Samuɛli 2, 17 - Bibeli do fee

Usai í na Abusalɔmu ikɔ laalɔ

¹ Ŋɔi Ahitofɛli í sɔ̃ Abusalɔmu í ni, jɔ̀ n so sooge dubu maateeji (12.000) n leleò Davidi idũuyi mɔm.

² An koo n boeɛ waati iyi á gbɛɛji nɔ kaa nɛ gbugbã. An lɛlɛɛ nɔ zamaa iyi í wa bi tɛɛu fei ku sa. Nŋu akãi an kpa,

³ nɔ n baaò zamaau fei wa bi tɛɛ ihɛ̃. Bii inɛ iyi ì waa dɛdɛu í ku, aŋa fei aa sinda a baa nɔ zamaau fei á nɛ laakai ku sũ.

⁴ Ŋɔi ideu í ye Abusalɔmu do inɛ ngboi Izirɛli ŋau fei.

⁵ Do nŋu fei Abusalɔmu í ni a kpe Usai inɛi Aakiu wa nŋu ku gbɔ bɛi nŋu mɔ á fɔ.

⁶ Usai í naa bi Abusalɔmu, nɔ Abusalɔmu í sɔ̃ɔ bɛi Ahitofɛli í fɔ. Nɔ í ni, ka ce bɛi í fɔu de mà ka jɔ̀ɔ. Fɔ tɛɛ wa.

⁷ Ŋɔi Usai í jɛa Abusalɔmu í ni, si tuuba iyi ihɛ̃, ikɔi Ahitofɛliu kù sĩa.

⁸ Awɔ takaɛ ì mà wɔɔkɔi baaɛ do soogeɛ ŋa. Ì mà iyi idɔɔkɔ̃ nla nlai á wɛɛò bɛi muusu nla iyi à so amaɛ ŋa siɛ inɔ sako. Baaɛ woo ja igũi. Kaa sũ inya akã do zamaau.

⁹ Nsɛi á wa inɔ isa gɔ wa ku maa manji, walakɔ inya mmu bii gɔ. Nɔ baa bii inɛ akãi à ba à kpa si wa hai sintei igũu gbakã, kaa kpɛ laabaauɛ ku ta a ni, à jɛ inɛi Abusalɔmu ŋa igũ.

¹⁰ Waati nŋu, baa ilu wɔɔkɔ iyi idɔɛ í ya buba bɛi muusu nla, zigiɛ á da, domi inɛi Izirɛli fei í mà baaɛ woo ja igũi nɔ ilu wɔɔkɔ ŋa à wa bi tɛɛ.

¹¹ Na nŋu amu ǹ bii inɛi Izirɛli fei ku tɔtɔɔ wa bi tɛɛ ihɛ̃, hai Dãa wa hee ku bɔ Bɛɛseba, a kpɔ bɛi sãai itĩ tenku, nɔ awɔ takaɛ i bɔ igũu.

¹² Do yaase bɛɛbɛ, aa ka to siɛ tengi bii í waò fei, nɔ ka bii siɛ bɛi ikpã í ya wɔ si ilɛ, nɔ baa inɛ akã nŋa kaa fita si, hai nŋu takaɛ hee do inɛ ŋa iyi à wa bi tɛɛu fei.

¹³ Bii í koo í manji ilu gɔi, soogei Izirɛli ŋau fei aa dɛdɛ ikũ ku nɛ kootia ŋai a faaò bindii iluu a nɛò hee acãi inyi gɔ. Nɔ a kaa jɔ̀ baa kuta akã ku gbe si iluu.

¹⁴ Ŋɔi Abusalɔmu do inɛi Izirɛli ŋau fei à ni, ikɔi Usai inɛi Aakiu í tia ti Ahitofɛli. Wee Aɔ̃ Lafɛ̃ɛ í jilɛ si nŋu ku kpa ikɔ jiidai Ahitofɛliu ku ba ku naaò laalɔ wa si Abusalɔmu.

Davidi í kua Zuudɛ̃ɛ wa saa Abusalɔmu

¹⁵ Ŋɔi Usai í koo í sɔ̃ Sadɔku do Abiataa woo wee ŋau bɛi Ahitofɛli í ni Abusalɔmu do inɛ ngboi Izirɛli ŋau a ce do bɛi nŋu mɔ nŋu í ni a ce.

