Samuɛli 2, 20 - Bibeli do fee

Seba í dedeò ide ku kɔ̀ si Davidi

¹ Dimii Bɛnzamɛɛ gɔ í wa bɛ à ya kpoo Seba amai Bikiri nɔ í jɛ inɛ laalɔ. Ŋɔi í fã kuu í ni, a kù nɛ baa kãma si Davidi má, a kaa ka jɛ tubui nkãma do amai Izaiu má. Iŋɛ inɛi Izirɛli ŋa, inɛ fei koo bɔ ideɛ.

² Ŋɔi inɛi Izirɛli ŋau à jɔ̀ Davidi à too Seba. Amma inɛi Zudaa ŋau à leekĩò ilaalu nŋa nɔ à tooɛ wa hai Zuudɛ̃ɛ hee Zeruzalɛmu.

³ Iyi Davidi í to kpasɛ̃ɛ Zeruzalɛmu bɛ, ŋɔi í so abo mɛɛwaɛ ŋa iyi í jɔ̀ a maa degbe kpasɛ̃u í koo í dasi ŋa inɔ kpasɛ̃ mmu gɔ à waa degbe ŋa. Nŋui wa wò ŋa, amma kù tɔtɔɔ sɛ̃ɛ do ŋa. Nɔ à cĩmbo si ŋa à wa bɛ bɛi jaaɔ̃ hee à koo à kuò.

Zoabu í kpa Amasa

⁴ Ŋɔi ilaalu í kpe Amasa í sɔ̃ɔ í ni, kpe soogei Zudaa ŋau i tɔtɔɔ ŋa wa hai ihɛ̃ ku bɔ ajɔ mɛɛta. Nɔ awɔ mɔ i wa inɔ nŋa wa.

⁵ Ŋɔi Amasa í bɔ sooge ŋau ku tɔtɔɔ wa. Amma waati iyi ilaaluu í daau í lɔ.

⁶ Ŋɔi Davidi í sɔ̃ Abisai í ni, Seba amai Bikiri á na ku ce nwa laalɔ ku re iyi Abusalɔmu í ce. Na nŋu, so ciikum ŋau awɔ takaɛ nɔ i koo, ku ba ku maà na ku sa nwa koo manji si ilu ku nɛ gbugbãu gɔgɔɛ gɔ.

⁷ Ŋɔi Abisai í dasi kpãa nŋu do soogei Zoabu ŋau do inɛi Kerɛti ŋa do inɛi Pelɛti ŋa do sooge kaasãanɛ ŋau fei, à fita hai inɔ ilu Zeruzalɛmu à waa lele Seba amai Bikiriu.

⁸ Waati iyi à maai bi kuta nla iyi í wa Gabaɔ̃ɔ, ŋɔi Amasa wa kò ŋa wa. Zoabu í dĩ taakuba si antaii jĩnɛ ŋa iyi wa dasi. Ŋɔi taakubau í yɔ hai si ankɔ̃ɔɛ í cuku si waati iyi Zoabu wa koo si Amasau.

⁹ Ŋɔi Zoabu í bee Amasa í ni, kpaasim, baani í wɛɛ? Nɔ í mu agbãi Amasa do awɔ njɛ í sakooɛ bɛi wa coo fɔɔ.

¹⁰ Amasa kù ce laakaii taakuba iyi Zoabu í so wa mu do awɔ cangaɛ. Ŋɔi Zoabu í gũu taakubau si caaka hee ifũɛ ŋa í fita í fangaa si ilɛ, nɔ kù siaa si má mɔm, Amasa í ku. Si anyiɛ Zoabu do ifɔɛ Abisai à waa bɔ Seba ku dɛdɛ.

Zoabu í jɔ̀ à kpa Seba

¹¹ Ŋɔi inɛ akãi soogei Zoabu ŋau í gbe bi ikui Amasau í ya maa ni, inɛ iyi í bi Zoabu nɔ í wa anyii Davidi fei koo too Zoabu.

