Samuɛli 2, 18 - Bibeli do fee

À kãmia soogei Abusalɔmu ŋa

¹ Davidi í ka sooge ŋa iyi à wa anyiɛ, nɔ í jilɛ nŋa inɛ ngboi sooge dubu ŋa do ti cĩɔ ŋa.

² Í kpɛ̃ ŋa ikɔ mɛɛta, nɔ í so Zoabu ku jɛ inɛ ngboi ikɔ akã, akã mɔ Abisai ifɔi Zoabu, iyi í gbeu mɔ Itai inɛi Gatiu. Nɔ Davidi í ni, amu mɔ ǹ bi n bɔ igũ awaò ŋɛ ŋa.

³ Amma zamaau í ni, i kaa too wa, domi bii à na à koo à waa sa, awa sisi aa kãsi iju, nɔ baa bii à kpa bubui sooge ŋau, kaa dɔ̃ ŋa. Amma awɔ ì to amanɛ dubu mɛɛwa (10.000) nwa. Na nŋu, á sĩa i buba nɔ i maa sobi wa wa hai inɔ ilu.

⁴ Ŋɔi ilaaluu í jɛ nŋa í ni, an ce bɛi í sĩa nŋɛ si ŋa. Nɔ í koo í leekĩ anu koofai iluu wa cɔ bɛi sooge ŋau à waa fita aŋa dubu dubu ŋa do aŋa cĩɔ cĩɔ ŋa.

⁵ Ŋɔi ilaaluu í sɔ̃ Zoabu do Abisai do Itai í ni, bii ì bim ŋa, i ce laakai i maà kpa Abusalɔmu awaasũu ŋa. Nɔ inɛ ŋau fei à gbɔ ide iyi ilaaluu í sɔ̃ inɛ ngbo ŋau si gãmɛi Abusalɔmu.

⁶ Ŋɔi à fita à koo à ko inɛi Izirɛli ŋau. Nɔ à ce igũu inɔ agbo nlai Efaraimu.

⁷ Tengi bɛi soogei Davidi ŋa à jɛ inɛi Izirɛli ŋa igũ. Nɔ sooge dubu kɔnfia (20.000) í ku ajɔ nŋu.

⁸ Woo ce igũ ŋau à fangaai si inyau fei, nɔ akpɔi sooge ŋa iyi à ku si agbou í re baa iyi amanɛ ŋa à kpa si ijau.

Zoabu í kpa Abusalɔmu

⁹ Í na í to bii Abusalɔmu do soogei Davidi ŋa à koo à ko. Abusalɔmu wa sa do muleeɛ, ŋɔi muleeu í koo wa lɔ abɛ jĩi nla gɔ iyi amaawɔɛ ŋa à lɔ si njɛ. Ŋɔi ntoi irii Abusalɔmu í koo í gante si amaawɔi jĩi ŋau, nɔ wa zangala bɛ, mulee iyi wa gũu í sɛi í lɔ.

¹⁰ Ŋɔi inɛi Davidi gɔ í yɔɔ, nɔ í koo í sɔ̃ Zoabu í ni, wee ǹ yɛ Abusalɔmu í gante wa zangala si jĩi nla gɔ.

¹¹ Nɔ Zoabu í sɔ̃ inɛ iyi wa sɔ̃ɔ ideu í ni, iyi ì yɔɔ bɛirei í ce i kù kpaa bɛ gbakã. Bii í jɛ ì kpaa wo an naɛ fia kpɛkɛlɛ mɛɛwa do santiiki.

¹² Amma mɔkɔu í ni, bii í yɔkɔ ku jɛ fia kpɛkɛlɛ dubu akãi aa nam si awɔ, n kaa n lesi amai ilaaluu awɔ, domi awa fei à gbɔ ilaaluu í sɔ̃ awɔ do Abisai do Itai í ni, i ce laakai i maà kpa Abusalɔmu ŋa.

¹³ Nɔ baa bii í jɛ ǹ kpaa si n kù gbɔ ideu n taò hundem nii, nkãma kaa manjia ilaaluu, nɔ baa awɔ takaɛ aa yɛ taalem.

¹⁴ Ŋɔi Zoabu í jɛaa í ni, n kù nɛ n leekĩ n maa n gbɔɛ mɔm wo. Nɔ í so kaka mɛɛta í koo í ba Abusalɔmu njaawɛ si amaawɔi jĩi ŋau, í gũu kaka ŋau si akãaɛ.

¹⁵ Awaasũ mɛɛwa ŋa iyi à waa so jĩnɛi igũi Zoabu ŋau à kaako Abusalɔmu a tambɔɛ.

¹⁶ Ŋɔi Zoabu í jɔ̀ à fã kuu ku ba ku leekĩ igũu. Nɔ zamaau í sinda wa í jɔ̀ soogei Izirɛli ŋau ku lele.

¹⁷ Ŋɔi à so ikui Abusalɔmu à dasi isa nla nla gɔ si inɔ agbou. Nɔ à kosi kuta ŋa hee í kpante nla nla. Ŋɔi inɛi Izirɛli fei í sa í bɔ ideɛ.

