Samuɛli 2, 16 - Bibeli do fee

Davidi í ko Siba woo ce icɛi Mefibosɛti

¹ Waati iyi Davidi í kua antaii iri kutau keeke, ŋɔi í ba wee Siba woo ce icɛi Mefibosɛti wa kòo wa do gbankɛlɛ minji iyi à dĩa gaayi. Gbankɛlɛ ŋau à waa so pɛ̃ɛ cĩɔ minji do rezɛ̃ɛ ngbɛ saa cĩɔ do figi iso cĩɔ do vɛ̃ɛ jɔlɔ akã.

² Ŋɔi Davidi í bee Siba í ni, mii ì waa ceò mii ŋau ihɛ̃. Nɔ í jɛaa í ni, ǹ naaò gbankɛlɛ ŋau wai ku ba inɛi kpasɛ̃ɛ ŋa a gũ ŋa. Pɛ̃ɛ do isoi rezɛ̃ɛ ŋau mɔ sɔndai awaasũɛ ŋai, nɔ inɛ ŋa iyi aa koo a gbɛɛji si gbaau a ya nya agbɛ do vɛ̃ɛu.

³ Ŋɔi ilaaluu í beeɛ má í ni, nɔ hee iwoi tɔkui Saulu mɛɛtuɛu í wa. Ŋɔi í jɛaa í ni, í wa Zeruzalɛmu, domi wa tamaa bɛi inɛi Izirɛli ŋa aa sindoa nŋu bommai baai nŋui.

⁴ Ŋɔi ilaaluu í sɔ̃ Siba í ni, mii iyi Mefibosɛti í nɛ fei, awɔi aa nɔɔ hai nnyi. Nɔ Siba í ni, ǹ sɛɛbata. Jɔ̀ n ba didɔ̃ɛ awɔ ilaalu lafɛ̃ɛm.

Simei nyaanzei Saulu í ceekpe Davidi

⁵ Ŋɔi Davidi í nɛ í to hee Bahurimu. Nɔ nyaanzei Saulu gɔ í fita wa hai bɛ, à ya kpoo Simei amai Gera. Wa ceekpe Davidi

⁶ nɔ wa taa kuta, nŋu do akaweɛ ŋa, baa do iyi soogei Davidi ŋa à wa canga do njɛɛ fei.

⁷ Í buui wa ni, koo i nɛ, koo i nɛ, awɔ woo kpa inɛ, ilu inɔ kukã gɔ.

⁸ Aɔ̃ Lafɛ̃ɛi wa sãsiɛ gbesei inɛi kpasɛ̃i Saulu ŋa iyi ì kpau fei ì gbaò bommaɛ, nɔ Aɔ̃ Lafɛ̃ɛ í so bommau í daa Abusalɔmu amaɛu si awɔ. Awɔ wee do inɔ kufɔ bɛi í sĩa ku baɛ, domi awɔ woo kpa inɛi.

⁹ Ŋɔi Abisai amai Seruya í sɔ̃ Davidi í ni, na mii í ce aja ikuu ihɔ̃ wa bu awɔ ilaalu lafɛ̃ɛm. Ǹ wa n tɔɔɛi, jɔ̀ n koo n bu iriɛ wa.

¹⁰ Amma Davidi í jɛaa í ni, ide iyi bɛ kù kã ŋɛ iŋɛ amai Seruya ŋa. Bii í jɛ Aɔ̃ Lafɛ̃ɛi í ni ku bum, yooi á sɔ̃ɔ ku ni, na mii í jɔ̀ ì waa ce bɛɛbɛ.

¹¹ Ŋɔi Davidi í sɔ̃ Abisai do soogeɛ ŋa fei í ni, ama iyi amu takam ǹ bí wee wa dɛdɛ ku kpam, aa fɔ idei inɛi dimii Bɛnzamɛɛu ihɛ̃ má ba. I jɔ̀ ku bum, domi Aɔ̃ Lafɛ̃ɛi í sɔ̃ɔ wa.

¹² Á yɔkɔ ku jɛ Aɔ̃ Lafɛ̃ɛ á yɛ wahalam nɔ ku sãam jiida si agbɛi arabui nnyim nɔu ihɛ̃.

¹³ Ŋɔi Davidi do inɛɛ ŋa à mɔsi isɛɛnɛ nŋa à waa koo. Nɔ Simei mɔ wa too cingaai iri kuta gɔ, í nɛ wa taaò kuta nɔ í wasi ku buu wa fã siɛ sãa.

¹⁴ Ŋɔi ilaalu Davidi do inɛɛ ŋau fei à to idoi Zuudɛ̃ɛ do gbɛɛji ntɔ ntɔ, nɔ à sĩmi bɛ.

Usai í nyi bi Abusalɔmu

¹⁵ Ŋɔi Abusalɔmu do inɛi Izirɛli ŋa iyi à wa anyiɛ ŋau fei à lɔ inɔ ilu Zeruzalɛmu. Nɔ Ahitofɛli í wa bi Abusalɔmu bɛ.

¹⁶ Iyi Usai kpaasii Davidi, inɛi Aakiu í to bi Abusalɔmu, ŋɔi í sɔ̃ɔ í ni, Ilaaɔ̃ ku jɔ̀ hundeɛ ku sɔ, ilaalu. Ilaaɔ̃ ku jɔ̀ hundeɛ ku sɔ.

¹⁷ Ŋɔi Abusalɔmu í beeɛ í ni, bɛɛbɛi aa nyisiò iyi awɔ kpaasi jiidai Davidi bɛ? Bɛirei í ce i kù tooɛ.

¹⁸ Ŋɔi Usai í jɛaa í ni, ǹ bi n wa anyii inɛ iyi Aɔ̃ Lafɛ̃ɛ do zamaai Izirɛli fei í soi, bi lafɛ̃ɛi ǹ bi n wa.

¹⁹ Mà yooi an cea icɛ má, bii kù jɛ awɔ amai Davidi. An ceɛ icɛi bɛi ǹ tako ǹ wa n cea baaɛ icɛ.

Abusalɔmu do aboi Davidi ŋa

²⁰ Ŋɔi Abusalɔmu í sɔ̃ Ahitofɛli í ni, i koo i busi njɛ wa ŋa, bɛirei aa ka ce.

²¹ Ŋɔi Ahitofɛli í ni, koo i sũò aboi baaɛ ŋa iyi í jɔ̀ a maa degbea nŋu kpasɛ̃ɛ. Bii ì ce bɛɛbɛ, inɛi Izirɛli fei á mà iyi ì donda baaɛ, nɔ inɛ ŋa iyi à wa bi tɛɛ fei aa ba gbugbã.

²² Ŋɔi à gũa Abusalɔmu ilei acɔ si antaii ile sikifa, nɔ í koo í sũò aboi baaɛ ŋau si wajui inɛi Izirɛli ŋau fei.

²³ Waati bɛɛbɛ wee ikɔ iyi Ahitofɛli í na fei í ya nɛ gbugbãi bɛi idei Ilaaɔ̃ takaɛ. Nɔ bɛi Davidi í ya tako ku maa ceò ŋa icɛu bɛɛbɛi Abusalɔmu mɔ í ya maa ceò ikɔɛ ŋau fei icɛ.