Samuɛli 2, 2 - Bibeli do fee

À bii Davidi bommai Zudaa

¹ Si anyiɛ ŋɔi Davidi í bee Aɔ̃ Lafɛ̃ɛ í ni, n dede n bɔ ilu gɔ si ilɛi Zudaa má? Nɔ Aɔ̃ Lafɛ̃ɛ í jɛaa í ni, oo. Ŋɔi Davidi í beeɛ má í ni, ilu iwoi n bɔ. Nɔ í jɛaa í ni, dede i bɔ Eborɔ̃ɔ.

² Ŋɔi Davidi í so abo minjiɛ ŋau, Ahinoamu inɛi Yizireɛliu do Abigali jaaɔ̃i Nabali inɛi Kaamɛliu í nɛò ŋa.

³ Nɔ Davidi í jɔ̀ inɛ ŋa iyi à waa tooɛ ŋau mɔ à dede à nɛ si ilu ŋa iyi à wa kɔkɔi Eborɔ̃ɔ bɛ aŋa do nyaanze nŋa ŋa fei.

⁴ Si anyiɛ ŋɔi inɛi Zudaa ŋa à naa Eborɔ̃ɔ bɛ ku ba a tontooa Davidi ikpo si iri ku jɛ ilaalui inɛi Zudaa ŋa fei. Nɔ si anyiɛ à sɔ̃ Davidi à ni, inɛi ilui Yabɛsi ŋa si ilɛi Galaadi, aŋai à si Saulu.

⁵ Ŋɔi Davidi í bɛ inɛ ŋa a koo a ce ŋa fɔɔ nɔ a ni, Aɔ̃ Lafɛ̃ɛ ku wee nŋɛ, iŋɛ iyi ì si Saulu lafɛ̃ɛ nŋɛ nɔ ì nyisiò iyi ì nɛ kubiɛ ŋa.

⁶ Aɔ̃ Lafɛ̃ɛ ku ce araare nŋɛ nɔ ku jɔ̀ dee dee kú jɛɛ ku wɛɛ nŋɛ. Nɔ amu mɔ an ce nŋɛ mii jiida si na iyi í jɔ̀ ì ce bɛɛbɛ ŋa.

⁷ Bɛbɛi i leekĩ dim dim ŋa nɔ i jɔ̀ i jɛ ilu wɔɔkɔ ŋa. Saulu lafɛ̃ɛ nŋɛ í ku tã, nɔ amui inɛi Zudaa ŋa à cica n jɛ ilaalu nŋa.

À bii Isebosɛti bommai Izirɛli

⁸ Waati bɛɛbɛi Abinɛɛ amai Nɛɛ iyi wa jɛ inɛ ngboi soogei Saulu ŋa í so Isebosɛti amai Sauluu í bɔòɛ Mahanaimu.

⁹ Nɔ í jɔ̀ Isebosɛti í koo wa jɛ ilaalui Galaadi do ilaalui dimii Azɛɛ ŋa do si Yizireɛli, do si dimii Efaraimu ŋa, do ti Bɛnzamɛɛ ŋa do si ilɛi Izirɛli fei.

¹⁰ Adɔ̃ ciijii Isebosɛti í nɛ waati iyi í jɛ bomma si ilɛi Izirɛli. Nɔ í ce si bommau adɔ̃ minji si ilɛi Izirɛli fei. Inɛi Zudaa ŋa aŋa akãi à leekĩ si Davidi ku jɛ bommau.

¹¹ Nɔ Davidi í jɛ ilaalui inɛi Zudaa ŋa adɔ̃ mɛɛje do cukpa mɛɛfa Eborɔ̃ɔ bɛ.

Igũi inɛi Zudaa ŋa do inɛi Izirɛli ŋa

¹² Si anyiɛ ŋɔi Abinɛɛ amai Nɛɛu do inɛi Isebosɛti amai Saulu ŋau à dede hai Mahanaimu à waa bɔ ilui Gabaɔ̃ɔ.

¹³ Nɔ Zoabu amai Seruya do inɛi Davidi ŋa mɔ à dede à waa bɔ bɛ. Ŋɔi wuaai sooge minji ŋau bɛ à koo à ko bi iri cuui Gabaɔ̃ɔ, nɔ aŋa fei à leekĩ. Inɛi Davidi ŋa à wa do ice ihɛ̃ nɔ inɛi Isebosɛti ŋa mɔ à wa do ice ihɔ̃.

¹⁴ Ŋɔi Abinɛɛ í sɔ̃ Zoabu í ni, ka cica awaasũ nwa gɔ ŋa ka jɔ̀ a ja si waju nwa ihɛ̃ minji minji. Nɔ Zoabu í ni, oo, ǹ jɛsi.