¹⁶ Nɔ í sɔ̃ ŋa í ni, na nŋu, i bɛ ama nsɛi nsɛi ŋa koo sɔ̃ Davidi ku ni ku maà na ku sũ si lɔɔmai gbaa ŋau. Amma ku kua idoi Zuudɛ̃ɛu, ku ba nŋu do inɛ ŋa iyi à wa bi tɛɛ a maà ce nfe.

¹⁷ Ŋɔi Zonatãa do Ahimati à wa Eni-Rogɛli. A ci ya lɔ inɔ ilu Zeruzalɛmu domi à waa ce njo inɛ ŋa a maà na a yɛ aŋa. Ŋɔi Sadɔku do Abiataa à bɛ abo a ce icɛ gɔ koo sɔ̃ ŋa ideu nɔ aŋa mɔ a koo a sɔ̃ Davidi.

¹⁸ Amma awaasũ gɔ í hɔ̃nnɛ ŋa nɔ í koo í sɔ̃ Abusalɔmu. Ŋɔi à dede à hanya à nɛ, nɔ à to Bahurimu si inɔ kpasɛ̃i mɔkɔ gɔ bii lɔgɔ í wa si bantumai kpasɛ̃u. Nɔ à lɔ inɔ lɔgɔu.

¹⁹ Ŋɔi aboi mɔkɔu í dɛdɛ acɔ í tɔɔ si andɛi lɔgɔu í bɛi í tɛ amaajɛ ku cɔcɔ si antaiɛi ku ba inɛ gɔ ku maà sikaò ide gɔ.

²⁰ Ŋɔi woo ce icɛi Abusalɔmu ŋa à koo à lɔ inɔ kpasɛ̃ bi abou à beeɛ à ni, iwoi Zonatãa do Ahimati à wa. Ŋɔi abou í jɛ nŋa í ni, ngu ŋa à kua idou. Ŋɔi à dɛdɛ ŋa, amma a kù yɛ ŋa nɔ à sinda à nyi Zeruzalɛmu.

²¹ Iyi inɛ ŋau à nɛ, ŋɔi Ahimati do Zonatãa à fita wa hai inɔ lɔgɔu à koo à sɔ̃ ilaalu Davidi à ni, i dede i kua idou ńya ńya, domi Ahitofɛli í na ikɔ wa a naa a zamba ŋɛ.

²² Ŋɔi Davidi do zamaa iyi í wa bi tɛɛu fei à dede à kua idoi Zuudɛ̃ɛu, inɛ baa akã kù gbe hee iju ku maa má.

²³ Iyi Ahitofɛli í yɛ a kù ceò ikɔi nŋu icɛ, ŋɔi í dĩa gbankɛlɛɛ gaayi í nɛ ideɛ. Nɔ í koo í jɔ̀ɔa inɛi kpasɛ̃ɛ ŋa ideɛ ŋa iyi í nɛ, í bɛi í koo í bagãm araɛ. Ŋɔi à suu inɔ balɛi baaɛ.

Davidi í to Mahanaimu

²⁴ Davidi í to Mahanaimu. Nɔ Abusalɔmu í kua idoi Zuudɛ̃ɛu wa nŋu do soogei Izirɛli ŋau fei.

²⁵ Abusalɔmu í so Amasa inɛ ngboi soogeɛ ŋa í sãsi agbɛi Zoabu. Amasa amai mɔkɔ gɔi iyi à ya kpe Yitira inɛi Izirɛli. Nŋui í so Abigali ifɔi Seruya amai Nahasi abo. Seruya mɔ iyei Zoabui.

²⁶ Ŋɔi Abusalɔmu do soogei Izirɛli ŋau à koo à ce asɔ si ilɛi Galaadi.

²⁷ Waati iyi Davidi í to Mahanaimu, ŋɔi Sobi amai Nahasi inɛi Raba si dimii Amɔɔ ŋa do Makii amai Amiɛli inɛi Lo-Dabaa do Baazilai inɛi Rogelimu si ilɛi Galaadi [à gbaa do inɔ didɔ̃.

²⁸ Nɔ] à muaa sɛ̃ɛ do acɔ ku bii ŋa wa, do nantaa ŋa do jɛɛi adɛ̃ ŋa do sɔnda dimi ikã ikã ŋa, hai bilee do ɔɔzu do iyafũ do ngboi amaajɛ ku sɔ̃ ŋa, do ilege ŋa do lantii ŋa

²⁹ do nyikɔ̃ do ikpo do angudã ŋa do waagasi. À kooa Davidi do zamaa iyi í wa bi tɛɛu mii ŋau a jɛ, domi à waa ni, zamaau í wahala wa do ari do gbɛɛji do agbɛ si gbaau.