Samuɛli 2, 15 - Bibeli do fee

Abusalɔmu í dɛ bommau ku gba

¹ Si anyiɛ, ŋɔi Abusalɔmu í dɛdɛ sarɛti akã do acĩ ŋa ti nŋu takaɛ. Nɔ í dɛdɛ inɛmɔkɔ ciitaa iyi aa ya maa cuaa bii wa bɔ.

² Daadaakɔ í ya dedei ku bɔ itĩ kpãa anu koofai iluu. Bii inɛ gɔ wa bɔò ide gɔ kiiti bi ilaaluu, Abusalɔmu í ya kpooi nɔ ku beeɛ ku ni, awɔ inɛi ilu iwoi. Bii inɛɛu í jɛaa í ni, amu dimii Izirɛli kasai lafɛ̃ɛm,

³ Abusalɔmu í ya sɔ̃ɔi ku ni, cɔ, ideɛ í nɛ ntɔ. Amma inɛ kãma kaa gbɔɛ bii ì bɔò bi ilaaluu.

⁴ Bii amui à jilɛ woo kiiti si ilɛu wo, inɛ iyi í nɛ taale do inɛ gɔ walakɔ kakɔɔ si ide gɔ, an ya kiiti nŋai dee dee bii à toò wa bi tom.

⁵ Inɛ iyi í naa bi tɛɛ bɛ fei í ya sɛɛbataai, nɔ í ya yɔ awɔi ku dede inɛɛu ku sakooɛ.

⁶ Nɔ bɛɛbɛi Abusalɔmu wa cea inɛi Izirɛli ŋa iyi à waa bɔ kiiti bi ilaaluu fei. Nɔ wa sinda idɔ nŋa fei wa si nŋu takaɛ.

⁷ Iyi í ce adɔ̃ mɛɛ, ŋɔi Abusalɔmu í sɔ̃ ilaaluu í ni, jɔ̀ n bɔ Eborɔ̃ɔ n koo n kɔ̃ kuwã iyi ǹ cea Aɔ̃ Lafɛ̃ɛ,

⁸ domi waati iyi ǹ wa Gɛsuu si ilɛi Siri, ǹ ce kuwã ǹ ni, bii Aɔ̃ Lafɛ̃ɛ í baam wa Zeruzalɛmu, an ceaa kuweei.

⁹ Ŋɔi ilaaluu í jɛaa í ni, koò gomi. Nɔ Abusalɔmu í dasi kpãa í bɔ Eborɔ̃ɔ.

¹⁰ Ŋɔi í bɛ inɛ ŋa bi dimii Izirɛli ŋau fei a sɔ̃ ŋa a ni, bii ì gbɔ à fã kuu ŋa, i ya ni ŋa, Abusalɔmu í jɛ bomma Eborɔ̃ɔ.

¹¹ Amanɛ cĩɔ minjii Abusalɔmu í gbã hai Zeruzalɛmu aŋaò ŋa à koo. À waa nɛi do Abusalɔmu a kù mà nkãma si ideu.

¹² Waati iyi Abusalɔmu wa ce kuwee ŋau, ŋɔi í bɛ inɛ gɔ koo kpe Ahitofɛli woo kɔ Davidiu wa hai Gilo. Ŋɔi inɛ ŋa iyi aŋaò ŋa à waa ce sɔɔlui zambau à waa ba gbugbã nɔ à kpɔ à wasi ku kɔ̃ɔsi.

Davidi í sa hai Zeruzalɛmu

¹³ Ŋɔi inɛ gɔ í naa í sɔ̃ Davidi í ni, idɔi inɛi Izirɛli ŋa í sinda si Abusalɔmu.

¹⁴ Nɔ Davidi í sɔ̃ akaweɛ ŋa iyi à wa bi tɛɛu fei í ni, i dede ka sa ŋa, domi Abusalɔmu á na ku kpa wa. I ce ńya ka nɛ ŋa, bii kù jɛ bɛɛbɛ á na ku ba wa kaa kpɛ. Á ce nfe nwa nɔ ku kpa inɛi inɔ ilu ŋau fei.

¹⁵ Ŋɔi akaweɛ ŋau à sɔ̃ɔ à ni, aa ka ce bɛi ì ni fei ilaalu.

¹⁶ Ŋɔi Davidi í fita wa nɛ nɔ inɛi kpasɛ̃ɛ ŋa fei à waa tooɛ. Nɔ si aboɛ ŋa iyi í nɛu, abo mɛɛwai í jɔ̀ bɛ a maa degbe ide.

¹⁷ Waati iyi Davidi do inɛɛ ŋau fei à fita à waa nɛ ŋɔi à koo à leekĩ bi ile ankãanyii iluu.

¹⁸ Ŋɔi woo ce icɛɛ ŋau fei do inɛi Kerɛti ŋa fei do inɛi Pelɛti ŋa fei iyi à waa tooɛ, aŋa do soogei Gati cĩɔ mɛɛfa ŋau fei à lɔ do wajuɛ. Soogei Gati ŋau sooge inɛ njoo ŋai iyi à naa Davidi ku cea icɛ hai Gati.

