Samuɛli 2, 19 - Bibeli do fee

Inɔ kufɔi ilaalu Davidi

¹ Iyi ilaaluu í gbɔ ideu ŋɔi idɔɛ í dede, nɔ í bɔ ilaawa do lelei anu koofau wa kpata. Í nɛ wa niò, amam Abusalɔmu, amam, amam Abusalɔmu. Amui ǹ nɛ n ku si agbɛɛ wo. Abusalɔmu, amam, amam.

² Ŋɔi à koo à sɔ̃ Zoabu à ni, ilaaluu wee í dɔ̃ anu wa kpata na ikui Abusalɔmu.

³ Nɔ igũ iyi à jɛ ajɔ nŋu í sinda akũ si zamaau fei, domi ajɔ nŋu zamaau í gbɔ à ni inɔi ilaaluu í fɔ ntɔ ntɔ na ikui amaɛ.

⁴ Ajɔ nŋu bɛ mɔm, sooge ŋau à lɔ inɔ iluu wai do ku manji manji bɛi inɛ ŋa iyi à jɛ ŋa igũ à waa baaò anyɔ wa.

⁵ Ŋɔi ilaaluu í bii wajuɛ í dɔ̃ anu hee lele wa ni, amam Abusalɔmu, Abusalɔmu amam, amam.

⁶ Ŋɔi Zoabu í koo í lɔ ilaawa bii ilaaluu í wa nɔ í sɔ̃ɔ í ni, ì waa dasi soogeɛ ŋau fei anyɔ mbɛ nnyi, aŋa iyi à faaba kuwɛɛɛ do ti amaɛ ŋa do ti aboɛ ŋa fei.

⁷ Inɛ ŋa iyi à céɛ ŋai ì bi nɔ ì cé inɛ ŋa iyi à biɛ. Ì waa nyisi wa nnyi iyi soogeɛ ŋa do inɛ ngbo nŋa ŋa a kù jɛɛ nkãma, nɔ ǹ yɛ iyi á dɔ̃ɛ si mɔm wo bii í jɛ awa fei à ku nnyi, nɔ Abusalɔmu í fita si.

⁸ Na nŋu, dede i fita i koo i tũ inɔi soogeɛ ŋa. Bii ì nɔ ì kɔ̀ ku fita, do Aɔ̃ Lafɛ̃ɛ fei, baa akã nŋa kaa wa anyiɛ hai idũuyi. Nɔ laalɔ inɛ nŋu á re dimi baa yooma iyi í baɛ wa hai awaasũɛ hee ku naa nsɛi.

⁹ Ŋɔi ilaaluu í dede wa í naa í buba anu koofai iluu. Ŋɔi à jɔ̀ à koo à sɔ̃ zamaau fei à ni, ilaaluu wee í naa í buba andɛ koofai iluu. Nɔ zamaau fei í tɔtɔɔ wa si wajuɛ. Amma inɛi Izirɛli ŋau à sai hai bi ku ce igũu inɛ fei í nɛ ideɛ.

Davidi í ce sɔɔlu nŋu ku baa Zeruzalɛmu

¹⁰ Ŋɔi dimii inɛi Izirɛli ŋau fei à sɔ̃ njɛ à waa ni, Davidi í faaba wa hai si awɔi mbɛɛ nwa ŋa, nŋui í faaba wa hai si awɔi inɛi Filisi ŋa. Nɔ wee í sa í fita ilɛ nsɛi na irii Abusalɔmu.

¹¹ Abusalɔmu iyi à cica ku jɛ ilaalu nwa wee í ku tã si igũ. Bɛirei í ce a kù waa ce bɛi Davidi á ce ku baa.

¹² Ide iyi inɛi Izirɛli ŋau à waa fɔ fei wa to si Davidi. Ŋɔi Davidi í bɛ inɛ gɔ bi Sadɔku do Abiataa woo wee ŋau koo sɔ̃ ŋa ku ni, i kpe inɛ ngboi Zudaa ŋau i bee ŋa i ni ŋa, bɛirei í ce iŋɛ mɔ i kù ni a baam wa idem hee nsɛi ŋa.

¹³ Iŋɛ nyaanzem ŋai, awaò ŋɛ ŋa ara akãi, bɛirei í ce i kù ni n baa idem ŋa.

¹⁴ Nɔ Davidi í ni inɛɛu ku sɔ̃ Sadɔku do Abiataa má a bɔ bi Amasa a sɔ̃ɔ a ni, Davidi í ni, awɔ nyaanzem nii, awaɛ ara akãi. Ilaaɔ̃ ku kpãm iju iyi í re dimi baa yooma fei bii n kù coo inɛ ngboi sooge ŋau si agbɛi Zoabu.