¹⁵ Ŋɔi sooge ŋau à dede à koo à ko ijau. Aŋa fei akpɔ nŋa wa mungai, inɛi dimii Bɛnzamɛɛ ŋa iyi à jɛ soogei Isebosɛti ŋau à wɛɛi aŋa maateeji, inɛi Davidi ŋa mɔ aŋa maateeji.

¹⁶ Nɔ inɛ fei í mu kpaasiɛ. Ŋɔi à ya mu irii njɛ nɔ a gũ njɛ taakuba si kpakpaa cingaa hee aŋa minji fei a cuku. Nɔ à sɔ inyau ikoi taakuba.

¹⁷ Ajɔ nŋu bɛ, igũu í gbãa ntɔ ntɔ. Ŋɔi inɛi Davidi ŋa à kãmia Abinɛɛ do inɛi Izirɛli ŋa à jɛ ŋa igũ.

¹⁸ Nɔ Zoabu do Abisai do Azaɛli ama mɛɛtai Seruya ŋau mɔ à wa bɛ. Kutɛi Azaɛli í fɛɛ nɔ í nɛ are í re baa ayɔ.

¹⁹ Ŋɔi wa lele Abinɛɛ nɔ kù waa yaa baa do canga walakɔ do njɛ.

²⁰ Ŋɔi Abinɛɛ í sinda í cɔ anyi nɔ í ni, awɔi Azaɛli? Nɔ Azaɛli í jɛaa í ni, oo amui.

²¹ Ŋɔi Abinɛɛ í sɔ̃ɔ í ni ku sinda ku lele inɛ akãi sooge mmu gɔ ŋa iyi à wa do cingaaɛ ŋa nɔ koo muu ku gba jĩnɛɛ ŋa. Amma Azaɛli í kɔ̀ ku sinda.

²² Nɔ Abinɛɛ í sisi í sɔ̃ Azaɛli má í ni, sinda hai bi tom. Maà jɔ̀ n kpaɛ. Bii ì jɔ̀ n kpaɛ, bɛirei an ce awaò igbãɛ Zoabu ka yɛ njɛ do inɔ didɔ̃ má.

²³ Amma Azaɛli í kɔ̀ ku sinda. Nɔ Abinɛɛ í sinda kakaɛ í sɔɔ do akpau si caaka nɔ í koo í fita do bũuɛ. Tengi bɛ mɔi í cuku í ku. Inɛ ŋa iyi à sɛi à to wa bɛ fei à ya leekĩi.

²⁴ Amma Zoabu do Abisai à wasi ku lele Abinɛɛ hee nunu í koo wa lɔò à bɛi à to geetei Ama iyi wa cɔ Gia do ikpa kpãai gbaai Gabaɔ̃ɔ.

²⁵ Ŋɔi soogei dimii Bɛnzamɛɛ ŋa à tɔtɔɔ bi Abinɛɛ nɔ à koo à gũ antaii geete mmu.

²⁶ Ŋɔi Abinɛɛ í kpe Zoabu í sɔ̃ɔ í ni, aa ka maa cafe njɛ taakubai hee nsɛi? I kù mà iyi iri ku kpaɛ á na ku jɛ inɔ kufɔ? Hee waati yoomai ì waa degbe i bɛi i sɔ̃ zamaaɛ ŋa i ni a jɔ̀ kpaasi nŋa ŋa ku lele.

²⁷ Nɔ Zoabu í ni, hee do Aɔ̃ fei, bii í jɛ i kù fɔ ide wo, zamaau ihɛ̃ kaa jɔ̀ kpaasiɛ ŋa ku lele hee iju koo máò.

²⁸ Nɔ Zoabu í fã kuu, ŋɔi zamaau fei í leekĩ, a kù waa lele inɛi Izirɛli ŋa má nɔ à kpa irii ijau.

²⁹ Ŋɔi Abinɛɛ do inɛɛ ŋa à waa nɛ hai idũu bɛ fei si bantumai Zuudɛ̃ɛu, nɔ à koo à kua Zuudɛ̃ɛu à to si inɔ Bitorɔ̃ɔ à bɛi à to Mahanaimu.

³⁰ Zoabu í baa kù waa lele Abinɛɛ má, ŋɔi í tɔtɔɔ zamaaɛ ŋau fei nɔ í ba wee í gaizia Azaɛli do amanɛ mɛɛwa do mɛɛsãi inɛi Davidi ŋa.

³¹ Amma inɛi Davidi ŋa à kpa amanɛ cĩɔ mɛɛta do kita (360) si dimii inɛi Bɛnzamɛɛ do si soogei Abinɛɛ ŋa.

³² Nɔ à so ikui Azaɛli à bɔò Betelehɛmu à koo à suu si inɔ balɛi baaɛ. Nɔ Zoabu do inɛɛ ŋa à waa nɛ hai idũu hee iju wa má à bɛi à to Eborɔ̃ɔ.