Azaɛli si igũi Gabaɔ̃ɔu.

³¹ Ŋɔi Davidi í sɔ̃ Zoabu do inɛ ŋa iyi à wa bi tɛɛ fei í ni, i ga ibɔ nŋɛ ŋa, i dasi ibɔi saaki nɔ i maa kpataa Abinɛɛ ŋa. Nɔ Davidi wa too fitii kpakoi ikui Abinɛɛu.

³² Nɔ à si Abinɛɛ Eborɔ̃ɔ bɛ. Nɔ Davidi í dɔ̃ anu wa kpata si balɛi Abinɛɛu, nɔ zamaau fei wa kpata.

³³ Nɔ Davidi wa kɔ̃ irii akũ na irii Abinɛɛ wa ni, na mii í ce Abinɛɛ í kú bɛi inɛ iyi kù nɛ yaase.

³⁴ A kù dĩ awɔɛ hee má jɛ isɛɛ do sesee. Do nŋu fei í kú bɛi inɛ iyi woo kpa inɛ ŋa à zamba. Ŋɔi inɛ ŋa iyi à bɔ bɛ fei à wasi ku kpata.

³⁵ Si anyiɛ nɔ aŋa fei à naa bi Davidi ku ba a jɔ̀ ku jɛ hai dasãu. Amma Davidi í ce kugbasi í ni, Ilaaɔ̃ ku kpãm iju bii ǹ jɛ pɛ̃ɛ walakɔ sɔnda gɔ hee inunu ku maa lɔ.

³⁶ Nɔ zamaau fei í gbɔ ideu nɔ à saabuaa si, si bɛi à nɛ dɔ̃ɔnɛi ku saabuɛ si mii iyi wa ce fei.

³⁷ Nɔ inɛi Davidi ŋau fei hee do inɛi Izirɛli ŋa fei à mà hai ajɔ nŋu bɛ iyi kù jɛ do kumàsii ilaaluui à kpaò Abinɛɛ.

³⁸ Ŋɔi Davidi í sɔ̃ akaweɛ ŋa í ni, inɛ nla gɔi í ku nnyi si ilɛi Izirɛli.

³⁹ Nnyi, n kù nɛ gbugbã baa do iyi à cicam ǹ jɛ ilaalu fei. Nɔ amai Seruya ŋa à gaabu à rem. Aɔ̃ Lafɛ̃ɛ ku sãa inɛ laalɔ laalɔ iyi í ce.