Samuɛli 2, 23 - Bibeli do fee

Ide ankãanyi ŋa iyi Davidi í fɔ

¹ Ide ankãanyii Davidi amai Izai wee, nŋu iyi Aɔ̃ Lafɛ̃ɛi Zakɔbu í cica í so lele, nŋu iyi inɛi Izirɛli ŋa à ya bi iri ku kɔ̃ɛ ŋa. Í ni,

² hundei Aɔ̃ Lafɛ̃ɛ í ya som ku fɔò ide, nŋui í ya daam ideɛ si gɛlɛ.

³ Ilaaɔ̃ Lafɛ̃ɛi inɛi Izirɛli ŋa, nŋu iyi wa degbe ŋa, í sɔ̃m í ni, ilaalu iyi wa gbã inɛɛ ŋa do dee dee ku jɛ, nɔ wa mà bɛɛrɛi Ilaaɔ̃,

⁴ í yɛi bɛi inya kumái daakɔ, nɔ kudũi ijĩ kãma kù wɛɛ. Í yɛi bɛi inunu iyi í ya jɔ̀ fɔfɔ ŋa a fita si ilɛ bii ijĩ í da.

⁵ Nɔ bɛɛbɛi Ilaaɔ̃ í jɔ̀ kpasɛ̃m í yɛ si wajuɛ. Nŋui í dĩ akabuu hai nɛ kɔɔ do amu. Í jilɛa akabuuu wooda ŋai iyi kaa jɔ̀ inɛ gɔ ku yɔkɔ ku kpaasiɛ, nɔ á maa wɛɛi hee do ajɔ fei. Nŋui í ya sobim waati kãma fei, nɔ í ya ceem mii iyi í sĩa fei.

⁶ Amma inɛ laalɔ ŋau fei à yɛi bɛi agũ ŋa iyi à ya nyɔ, nɔ a ci ya so ŋa do awɔ.

⁷ Inɛ iyi wa bi ku ko ŋa koo jo ŋa í ya dɛdɛ isɔi walakɔ akpai kaka.

Woo ja igũi Davidi ŋa

⁸ Irii woo ja igũ ilu wɔɔkɔi Davidi ŋa iyi à re wee. Yosɛbu-Basebɛti inɛi Takemɔi í jɛ inɛ ngbo si inɔi inɛ mɛɛta ŋa iyi à nya iri. Nŋui í kpa amanɛ cĩɔ mɛɛjɔ (800) do kakaɛ si igũ tuuba akã.

⁹ Si anyiɛ Eleazaa amai Dodo tɔkui Ahohi í wa si inɔi inɛ mɛɛta ŋau. Nŋui í sobi Davidi si igũi aŋaò inɛi Filisi ŋa ajɔ iyi inɛi Izirɛli ŋa à mɔngɔ à sa à waa gũ iri kuta ŋau.

¹⁰ Nŋui í dede wa kpa inɛi Filisi ŋau hee awɔɛ í gbɛɛji nɔ í gbɛ wa mási taakubaɛ. Faaba nla nlai Aɔ̃ Lafɛ̃ɛ í nyisi ŋa ajɔ nŋu bɛ. Soogei Izirɛli ŋa à naa à nyi wa bi Eleazaai na a ko jĩnɛi iku ŋau nŋu akã.

¹¹ Sama amai Age inɛi Haraau mɔ í wa si inɔi inɛ mɛɛta ŋau. Ajɔ nŋu gɔ inɛi Filisi ŋa à tɔtɔɔ à bɔ igũ Lehi. Ikoi ilege gɔ í wa bɛ. Nɔ soogei Izirɛli ŋau à waa saa inɛi Filisi ŋau.

¹² Ŋɔi Sama í koo í leekĩ si aninii ikou ku ba ku gbaa hai bi inɛi Filisi ŋau, nɔ í jɛ ŋa igũ. Nɔ Aɔ̃ Lafɛ̃ɛ í nyisi ŋa faaba nla nla ajɔ nŋu.

¹³ Ajɔ nŋu gɔ má, inɛ mɛɛta si inɔi inɛ ngbo kuntaa ŋau à bɔ bi Davidi tengi bii wa manji si inɔ isai kutai Adulamu sukui amaajɛ ku da. Waati nŋu soogei Filisi gɔ ŋa à ce asɔ si lɔɔmai Refaimu.

¹⁴ Wee í kò Davidi í wa si inya ku nɛ gbugbãu bɛ nɔ soogei Filisi gɔ ŋa mɔ à ce asɔ nŋa Betelehɛmu.

¹⁵ Ŋɔi Davidi wa ce bɛgɛi Betelehɛmu nɔ í ni, yooi á baam inyii isɔ̃ iyi í wa anu koofai Betelehɛmuu wa n mɔ.

