Samuɛli 2, 22 - Bibeli do fee

Davidi wa saabu Ilaaɔ̃ si anyii igũ ku jɛɛ

¹ Si anyii iyi Aɔ̃ Lafɛ̃ɛ í faaba Davidi hai si awɔi mbɛɛɛ ŋa fei do hai si awɔi Saulu, ŋɔi í kɔ̃aa iriu ihɛ̃.

² Í kɔ̃ iriu í ni, Aɔ̃ Lafɛ̃ɛi í jɛ kuta iyi ǹ wa n kaaba. Nŋui í jɛ ile ku nɛ gbugbãm do woo faabam.

³ Ilaaɔ̃i í jɛ kuta bi ku manjim. Nŋui í jɛ tɛlim do gbugbã iyi wa faabam. Bi tɛɛi ǹ ya n sa n koo n manji ku ba ilu inɔ kukã ŋa a maà bam.

⁴ I saabu Aɔ̃ Lafɛ̃ɛ ŋa. Bii ǹ dɔ̃ anu ǹ kpoo gbakã í ya faabam nii hai si awɔi mbɛɛm ŋa.

⁵ Iku í naa í kaakom bɛi acãi inyi, nfe ku ce í naa sim bɛi kutãngãm dii inyi, nɔ í jɔ̀ zigim í da ntɔ ntɔ.

⁶ Ikũi bi kuwai iku ŋau í dĩm, nɔ taaoi iku í zambam.

⁷ Si inɔ kufɔm, ǹ tɔɔ Aɔ̃ Lafɛ̃ɛ. Hai bi kuwaɛ wa, í gbɔ imum, nɔ anu ku dɔ̃m í to si itĩɛ.

⁸ Ilɛ í wasi ku yaya, nɔ í la. Nɔ icui lele í lɔsi ku gbugbã. Aŋa fei à tɛkɛɛ si na iyi í jɔ̀ idɔi Aɔ̃ Lafɛ̃ɛ í kɔ̃.

⁹ Ŋɔi imɔɛ wa fo ilùlù, nɔ ina wa fita wa hai si gɛlɛɛ, do ina nyɛnyɛ ŋa ajɔ.

¹⁰ Ŋɔi í baaò lele wa ilɛɛlɛ nɔ í kita wa, nɔ wa nɛ si kudũi ijĩ nla nla.

¹¹ Wa gũ serubɛ̃ɛ gɔ iyi wa fo wa, wa yaai si fufu.

¹² Ilu kukui í ceò ilei acɔ í kaakoò araɛ. Kudũi ijĩ iyi í kuku í biiɛ.

¹³ Inya kumái wa cuaa wa nɔ kuŋɔi ijĩ wa fangaa wa hai si inya kumáu.

¹⁴ Aɔ̃ Lafɛ̃ɛ í la wa hai lele. Nŋu iyi í re mii fei, í dɔ̃ anu wa bɛi kulai ijĩ.

¹⁵ Ŋɔi í ta afa wa í fangaau mbɛɛm ŋa, í jɔ̀ dagba lele í cuku si ŋa wa nɔ à sa.

¹⁶ Aɔ̃ Lafɛ̃ɛ í cã imɔ í jɔ̀ tenku í gbɛ nɔ à yɛ lɛlɛɛ. Nɔ icui andunya í fita gbugbã.

¹⁷ Ŋɔi í yɔ awɔ wa hai lele í som, í nyam hai si inɔi inyi nla nlau.

¹⁸ Nŋui í faabam hai si awɔi mbɛɛ ilu gbugbãm ŋau, aŋa iyi à cém nɔ à rem do gbugbã.

¹⁹ Si waatii inɔ kufɔm nɔu, aŋai à dede sim amma Aɔ̃ Lafɛ̃ɛi í jɛ sobim.

²⁰ Í nyam hai si awɔ nŋa ku ba n nɛ aram. í faabam domi í bim.

²¹ Aɔ̃ Lafɛ̃ɛ í ceem bɛɛbɛi si dee dee ku jɛm, nɔ í sãam ribai taale hai nɛm

²² domi ǹ jirima woodaɛ ŋau, nɔ n kù sɛkɛɛ n kù jĩò Aɔ̃ Lafɛ̃ɛm na laalɔ ku cem.

²³ Ǹ too woodaɛ ŋau fei, n kù kua kãma nŋa.

²⁴ Ǹ saa laalɔ ku ce, n kù nɛ taale kãma bi tɛɛ.

²⁵ Na nŋu, Aɔ̃ Lafɛ̃ɛ í sãam si bɛi dee dee ku jɛm í to, do si bɛi ǹ má.

²⁶ Awɔ Aɔ̃ Lafɛ̃ɛ ì ya nyisi ilu naanɛ iyi awɔ ilu naanɛi. Nɔ ì ya nyisi ilu wɔɔkɔ iyi ì jɛ dee dee.

²⁷ Ì ya nyisi inɛ iyi í má iyi awɔ inɛ kumái, amma ì ya nyisi inɛ laalɔ iyi ì nɛ bisi.