¹² Ikui Amasa wa sũ si njɛ si aninii kpãau. Ŋɔi soogeu í yɛ zamaa iyi í to wa bɛ fei í ya leekĩi, ŋɔi í fa ikuu hai kpãa í koo í nyɔɔ si iko gɔ, nɔ í biiɛ do acɔ.

¹³ Waati iyi í fa ikuu hai si kpãau, ŋɔi sooge ŋau fei à too Zoabu ku ba a lele Seba.

¹⁴ Nɔ à kua ilɛi dimii Izirɛli ŋau fei à waa bɔ ikpa Abɛli-Bɛti-Maaka. Ŋɔi inɛi Berimu ŋa mɔ à tɔtɔɔ à too ŋa.

¹⁵ Ŋɔi à koo à ka Seba bɛ. Nɔ à ko sãa do kuta ŋa à timbiɛ í masi bindii iluu. Ŋɔi zamaa iyi í wa bi Zoabuu fei í wasi bindii iluu ku da ku ba a kɛkɛɛ.

¹⁶ Ŋɔi abo ilu laakai gɔ í wasi ku dɔ̃ anu wa hai inɔ iluu wa ni, i sotĩ i gbɔ ŋa, i sotĩ i gbɔ ŋa, i sɔ̃ Zoabu i ni ku tɛkɛɛ wa ihɛ̃ n baa ku fɔ.

¹⁷ Ŋɔi Zoabu í tɛkɛɛ siɛ, nɔ abou í beeɛ í ni, awɔi Zoabu? Nɔ í jɛaa í ni, amui. Ŋɔi abou í ni, sotĩ i gbɔ idem, amu woo ce icɛɛ. Nɔ í ni, ǹ wa n gbɔ.

¹⁸ Ŋɔi abou í ni, tako wo, bii ide í dede, à ya nii a koo a bee wa hai Abɛli-Bɛti-Maaka. Nɔ ideu fei í ya wũai.

¹⁹ Si ilui Izirɛli ŋau, ilu nwa í wa inɔ ilu ŋa iyi à nɛ laakai ku sũ nɔ à leekĩa Izirɛli. Nɔ ì waa bi i ce asɔɔi ilu jiida iyi í nɛ bɛɛrɛ bɛi ihɛ̃ si ilɛi Izirɛli? Na mii í ce ì waa bi i kpa ilu iyi í jɛ ti Aɔ̃ Lafɛ̃ɛ.

²⁰ Ŋɔi Zoabu í jɛaa í ni, lasabui iluu ku lɛgɛ do asɔɔɛ ku ce kù waam.

²¹ Ideu kù jɛ bɛɛbɛ. Amma mɔkɔi iri kutai Efaraimu gɔ iyi à ya kpe Seba amai Bikirii í dedeò ija do ilaalu Davidi. I mu nŋu akã i nam wa ŋa, nɔ n jɔ̀ iluu n nɛ. Ŋɔi abou í ni, aa sɔɔɛ iriɛ wa do alalai bindiu.

²² Nɔ abou í bɔ bi inɛi ilu ŋau fei do bisiɛ. Ŋɔi à koo à bu irii Sebau wa à na à sɔɔa Zoabu. Ŋɔi Zoabu í fã kuu. Nɔ à fangaa à jɔ̀ iluu, inɛ fei í bɔ ideɛ. Nɔ Zoabu í nyi Zeruzalɛmu bi ilaaluu.

Akawei Davidi ŋa

²³ Zoabui wa jɛ inɛ ngboi sooge ŋau fei. Benaya amai Yehoyada wa jɛ inɛ ngboi inɛi Kerɛti ŋa do inɛi Pelɛti ŋa.

²⁴ Adoramui í jɛ inɛ ngboi woo ce icɛi tilasi ŋa. Zozafati amai Ahiludui í jɛ woo singa tia ŋa.

²⁵ Sefai í jɛ woo kɔ tia, Sadɔku do Abiataa à waa jɛ woo wee ŋa,

²⁶ nɔ Ira inɛi Yai wa jɛ woo weei Davidi.