¹⁵ Ŋɔi Davidi í sinda idɔi inɛi Zudaa ŋau fei si nŋu takaɛ bɛi idɔi inɛ akã. Nɔ à bɛ inɛ gɔ koo sɔ̃ɔ ku ni, baa wa awɔ do zamaaɛu fei.

¹⁶ Ŋɔi ilaaluu wa baa nɔ í to wa idoi Zuudɛ̃ɛ. Nɔ inɛi Zudaa ŋa à bɔ ku kòo Giligali ku ba a kuaɛò idou wa.

Davidi í kɔ̀ ku kpa Simei

¹⁷ Ŋɔi Simei amai Gera iyi í wa Bahurimu í ce gbãa gbãa í too inɛi Zudaa ŋau Davidi ku ko. Simeiu dimii Bɛnzamɛɛi.

¹⁸ Nɔ dimii Bɛnzamɛɛ dubu akã (1.000) wa tooɛ, do Siba woo ce icɛi kpasɛ̃i Sauluu do ama maatũɛ ŋa do woo ce icɛɛ ŋa aŋa kɔnfia. Ŋɔi à to idoi Zuudɛ̃ɛ hee Davidi ku maa kua wa.

¹⁹ Nɔ akɔi inyi iyi á so ilaalu nŋu do inɛi kpasɛ̃ɛ ŋa ku kuaò ŋa idou wa jilɛ bɛ. Waati iyi ilaaluu í to wa itĩi idou gbakã ŋɔi Simei í koo í sɛɛbata si wajuɛ.

²⁰ Nɔ í sɔ̃ɔ í ni, ilaalu lafɛ̃ɛm, maà mum do kuraram. Ilaalu lafɛ̃ɛm, gbɛjɛ taale iyi amu woo ce icɛɛ ǹ ceɛ ajɔ iyi ì waa fita hai inɔ ilu Zeruzalɛmuu. Jɔ̀ i kpa ideu.

²¹ Ǹ mà iyi ǹ ce kurara, amu woo ce icɛɛ, nɔ ǹ cuaa inɛi kpasɛ̃i Zozɛfu ŋau fei wa nnyi ǹ naa n kòɛ ilaalu lafɛ̃ɛm.

²² Ŋɔi Abisai amai Seruya í so ide í ni, Simei kù to iku si bɛi í ceekpe inɛ iyi Aɔ̃ Lafɛ̃ɛ í cica ba.

²³ Amma Davidi í ni, yoomai í kã ŋɛ, iŋɛ amai Seruya ŋa. Na mii í ce ì waa kakɔɔm nnyi ŋa. Á sĩa a kpa inɛ gɔ nnyi? Yooi kù mà iyi amui ǹ jɛ ilaalui inɛi Izirɛli ŋa nnyi.

²⁴ Ŋɔi í sinda si Simei í sɔ̃ɔ do kugbasi í ni, i kaa ku.

Davidi í dɛdɛ laakai ku sũ si afei nŋu do Mefibosɛti

²⁵ Mefibosɛti tɔkui Saulu mɔ í bɔ ilaaluu ku ko. Hai ajɔ iyi ilaaluu í fita hai Zeruzalɛmu, Mefibosɛti kù wiɛ kutɛɛ hee má jɛ ku ja agbãɛ walakɔ ku fɔ jĩnɛɛ ŋa hee ku baa ajɔ iyi ilaaluu wa baa do laakai ku sũ wa.

²⁶ Waati iyi í to bi ilaaluu ŋɔi ilaaluu í beeɛ í ni, Mefibosɛti, bɛirei í ce i kù toom wa wo.

²⁷ Ŋɔi í jɛaa í ni, Siba woo ce icɛm nii í lɛlɛm, domi amu woo ce icɛɛ ǹ ni an jɔ̀ a dĩa gbankɛlɛm gaayi si bɛi ǹ jɛ wɛɛgɛ nɔ n gũu n tooɛ wa.

²⁸ Amma woo ce icɛm nɔu í naa í bɛjɛm bi tɛɛ. Do nŋu fei, ǹ mà iyi awɔ ilaalu ì yɛi bɛi amalekai Ilaaɔ̃. Ce bɛi í sĩaɛ si,

²⁹ domi inɛi kpasɛ̃m ŋa fei à to a ku si wajui awɔ ilaalu. Nɔ do nŋu fei ì jɔ̀ ǹ wa si inɔi inɛ ŋa iyi ì waa wò si kpasɛ̃ɛ. To, mii an dɛdɛ siɛ má walakɔ n tɔɔɛ.

