Samuɛli 2, 24 - Bibeli do fee

Davidi í jɔ̀ à ka inɛi Izirɛli ŋa

¹ Ajɔ nŋu gɔ idɔi Aɔ̃ Lafɛ̃ɛ í nyi í kɔ̃ si inɛi Izirɛli ŋau má, nɔ í tale si Davidi í jɔ̀ í ce mii iyi á naa nŋa ijuukpã wa í ni, koo ka kukpɔi inɛi Izirɛli do Zudaa ŋau [iyi à to igũ ku ce].

² Ŋɔi Davidi í sɔ̃ Zoabu inɛ ngboi soogeɛ ŋau iyi í ya wa kɔkɔɛu í ni, koo dabii si dimii Izirɛli ŋau fei hai Dãa hee ku bɔ Bɛɛseba, i jɔ̀ a ka zamaau ku ba n mà bɛi akpɔ nŋa í to.

³ Ŋɔi Zoabu í jɛaa í ni, Aɔ̃ Lafɛ̃ɛ ku jɔ̀ zamaau ku kpɔ ikɔ ciwa nɔ ijuɛ ku yɔɔ, awɔ ilaalu lafɛ̃ɛm. Na mii í ce ì waa bi ku ce bɛɛbɛ.

⁴ Amma ilaaluu í leekĩ dim dim si ide iyi í jilɛa Zoabu do inɛ ngboi soogeɛ ŋau. Ŋɔi à nɛ hai bi ilaaluu à bɔ zamaai Izirɛliu ku ka.

⁵ À kua idoi Zuudɛ̃ɛ nɔ à koo à ce asɔ kɔkɔi Aroɛɛ, ilu iyi í wa aninii lɔɔmau. Si anyiɛ nɔ à dede à bɔ Yazɛɛ si ilɛi Gadi.

⁶ Hai bɛ nɔ à bɔ Galaadi do si ilɛi Tatimu-Hodisi. Nɔ à mɔsi à bɔ Dãa-Yãa do si bubaai Sidɔ̃ɔ ŋa.

⁷ Hai bɛ ŋɔi à sinda à bɔ Tii, ilu ku nɛ gbugbã do si ilu ŋa iyi à tako à jɛ ti inɛi Hɛvi ŋa do ti inɛi Kanaã ŋa. Nɔ à na à kpa iriɛ Bɛɛseba, ilu iyi í wa do ikpa awɔ cangai kpãai inunui ilɛu.

⁸ Bɛɛbɛi à dabii si ilɛu fei nɔ à sinda à baa Zeruzalɛmu si anyii cukpa mɛɛsã do ajɔ kɔnfia.

⁹ Ŋɔi Zoabu í sɔ̃ Davidi bɛi akpɔi inɛ ŋau í to. Si ilɛi Izirɛliu fei, inɛmɔkɔ ŋa iyi à to igũ ku bɔ, à dedei aŋa dubu cĩɔ mɛɛjɔ (800.000). Si ilɛi Zudaa mɔ inɛmɔkɔ ŋa iyi à to igũ ku bɔ à dedei aŋa dubu cĩɔ miiu (500.000).

Ilaaɔ̃ í kpã Davidi iju na dulum dɛɛ

¹⁰ Waati iyi Davidi í ce kukai zamaau í tã, ŋɔi zigiɛ í da ntɔ ntɔ. Nɔ í tɔɔ Aɔ̃ Lafɛ̃ɛ í ni, dulum nla nlai ǹ ce. Nsɛi, amu takam ǹ mà iyi ide sũmui ǹ ce. Na nŋu, ceem suurui dulum dom.

^11-12 Ŋɔi Aɔ̃ Lafɛ̃ɛ í sɔ̃ Gadi walii iyi wa ce icɛ kpasɛ̃i Davidi í ni, koo i sɔ̃ Davidi i ni ijuukpã ikã ikã mɛɛtai amu Aɔ̃ Lafɛ̃ɛ ǹ jilɛaa. Si inɔi ijuukpã ŋau akã iyi í cicai an jɔ̀ ku naa siɛ. Iju kumáɛ, iyi Davidi í jĩ,

¹³ Gadi í koo í sɔ̃ɔ í ni, Aɔ̃ Lafɛ̃ɛ í ni nŋu á jɔ̀ ijuukpã ku naa si ilɛɛ. Ijuukpã ikã ikã mɛɛtai í jilɛɛ. Awɔi aa cica akã. Ijuukpã ŋau wee. Ari ku naa si ilɛɛ adɔ̃ mɛɛje de, mà i sa i koo i maa manji zakai cukpa mɛɛta na mbɛɛɛ ŋa, mà bɔ̃ɔ ku naa si ilɛɛ ajɔ mɛɛta. Nsɛi lasabu, nɔ i sɔ̃m iyi an koo n jɛaa inɛ iyi í bɛm wa.