¹⁹ Ŋɔi ilaaluu í sɔ̃ Itai inɛi Gatiu í ni, bɛirei í ce awɔ mɔ ì waa bi i too wa. Sinda i nyi i koo i wa bi ilaalu Abusalɔmu, domi awɔ inɛ njooi iyi à lele wa.

²⁰ Ì to wa bi tom ihɛ̃ kù kpɛ. N kaa n jɔ̀ i dabii do awa bii fei. Nɔ mɔm n kù mà baa bii ǹ wa n bɔ. Sinda i nyi awɔ do inɛɛ ŋa. Aɔ̃ Lafɛ̃ɛ ku sãɛ jiida ku jɛɛ do dee dee ku jɛɛ.

²¹ Ŋɔi Itai í jɛaa í ni, do irii Aɔ̃ Lafɛ̃ɛ hee do ti awɔ ilaalu lafɛ̃ɛm, tengi bii aa wa fei, bii í jɛ ti ikui walakɔ ti kuwɛɛi, tengi bɛi amu mɔ an wa.

²² Ŋɔi Davidi í jɛaa í ni, í sĩa. Lɔ ka nɛ. Ŋɔi Itai í lɔ nŋu do inɛɛ ŋa do amu ŋa iyi à wa bi tɛɛ fei.

²³ Waati iyi Davidi do inɛɛ ŋa fei à waa lɔ, inɛ ŋa iyi à yɛ ŋa fei à kpata à waa dɔ̃ anu nla nla. Ŋɔi Davidi í koo í kua idoi Sedorɔ̃ɔ, nɔ zamaau fei í kua suusuui kpãa ku bɔ gbaau.

²⁴ Sadɔku do Abiataa woo wee ŋau mɔ à wa bɛ do dimii Levii ŋa fei, aŋai à waa so kpakoi akabuui Ilaaɔ̃u. Ŋɔi à koo à jilɛ kpakou hee zamaau fei í koo í fita hai inɔ iluu í tã.

²⁵ Ŋɔi Davidi í sɔ̃ Sadɔku í ni, koo sindo kpakoi Ilaaɔ̃u inɔ ilu. Bii Aɔ̃ Lafɛ̃ɛ í ce araarem, á baam wa, nɔ n naa n yɛ kpakou í wa bi kuwaɛ.

²⁶ Amma bii í ni nŋu kù nɛ inɔ didɔ̃ sim mái, ku ceem bɛi í bi.

²⁷ Nɔ í nyi í sɔ̃ Sadɔku woo weeu má í ni, ì gbɔ? Sinda i nyi inɔ iluu do laakai ku sũ, awɔ do Ahimati amaɛ do Zonatãa amai Abiataa do Abiataa takaɛ.

²⁸ An koo n wa si lɔɔmai gbaa ŋau n maa n letĩ laabaau ŋa wa hai bi tu ŋɛ.

²⁹ Bɛɛbɛi Sadɔku do Abiataa à nyiò kpakoi Ilaaɔ̃u inɔ ilu Zeruzalɛmu nɔ à wa bɛ.

Davidi í jɔ̀ à waa kɛɛma Abusalɔmu

³⁰ Ŋɔi Davidi wa gũ geetei Olivie do kukpata. Í wo iriɛ nɔ wa nɛ isɛ ngbɛ. Nɔ inɛ ŋa iyi à waa tooɛ fei à wo iri nŋa ŋa à waa gũò iri kutau do kukpata.

³¹ Ŋɔi à naa à sɔ̃ Davidi à ni, Ahitofɛli í wa bi Abusalɔmu si inɔi inɛ ŋa iyi à jɛ woo zamba ŋau. Ŋɔi Davidi í ce kutɔɔ í ni, Aɔ̃ Lafɛ̃ɛ ku ce nfei ikɔi Ahitofɛli ŋau.

³² Waati iyi í to antaii iri kutau, tengi bii inɛ ŋa à ya tɔɔ Ilaaɔ̃, ŋɔi Usai inɛi Aakiu wa kòo wa do ibɔ ku ga nɔ í kosi iriɛ sãa.

³³ Ŋɔi Davidi í sɔ̃ɔ í ni, bii ì toom wa, aa na i jɛ asom.

³⁴ Amma aa yɔkɔ i nyi inɔ ilu i ganji a ceò ikɔi Ahitofɛli icɛ na irim. Koo i ba Abusalɔmu i ni, ilaalu an jɛ woo ce icɛɛ. Ǹ tako ǹ jɛ woo ce icɛi baaɛ Davidi, amma bɛbɛi woo ce icɛɛi ǹ jɛ.

³⁵ Sadɔku do Abiataa woo wee ŋau à wa bɛ, aa wa anyiɛ. Ide iyi ì gbɔ hai kpasɛ̃i ilaaluu wa fei, i ya koo i sɔ̃ ŋa.

³⁶ Nɔ si bɛi ama minji nŋa ŋau à wa bi tu ŋa bɛ, waatɔ Ahimati amai Sadɔku do Zonatãa amai Abiataa, aŋai aa ya bɛ wa a na a sɔ̃m mii iyi ì gbɔ fei.

³⁷ Ŋɔi Usai kpaasii Davidiu í nyi inɔ iluu waati iyi Abusalɔmu wa to bɛ.