¹⁶ Ŋɔi inɛmɔkɔ ilu wɔɔkɔ mɛɛta ŋau à lɔ si asɔi soogei Filisi ŋau do gbugbã nɔ à koo à kpã inyii isɔ̃ iyi í wa anu koofai Betelehɛmuu wa, nɔ à naa à na Davidi. Amma Davidi í kɔ̀ ku mɔɔ, nɔ í dikãɛ í ceaò Aɔ̃ Lafɛ̃ɛ kuwee.

¹⁷ Nɔ í ni, Aɔ̃ Lafɛ̃ɛ ku maà jɔ̀ n mɔ inyii inɛ ŋa iyi à ta hunde nŋa à koo à kpãaò wa. Inyiu kumɔɛ á yɛi bɛi ǹ wa n mɔ njɛi inɛ ŋa iyi à koo à kpãa wau. Nɔ í kɔ̀ ku mɔ inyiu. Mii iyi inɛ mɛɛta ŋau à ce mbɛ.

¹⁸ Abisai ifɔi Zoabu amai Seruyai í jɛ inɛ ngboi inɛ mɛɛta ŋau. Nŋui í kpa amanɛ cĩɔ mɛɛta (300) do kakaɛ nɔ í nya iri bɛi aŋa mɛɛta ŋau.

¹⁹ Nŋui í jɛ inɛ akãi inɛ iyi í nya iri si inɔi inɛ kuntaa ŋau nɔ nŋui í baa í jɛ inɛ ngbo nŋa. Amma kù wa si inɔi inɛ mɛɛta ŋau.

²⁰ Benaya amai Yehoyada inɛi Kabuseɛli gɔi iyi í nɛ wɔɔkɔ nɔ í nya iri na mii nla nkpɔ nkpɔ ŋa iyi í ce. Nŋui í kpa woo ja igũ nla minjii Moabu ŋau. Nŋui í bɔ hee inɔ lɔgɔ í koo í kpa muusu nla gɔ bɛ sukui tũtũ nla nla gɔ.

²¹ Nŋui í kpa inɛi Ezibiti kaasãanɛ gɔ iyi wa mu kaka. Benaya í koo si inɛi Ezibitiu do golo, nɔ í gba kaka iyi wa mu si awɔu, í sinda í kpaaò.

²² Bɛɛbɛi Benaya amai Yehoyadau í ce, nɔ í nya iri bɛi ilu wɔɔkɔ mɛɛta ŋau.

²³ Í nyi í wa si wuai ilu wɔɔkɔ kuntaa ŋau má, nɔ í nɛ bɛɛrɛ í re inɛ kuntaa ŋau, amma kù to inɛ mɛɛta sinte ŋau. Nɔ Davidi í soo si inɔi ciiku woo degbeɛ ŋa.

²⁴ Asaɛli ifɔi Zoabu mɔ í wa si inɔi inɛ kuntaa ŋau, do Elihanaa amai Dodo inɛi Betelehɛmu,

²⁵ do Sama do Elika inɛi Harodu ŋa,

²⁶ do Helɛsi inɛi Pelɛti, do Ira amai Ikɛsi inɛi Tekoa,

²⁷ do Abiezɛɛ inɛi Anatɔti do Mebunai inɛi Husa,

²⁸ do Salumɔɔ inɛi Ahoa, do Maharai inɛi Netofa,

²⁹ do Helɛbu amai Baana inɛi Netofa, do Itai amai Ribai inɛi Gibea si dimii Bɛnzamɛɛ,

³⁰ do Benaya inɛi Piratɔ̃ɔ, do Hidai inɛi Nahale-Gaasi,

³¹ do Abi-Alubɔ̃ɔ inɛi Araba, do Azimavɛti inɛi Baahumu,

³² do Eliaba inɛi Saalubɔ̃ɔ, do Bɛne-Yaseni, do Zonatãa,

³³ do Sama inɛi Haraa, do Ahiamu amai Saraa inɛi Haraa,

³⁴ do Elifelɛti amai Ahasibai tɔkui inɛi Maaka gɔ, do Eliamu amai Ahitofɛli inɛi Gilo,

³⁵ do Hɛsirai inɛi Kaamɛli, do Paarai inɛi Arabi,

³⁶ do Igali amai Natãa inɛi Soba, do Bani inɛi Gadi,

³⁷ do Selɛki inɛi Amɔɔ, do Naharai inɛi Berɔti, nŋui í ya maa soa Zoabu amai Seruya jĩnɛi igũɛ ŋa,

³⁸ do Ira do Garɛbu inɛi Yetɛɛ ŋa,

³⁹ do Uri inɛi Hɛtiu. Aŋa fei à dede aŋa kuntaa do mɛɛje.