¹⁴ Ŋɔi Davidi í jɛa Gadi í ni, ǹ wa si inɔ kufɔ nla nla. Á sĩa Aɔ̃ Lafɛ̃ɛ ku kpã wa iju do iyi amanɛ ŋa aa kpã wa iju, domi araarei Aɔ̃ Lafɛ̃ɛ í la.

¹⁵ Ŋɔi Aɔ̃ Lafɛ̃ɛ í jɔ̀ patapoo í naa si ilɛi Izirɛliu hai daakɔu hee ku bɔ waati iyi Aɔ̃ Lafɛ̃ɛ takaɛ í cica. Nɔ si ilɛu fei hai Dãa hee ku bɔ Bɛɛseba amanɛ dubu kitaò fɛɛwa (70.000) í ku si zamaau.

¹⁶ Waati iyi amaleka iyi í naaò ijuukpãu í to awɔ si Zeruzalɛmu ku ce nfeɛ, ŋɔi Aɔ̃ Lafɛ̃ɛ í kpaasi idɔ í leekĩ ijuukpã nla nlau. Nɔ í sɔ̃ amalekau í ni, í to bɛɛbɛ, fa awɔɛ. Waati bɛɛbɛ, amalekau í wai kɔkɔi bi ku kpokpo bileei Aravuna inɛi Zebusi.

¹⁷ Iyi Davidi í yɛ amaleka iyi wa kpa zamaau, ŋɔi í tɔɔ Aɔ̃ Lafɛ̃ɛ í ni, amui ǹ ce dulum nɔu. Amui ǹ nɛ taaleu. To, taale yoomai inɛ ŋau ihɛ̃ mɔ à ce. Amui ì nɛ i kpã iju, amu do inɛi kpasɛ̃m ŋa.

Davidi í cea Aɔ̃ Lafɛ̃ɛ bi kuwee

¹⁸ Ajɔ nŋu bɛi Gadi í naa í ba Davidi í sɔ̃ɔ í ni, dede i bɔ bi ku kpokpo bileei Aravuna inɛi Zebusiu i koo i maa Aɔ̃ Lafɛ̃ɛ bi kuwee.

¹⁹ Ŋɔi Davidi í ce bɛi Gadi í sɔ̃ɔu. Í dede í koo bɛi Aɔ̃ Lafɛ̃ɛ í jilɛu.

²⁰ Ŋɔi Aravuna í cɔ ilu nɔ í yɛ ilaaluu do woo ce icɛɛ ŋa à waa naa bi tɛɛ. Nɔ í fita í koo í sɛɛbataa ilaaluu.

²¹ Nɔ í beeɛ í ni, na mii í ce ilaalu lafɛ̃ɛm wa naa si amu woo ce icɛɛ. Nɔ Davidi í jɛaa í ni, ǹ naa bi ku kpokpo bileeɛu ku rai n maa Aɔ̃ Lafɛ̃ɛ bi kuwee ku ba ijuukpãu ku fita hai si zamaau.

²² Ŋɔi Aravuna í sɔ̃ɔ í ni, bantumau kù nɛ ku sã, soo i ceò kuwee iyi ì bi. Kɛtɛ ŋa mɔ wee iyi aa ceò kuweeu. So sarɛtim do jĩnɛɛ ŋa mɔ i ceò ina.

²³ Nɔ Aravuna í ni má, ilaalu lafɛ̃ɛm, mii ŋau bɛ fei ǹ naɛ mbɛ. Aɔ̃ Lafɛ̃ɛɛ ku gba kuweeɛu do inɔ akã.

²⁴ Amma Davidi í sɔ̃ɔ í ni, n kaa n cea Aɔ̃ Lafɛ̃ɛm kuwee iyi kù nɛ ngɔgɔ ku sã. An raai si bɛi fiaɛ í nɛ ku to hai bi tɛɛ. Ŋɔi í sã isɔ fũfũ kpɛkɛlɛ ciitaa í raò bi ku kpokpo bileeu do kɛtɛ ŋau.

²⁵ Ŋɔi í maa Aɔ̃ Lafɛ̃ɛ bi kuweeu bɛ, nɔ í ce kuwee ŋa iyi à ya jo si ina fei sãa sãa do kuweei anu akã. Ŋɔi Aɔ̃ Lafɛ̃ɛ í gbɔ kutɔɔi Davidi, nɔ ijuukpãu í fita hai si ilɛi Izirɛliu.