Samuɛli 2, 14 - Bibeli do fee

Abusalɔmu í baa kpasɛ̃

¹ Ŋɔi Zoabu í yɛ iyi idɔi Davidi í nyi wa si Abusalɔmu.

² Ŋɔi í bɛ inɛ gɔ Tekoa í ni koo kpea nŋu abo ilu bisiu wa. Iyi abou í to wa nɔ í sɔ̃ɔ í ni, ce bɛi inɛ iyi inɔɛ í fɔ, dasi jĩnɛi akũ ŋa, maà ti i jɔ ikpo, nɔ i ce bɛi abo iyi wa kpata akũ gɔ hai ku kpɛ wa.

³ Nɔ i bɔ bi ilaaluu i koo i sɔ̃ɔ ide iyi an sɔ̃ɛ fei. Ŋɔi Zoabu í sɔ̃ɔ ide ŋa iyi á fɔ fei.

⁴ Nɔ abou í bɔ ideu ku sɔ̃ ilaaluu. Ŋɔi í koo í sɛɛbata í ni, faabam ilaalu.

⁵ Ŋɔi ilaaluu í beeɛ í ni, mii wa ceɛ. Nɔ í jɛaa í ni, amu jaaɔ̃i. Mɔkɔm kù wɛɛ.

⁶ Ǹ nɛ ama inɛmɔkɔ minji. Ŋɔi à waa ja iko, inɛ kãma kù wa bɛ hee ku la ŋa. Nɔ inɛ akã í cã kpaasiɛ í kpaa.

⁷ Ŋɔi inɛi kpasɛ̃ ŋau fei à dede sim à ni, naaò woo kpa kpaasiɛu wa. Awa mɔ aa ka kpaai, si na iyi í jɔ̀ í kpa inɛ akãɛ, ka sãa gbeseɛ. Nŋu iyi á jɛ tubuui à bi ka kpa mɔm. Anu sɔmbɔ akã iyi í gbeem nɔui à waa bi ku kpa bɛ. Do yaase bɛɛbɛ, a kaa jɔ̀a mɔkɔm iri kãma si ilɛ ihɛ̃ hee má jɛ amanɛ.

⁸ Ŋɔi ilaaluu í sɔ̃ abou í ni, koo i bɔ ide, an jɔ̀ woo ce icɛm ŋa a na a wũa ideu.

⁹ Ŋɔi abou í jɛaa í ni, bii í jɛ aa yɛ taalei inɛ gɔi, a yɛ taalei amu do inɛi kpasɛ̃i baam ŋa, ku maà ti ku jɛ awɔ do bommaɛ.

¹⁰ Nɔ ilaaluu í ni, bii inɛ gɔ í gbagba siɛ, naaò lafɛ̃ɛ wa bi tom, nɔ lafɛ̃ɛu kaa ba ku lesiɛ awɔ má.

¹¹ Ŋɔi abou í ni, jɔ̀ i cɔ Aɔ̃ Lafɛ̃ɛɛ ku ba woo sã gbesei ikui amam nɔu ku maà na ku kɔ̃ɔsi asɔɔ má a kpaò amam. Nɔ ilaaluu í ni, do irii Aɔ̃ Lafɛ̃ɛ fei, a kaa kpa amaɛ.

¹² Ŋɔi abou í ni, ǹ wa n tɔɔɛi, jɔ̀ n fɔ ide akã má. Nɔ í ni, fɔ wa.

¹³ Ŋɔi abou í ni, na mii í ce ì waa cea inɛi Ilaaɔ̃ ŋau bɛɛbɛ. Í jɔ bɛi ì jɛ ilu taale si ide ku fɔɛ, domi awɔi ì waa kɔ̀ inɛ iyi ì leleu ku baa.

¹⁴ Do ntɔ, awa fei aa ka ku, nɔ aa ka yɛ bɛi inyi iyi à dikã nɔ kaa ce a koo má. Amma Ilaaɔ̃ kù bi inɛɛu ku ku titã. Í bi ku baai hai bii wa manjiu ku naa ku wa kɔkɔi nŋu.

¹⁵ Nsɛi amu woo ce icɛɛ, bii ì yɛ ǹ naa ide ŋau ihɛ̃ ku sɔ̃ɛ, inɛ ŋai à jɔ̀ zigim í da. Nɔ ǹ ni an na n sɔ̃ɛ, á yɔkɔ ku jɛ aa ce bɛi ǹ ni,

¹⁶ nɔ i faabam hai si awɔi inɛ ŋa iyi à waa bi a kpa amu do amam a kɔ̀ wa tubui ilɛ iyi Ilaaɔ̃ í na inɛɛ ŋau.

¹⁷ Na ŋɔi í ce ǹ ni ide iyi aa fɔi á tũ idɔm, domi ì yɛi bɛi amalekai Ilaaɔ̃. Ì mà jiida do laalɔ ku wũa. Nɔ Aɔ̃ Lafɛ̃ɛɛ ku wɛɛ do awɔ.

