Samuɛli 2, 21 - Bibeli do fee

À kpa dimii Saulu ŋa

¹ Si waatii ilaalu Davidi, ari gɔ í ce nɔ í kpɛ í ce hee adɔ̃ mɛɛta. Ŋɔi Davidi í tɔɔ Aɔ̃ Lafɛ̃ɛ. Nɔ Aɔ̃ Lafɛ̃ɛ í sɔ̃ɔ í ni, ariu wa cei na dulum iyi Saulu do inɛi kpasɛ̃ɛ ŋa à ce domi à kpa inɛi Gabaɔ̃ɔ ŋa.

² Ŋɔi ilaaluu í kpe inɛi Gabaɔ̃ɔ ŋau ku sɔ̃ ŋa ide. Inɛi Gabaɔ̃ɔ ŋa a kù bɛi a kù jɛ inɛi Izirɛli ŋa, amma mbɔi inɛi Amɔre ŋai. Aŋaò inɛi Izirɛli ŋa à nɛ akabuu. Do nŋu fei Saulu í bi nŋu ku kpa aŋa fei na kookaai iyi wa ce na aranfãanii inɛi Izirɛli ŋa do inɛi Zudaa ŋa.

³ Davidi í bee ŋa í ni, bɛirei an ce nŋɛ. Bɛirei an ce n teese kurara iyi Saulu í ce nŋɛ ku ba iŋɛ mɔ i saabu inɛi Aɔ̃ Lafɛ̃ɛ ŋau ŋa.

⁴ Ŋɔi inɛi Gabaɔ̃ɔ ŋau à ni, kù jɛ isɔ fũfũ walakɔ wurai a wũa idei awaò kpasɛ̃i Saulu ŋa. Kù nɔ kù jɛ awai aa ka jɔ̀ a kpa inɛi Izirɛli gɔ. Nɔ ilaaluu í ni, to, i sɔ̃m bɛi ì bi ŋa an ce nŋɛ.

⁵ Ŋɔi à jɛa ilaaluu à ni, Saulu wa bi ku kpa dimi nwai wo si dimii Izirɛli ŋa.

⁶ Na nŋu, nya nwa amanɛ mɛɛje wa hai si dimii Saulu i da nwa si awɔ káa kpa ŋa si wajui Aɔ̃ Lafɛ̃ɛ Gibea ilui Saulu, inɛ iyi Aɔ̃ Lafɛ̃ɛ í cicau. Ŋɔi ilaalu í ni, an naaò ŋa wa.

⁷ Ŋɔi Davidi í jɔ̀ Mefibosɛti, amai Zonatãa tɔkui Sauluu na akabuu iyi aŋaò Zonatãa à dĩ si wajui Aɔ̃ Lafɛ̃ɛ.

⁸ Amma í mu Amɔni do Mefibosɛti, ama minji ŋa iyi Risipa amai Aya í bía Saulu ŋau, do ama miiu ŋa iyi Merabu í bía Adirɛli amai Baazilai inɛi Meholau,

⁹ nɔ í daa inɛi Gabaɔ̃ɔ ŋau si awɔ. Nɔ à koo à bagãm ŋa si iri kuta wajui Aɔ̃ Lafɛ̃ɛ. Aŋa mɛɛjeu fei à ku ajɔ. À kpa ŋai si waati iyi à sinti ɔɔzu ku mu.

¹⁰ Risipa jaaɔ̃i Saulu í dɛdɛ saaki í tɔɔ si kuta í buba si hai sintei amaajɛ ku da hee ijĩ í koo í wɔò si ŋa. Nŋui í ganji yɛi ŋa a jɛ iku ŋau dasã do mɛɛmui sako ŋa idũ.

¹¹ Ŋɔi à koo à sɔ̃ Davidi bɛi Risipa í ce.

¹² Nɔ Davidi í bɔ kũkũi Saulu do ti Zonatãa amaɛ ku so wa hai bi inɛi Yabɛsi ŋa si ilɛi Galaadi. Inɛi Yabɛsi ŋaui à so kũkũ nŋa ŋau wo hai Bɛti-Sãa tengi bii inɛi Filisi ŋa à kɔa ŋa waati iyi à kpa ŋa Giliboa.

¹³ Í so kũkũi Saulu do ti Zonatãa amaɛ ŋau wa hai bɛ, nɔ í so ti inɛ ŋa iyi à bagãm tengi bɛ ŋau mɔ wa.

¹⁴ Ŋɔi à koo à si kũkũi Saulu do ti amaɛ Zonatãa ilui Sela si ilɛi Bɛnzamɛɛ inɔ balɛi Kisi baai Saulu. Ŋɔi à ce bɛi ilaaluu í ni fei. Si anyii nŋu, idɔɔkɔ̃i Ilaaɔ̃ kù wa si ilɛu má.

Inɛi Izirɛli ŋa à ce igũ do inɛi Filisi ŋa

¹⁵ Ŋɔi inɛi Filisi ŋa à naa igũ si inɛi Izirɛli ŋa. Nɔ Davidi do soogeɛ ŋau à koo si ŋa à waa ja igũ. Ŋɔi Davidi í gbɛɛji.

¹⁶ Ŋɔi Yisibi-Benɔbu inɛ akãi tɔkui Rafa ŋau í lasabu nŋu ku kpa Davidi. Í nɛ kaka iyi à ce do isɔ nkpa nɔ kuwoɛ í re kiloo mɛɛta, nɔ wa dĩ taakuba titɔ̃ si kpakaɛ.

¹⁷ Ŋɔi Abisai amai Seruya í naa í sobi Davidi, nɔ í kpa inɛi Filisiu. Ŋɔi inɛi Davidi ŋa à ce kugbasi à ni, Davidi kaa too wa igũ má ku ba ku maà na ku leekĩ bomma ku jɛi Izirɛliu.

¹⁸ Si anyiɛ, inɛi Izirɛli ŋau à ce igũ má aŋaò inɛi Filisi ŋa ilui Gɔbu. Ŋɔi Sibekai inɛi Husau í kpa Safu inɛ akãi dimii Rafa ŋau.

¹⁹ À nyi à ce igũ Gɔbu má do inɛi Filisi ŋau. Nɔ Elihanaa amai Yaare-Oregimu inɛi Betelehɛmu í kpa Goliati inɛi Gati iyi akpai kakaɛ í la bɛi gomboi caacɛ.

²⁰ Igũ í ce má ilui Gati. Mɔkɔ doogo gɔ í wa bɛ, mɔkɔu mɔ dimii Rafai, í nɛ amaawɔ mɛɛfa si awɔ akãɛ fei do amaasɛ mɛɛfa si kutɛ akã fei, nɔ fei í dede ara kɔnfia do mɛɛ.

²¹ Nŋui í bu inɛi Izirɛli ŋa. Nɔ Zonatãa amai Sama igbãi Davidi í kpaa.

²² Inɛ mɛɛ ŋau bɛ fei dimii Rafa inɛi Gati ŋai. Davidi do soogeɛ ŋa à kpa ŋa.