²⁸ Ì ya faaba inɛ ŋa iyi inɛ ŋa a kù waa saalu, nɔ ì ya kaye inɛ ŋa iyi à so ara nŋa lele.

²⁹ Awɔi ì jɛ fitilam, awɔ Aɔ̃ Lafɛ̃ɛ. Awɔi ì waa máam inya si ilu kuku.

³⁰ Do gbugbãɛi ǹ ya n koo si mbɛɛ ŋa iyi à waa naa sim do jĩnɛi igũ nŋa ŋa. Do gbugbãɛi ǹ ya n kua bindi ŋa.

³¹ Kpãai Ilaaɔ̃ í tɛ. Idei Aɔ̃ Lafɛ̃ɛ í má. Nŋui í jɛ tɛlii inɛ iyi wa manji bi tɛɛ.

³² Yooi í jɛ Ilaaɔ̃ má bii kù jɛ Aɔ̃ Lafɛ̃ɛ. Mà yooi í jɛ gbugbãm bii kù jɛ Aɔ̃ Lafɛ̃ɛ nwa.

³³ Ilaaɔ̃i í jɛ ile ku nɛ gbugbã iyi wa degbem, nɔ nŋui wa nɛɛm si kpãa iyi í tɛu.

³⁴ Nŋui í ya jɔ̀ kutɛm ku gbãa si are bɛi ti kulu ŋa, nɔ nŋui í ya jɔ̀ ǹ leekĩ lele si iri kuta ŋau.

³⁵ Nŋui í kɔm si igũ ku ce, nɔ nŋui í kɔm si biooi isɔ nkpa ku ta.

³⁶ Awɔ Aɔ̃ Lafɛ̃ɛm, awɔi ì jɛ tɛli iyi í faabam, awɔi ì gbɔ kutɔɔm nɔ ì muum gbugbã.

³⁷ Ì ya kɛkɛ kpãa si bii ǹ wa n nɛ, nɔ n ci ya n koosɛ má.

³⁸ Ǹ ya n lele mbɛɛm ŋa nɔ n ce nfe nŋa. N ci ya n sinda wa bii n kù kãmia ŋa.

³⁹ Ǹ ya n cafe ŋai n tambɔ ŋa. A ci ya yɔkɔ a dede. Aŋa fei à ya cuku a kui si abɛm.

⁴⁰ Awɔi ì ya muum gbugbã iyi ǹ ya n bɔò igũ. Ì ya jɔ̀ mbɛɛm ŋa a naa a gulɛɛm.

⁴¹ Ì ya jɔ̀ mbɛɛm ŋa a to anyi a maa saam, nɔ n kpa irii inɛ ŋa iyi à cém.

⁴² À ya cɔ bii fei a ci ya yɛ inɛ gɔ iyi á faaba ŋa. À ya dɔ̃ anu a tɔɔɛ, amma i ci ya jɛ nŋa.

⁴³ Ǹ ya n lɔlɔ ŋai a ce bɛi sãa. Ǹ ya n lɔlɔ ŋa, n jojo si ŋa bɛi pɔkɔdɔ si kpãa.

⁴⁴ Awɔi ì ya faabam bii zamaam í dedeò ide ku kɔ̀ sim. Nɔ ì jɔ̀ ǹ jɛ inɛ ngboi ilɛ ŋa. Dimi ŋa iyi n kù mà à waa jɛ arum,

⁴⁵ nɔ isɛ mmu ŋa à ya naa ku lɛlɛɛm. Bii ǹ fɔ ide gbakã, a ce bɛi ǹ jilɛ.

⁴⁶ Aŋa fei à ya kua gbugbãi. Bii à fita wa hai inɔ bindi nŋa à ya maa yayai do njo.

⁴⁷ Aɔ̃ Lafɛ̃ɛ í wɛɛ. Ǹ saabuɛ ntɔ ntɔ. Nŋui í jɛ bɛi kuta bii ǹ ya n manji. Nŋui í jɛ woo faabam. Ka sisi kulaɛ.

⁴⁸ Ilaaɔ̃i í ya sãam gbese. Nŋui í ya jɔ̀ n kãmia dimi mmu ŋa.

⁴⁹ Nɔ nŋui í ya nyam hai si awɔi mbɛɛm ŋau. Aɔ̃ Lafɛ̃ɛ awɔi ì ya som lele si antaii mbɛɛm ŋa. Awɔi ì ya nyam hai si awɔi ilu inɔ kukã ŋa.

⁵⁰ Na ŋɔi í ce an maa n cĩɛi bi inɛi ilɛ mmu ŋa Aɔ̃ Lafɛ̃ɛ. An maa n kɔ̃ irii do iriɛ.

⁵¹ Awɔi ì cicam n jɛ ilaalu, nɔ awɔi ì ya jɔ̀ n jɛ igũ waati kãma fei. Awɔi ì ceem didɔ̃, nɔ aa maa cea amu do tɔkum ŋai hee do ajɔ fei.