¹⁸ Ŋɔi ilaaluu í jɛa abou í ni, maà singaam ide iyi an beeɛ nsɛi. Nɔ abou í ni, fɔ wa ilaalu lafɛ̃ɛm.

¹⁹ Ŋɔi ilaaluu í ni, Zoabu si í talesiɛ ideu ihɛ̃ fei wa ya. Nɔ abou í jɛ í ni, ntɔi, ilaalu lafɛ̃ɛm. Hee do kuwɛɛɛ fei, kãmaɛ kù ce awɔ anyi. Do ntɔ, woo ce icɛɛ Zoabui í sɔ̃m ide ŋau fei wa í ni n naa n fɔɔ.

²⁰ Zoabu í ce bɛɛbɛi ku ba ideu ku teese. Amma awɔ ilaalu lafɛ̃ɛm ì nɛ laakai bɛi amalekai Ilaaɔ̃ nɔ iyi bɛi í jɔ̀ ì ya maa mà mii iyi wa ce si ilɛ fei.

²¹ Si anyiɛ, ŋɔi ilaaluu í sɔ̃ Zoabu í ni, an ce bɛi ì fɔu. Na nŋu, koo i baaò Abusalɔmu ama awaasũu wa.

²² Ŋɔi Zoabu í sɛɛbata nɔ í weea ilaaluu. Nɔ í ni má, nnyii ǹ mà iyi ǹ ba didɔ̃ si wajuɛ, amu woo ce icɛɛ, si na iyi í jɔ̀ awɔ ilaalu lafɛ̃ɛm ì waa ceò idem icɛ.

²³ Ŋɔi Zoabu í dede í bɔ Gɛsuu. Nɔ í baaò Abusalɔmu wa Zeruzalɛmu.

²⁴ Amma ilaaluu í ni a jɔ̀ ku bɔ kpasɛ̃ɛ, nɔ ku maà na ku jɔ̀ aŋaò nŋu a yɛ njɛ. Nɔ Abusalɔmu í nɛ kpasɛ̃ɛ aŋaò ilaaluu a kù yɛ njɛ.

Davidi do amaɛ Abusalɔmu à dɔ̃

²⁵ Inɛmɔkɔ kãma kù ce mɔkɔ kusĩa iyi í nya iri si ilɛi Izirɛli fei na kusĩaɛ bɛi Abusalɔmu. Hai isɛɛ hee ku bɔ wasantaii iriɛ kusĩaɛ kù nɛ lɛɛfi kãma.

²⁶ Adɔ̃ do adɔ̃i í ya ja iriɛ si na iyi í jɔ̀ ntoi iriu í ya na ku maa wɔ̀ɔ. Kuwoi ntoi iriu í re kiloo minji si yaase bɛi à ya wã kuwoi mii ŋa si kilooi ilaalu.

²⁷ Abusalɔmu í bí ama inɛmɔkɔ mɛɛta do ama inaabo gɔ iyi à ya kpe Tamaa. Nɔ Tamaa í ce abo kusĩa.

²⁸ Abusalɔmu í ce adɔ̃ minji Zeruzalɛmu bɛ, amma kù yɛ ilaaluu.

²⁹ Ajɔ nŋu, ŋɔi í ni a kpe Zoabu wa nŋu ku bɔɔ bi ilaaluu. Amma Zoabu í kɔ̀ ku koo bi tɛɛ. Nɔ í ni a koo a kpoo wa isɛ gbeejisia. Nɔ Zoabu í kɔ̀ ku koo bi tɛɛ.

³⁰ Ŋɔi Abusalɔmu í sɔ̃ woo ce icɛɛ ŋa í ni, i cɔ ikoi ɔɔzui Zoabu í wa kɔkɔi titom. I koo i dasi ina ŋa. Ŋɔi woo ce icɛɛ ŋau à koo à dasi ikou ina.

³¹ Ŋɔi Zoabu í dede í bɔ bi Abusalɔmu kpasɛ̃ɛ. Nɔ í beeɛ í ni, bɛirei í ce woo ce icɛɛ ŋa à dasi ikom ina.

³² Ŋɔi Abusalɔmu í jɛaa í ni, ǹ ni a koo a kpeɛ wa i na i bɔ bi ilaaluu i koo i beeɛ i ni, na mii í ce ǹ baa hai Gɛsuu. Á sĩam mɔm wo n wa bɛ. Ǹ bi awaò ilaaluu ka yɛ njɛ, nɔ bii í jɛ ǹ nɛ taale gɔi, ku jɔ̀ a kpam.

³³ Ŋɔi Zoabu í koo í sɔ̃ ilaaluu ideu. Nɔ ilaaluu í kpe Abusalɔmu. Ŋɔi Abusalɔmu í koo nɔ í sɛɛbataa. Ŋɔi ilaaluu í sakooɛ.