¹⁸ Waati iyi Abusalɔmu í wɛɛ si hunde, í jilɛa araɛ kuta kugboka gɔ si lɔɔmai Ilaaluu domi í ni nŋu kù nɛ ama kãma iyi á jɔ̀ irii nŋu ku maa wɛɛ. Nɔ í na mii iyi í mau irii nŋu takaɛ. Nɔ à ya maa kpoo Kuta ku ye inɛ ŋa gigii Abusalɔmu hee ku baa nsɛi.

Davidi í gbɔ ikui Abusalɔmu amaɛ

¹⁹ Ŋɔi Ahimati amai Sadɔku í sɔ̃ Zoabu í ni, jɔ̀ n sɛi n koo n sɔ̃ ilaaluu laabaau jiidau n ni Aɔ̃ Lafɛ̃ɛ í ce í sĩa si na iyi í jɔ̀ í faabaɛ hai si awɔi mbɛɛɛ ŋa.

²⁰ Ŋɔi Zoabu í sɔ̃ɔ í ni, kù jɛ awɔi aa kooò laabaau ŋau ihɛ̃. Ajɔ mmui aa kooò, kù jɛ nnyi, domi amai ilaaluu í ku.

²¹ Ŋɔi Zoabu í sɔ̃ inɛi ilɛi Etiopi gɔ í ni, koo i sɔ̃ ilaaluu mii iyi ì yɛ fei. Ŋɔi inɛɛu í sɛɛbataa, nɔ í sɛi í koo.

²² Ŋɔi Ahimati amai Sadɔku í ni, dimi iyi wa jɛ fei, jɔ̀ amu mɔ n sɛi n too inɛi Etiopiu. Nɔ Zoabu í ni, na mii í ce ì waa yaya si ku koo amam. Baa bii ì sɛi ì koo jɔ̀ i mà iyi kaa nɛɛ aranfãani.

²³ Ŋɔi Ahimati í ni, dimi iyi á jɛ fei, jɔ̀ amu mɔ n sɛi n koo. Nɔ Zoabu í ni, sɛi i koo. Ŋɔi Ahimati í sɛi í too do kpãai lɔɔmau í cuaa inɛi Etiopiu.

²⁴ Davidi wa buba afei anu koofa minjii bindii iluu. Ŋɔi sooge gɔ í gũ antaii bindiu wa cɔ ilu. Nɔ í ba wee inɛ gɔ wa sɛi wa nŋu akã.

²⁵ Ŋɔi í dɔ̃ anu í sɔ̃ ilaaluu. Nɔ ilaaluu í ni, bii nŋu akãi, laabaau jiidai wa naaò wa. Nɔ inɛɛu wa maai wa.

²⁶ Ŋɔi soogeu í hɔ̃nnɛ inɛ mmu wa sɛi wa má. Ŋɔi í dɔ̃ anu í sɔ̃ woo degbe anu koofai bindiu í ni, inɛ gɔ wee wa sɛi wa má nŋu akã. Nɔ ilaaluu í ni, laabaau jiidai nŋu mɔ wa naaò wa.

²⁷ Ŋɔi soogeu í ni, arei inɛ sinteu í jɔ ti Ahimati amai Sadɔku. Nɔ ilaaluu í ni, inɛ jiidai, nɔ laabaau jiidai á jɛ wa naaò wa.

²⁸ Ŋɔi Ahimati í dɔ̃ anu í sɔ̃ ilaaluu í ni, mii fei wa nɛ dee dee. Nɔ í sɛɛbata si wajui ilaaluu í ni, ka saabu Aɔ̃ Lafɛ̃ɛɛ si bɛi í kãmia inɛ ŋa iyi à waa dɛdɛ ilaalu lafɛ̃ɛm.

²⁹ Ŋɔi ilaaluu í beeɛ í ni, Abusalɔmu ama awaasũu wa nɛ baani? Nɔ Ahimati í jɛaa í ni, waati iyi Zoabu í bɛ awa woo ce icɛɛ ŋa wa, ǹ gbɔ gidi nla nla gɔ í dede, amma n kù mà mii í ce.

³⁰ Ŋɔi ilaaluu í ni, leekĩ do cingaa bɛ. Nɔ Ahimati í fa araɛ do cingaa akã.

³¹ Gbakã ŋɔi inɛi Etiopiu í to wa. Nɔ í ni, ilaalu lafɛ̃ɛm ku sotĩ ku gbɔ laabaau jiidau ihɛ̃. Nnyi Aɔ̃ Lafɛ̃ɛ í ceɛ asaiya si bɛi í nyaɛ hai si awɔi inɛ ŋa iyi à waa dɛdɛɛ fei.

³² Ŋɔi ilaaluu í beeɛ í ni, Abusalɔmu ama awaasũu wa nɛ baani? Nɔ inɛi Etiopiu í jɛaa í ni, mii iyi í ba ama awaasũu bɛ, ku ba mbɛɛi ilaalu ŋau do inɛ ŋa iyi à dede à waa dɛ laalɔɛ fei.