³⁰ Ŋɔi ilaaluu í jɛaa í ni, ka maà fɔ ide nkpɔ nkpɔ má. Ǹ dasi idɔ iyi awɔ do Sibai aa kpɛ̃ ilɛu ŋa.

³¹ Nɔ Mefibosɛti í sɔ̃ ilaaluu í ni, baa bii í so ndɛɛ fei mɔm, kù jɛɛm si ide kãma. Ǹ wɛɛò inɔ didɔ̃ si na iyi í jɔ̀ awɔ ilaalu lafɛ̃ɛm ì waa baa ide do laakai ku sũ.

Davidi í cea Baazilai amua

³² Baazilai inɛi Galaadi í naa hai Rogelimu koo leekĩa Davidi hee icei Zuudɛ̃ɛ.

³³ Baazilai í gbo ntɔ ntɔ, í nɛ adɔ̃ cinɛ. Í nɛ amani nla nla nɔ í wo ilaaluu do zamaaɛu waati iyi í wa Mahanaimu.

³⁴ Ŋɔi ilaaluu í sɔ̃ Baazilai í ni, toom wa n koo n wòɛ kpasɛ̃m Zeruzalɛmu.

³⁵ Amma Baazilai í jɛaa í ni, adɔ̃ fɛloi an wɛɛ má hee n ni n tooɛ Zeruzalɛmu.

³⁶ Adɔ̃ cinɛi ǹ nɛ ihɛ̃ nnyi. Iwoi an yɔkɔ n wũa mii jiida do laalɔ má. Iwoi amu woo ce icɛɛ an yɔkɔ n mà didɔ̃i mii iyi ǹ wa n jɛ walakɔ ǹ wa n mɔ. Iwoi an yɔkɔ n gbɔ imui woo kɔ̃ iri inaabo walakɔ inɛmɔkɔ ŋau má. Bɛirei an ce n koo n maa n jɛ asoɛ.

³⁷ An koo n leekĩɛi icei Zuudɛ̃ɛ nŋu akã. Na mii í ce ì waa bi i ceem jiida bɛɛbɛ.

³⁸ Jɔ̀ amu woo ce icɛɛ n sinda n nyi nɔ n koo n ku ilum bi balɛi baam do iyem. Amma an jɔ̀ Kimuhamu amam ku tooɛ nɔ i ceaa bɛi í sĩaɛ si.

³⁹ Ŋɔi ilaaluu í ni, Kimuhamu ku toom wa nɔ n ceaa bɛi ì bi. Mii iyi ì tɔɔm fei an ceaa.

⁴⁰ Waati iyi zamaau fei í kua Zuudɛ̃ɛu í tã, nɔ ilaaluu mɔ í kua wa, ŋɔi í koo í sakoo Baazilai í coo fɔɔ í weea. Nɔ Baazilai í sinda í bɔ ideɛ.

⁴¹ Ŋɔi ilaaluu í kã iri ikpa Giligali, nɔ Kimuhamu wa tooɛ. Do yaase bɛɛbɛi dimii Zudaa fei do inɛ mbɔi Izirɛli ŋau à ce à jɔ̀ ilaaluu í kua idoi Zuudɛ̃ɛu.

Inɛi Zudaa ŋa do inɛi Izirɛli ŋa à waa ce kakɔɔ

⁴² Si anyiɛ inɛi Izirɛli ŋau à koo à bee ilaaluu à ni, bɛirei í ce inɛi Zudaa kpaasi nwa ŋau à ce à jɔ̀ ì kua idoi Zuudɛ̃ɛu wa do asii, awɔ do inɛi kpasɛ̃ɛ ŋa do zamaaɛ fei.

⁴³ Ŋɔi inɛi Zudaa ŋau à jɛ nŋa à ni, si na iyi í jɔ̀ ilaaluu í jɛ dimi nwai. Na mii í ce idɔ nŋɛ wa kɔ̃. Ì waa tamaa bɛi si kũkũi bũui ilaaluui à waa jɛ ŋa ba. Mà í ce nwa amua gɔi ba.

⁴⁴ Nɔ inɛi Izirɛli ŋau à jɛ nŋa à ni, ilaaluu í jɛ tu wa zaka bɛɛbɛ ikɔ mɛɛwa, nɔ à nɔɔ í re ŋɛ mɔm. Na mii í ce ì donda wa ŋa. Awa sisi à tako à fɔ idei à baaò ilaaluu wa ba. Si kakɔɔ nŋa, inɛi Zudaa ŋau à fɔ ide do kugaabu à re inɛi Izirɛli ŋau.