Samuɛli 2, 13 - Bibeli do fee

Amunɔɔ amai Davidi í bata wecĩɛ

¹ Si anyiɛ, mii iyi í ce wee. Abusalɔmu amai Davidi í nɛ wecĩ kusĩa gɔ à ya kpoo Tamaa. Ŋɔi Amunɔɔ amai Davidi í buu.

² Kubii Tamaa í mu Amunɔɔ hee í jɔ̀ kù mà mii iyi wa ce nɔ í ce araɛ bɔ̃ɔ. Amma á gaabuaa ku sũòɛ domi Tamaa kù mà mɔkɔ titã.

³ Amunɔɔ í nɛ kpaasi ilu bisi gɔ iyi à ya kpe Zonadabu amai Simea igbãi Davidi.

⁴ Ŋɔi Zonadabu í koo í bee Amunɔɔ í ni, na mii í ce ì gbɛ ì waa koo bɛi ihɛ̃ ajɔ fei awɔ amai ilaalu. Ì kaa sɔ̃m ba. Ŋɔi Amunɔɔ í jɛaa í ni, Tamaa wecĩi Abusalɔmu ifɔm nii ǹ bi.

⁵ Ŋɔi Zonadabu í sɔ̃ɔ í ni, koo i sũ si daayi i ce araɛ bɛi bɔ̃ɔ. Bii baaɛ í naa ku cɔɛ, nɔ i sɔ̃ɔ i ni, jɔ̀ wecĩm Tamaa ku naam sɔnda wa n jɛ. Ku naa ku ce sɔndau si wajum ku ba n yɔɔ nɔ n gbaa hai si awɔɛ.

⁶ Ŋɔi Amunɔɔ í koo í sũ í má araɛ bɔ̃ɔ. Ŋɔi ilaaluu í naa ku cɔɔ, nɔ Amunɔɔ í sɔ̃ɔ í ni, ǹ wa n tɔɔɛi, jɔ̀ wecĩm Tamaa ku naa ku sɔ̃ kaa minji si wajum, nɔ ku nam do awɔɛ n jɛ.

⁷ Ŋɔi Davidi í ni a koo a sɔ̃ Tamaa inɔ kpasɛ̃ nŋa a ni, bɔ kpasɛ̃i wecĩɛ Amunɔɔ i koo i ceaa sɔnda.

⁸ Ŋɔi Tamaa í bɔ kpasɛ̃i Amunɔɔ wecĩɛ iyi wa sũu. Ŋɔi í dɛ iyafũ í kpoo í bɛi í sɔ̃ kaaɛ si wajuɛ.

⁹ Si anyiɛ nɔ í sindaɛ si jɛɛ ku jɛ ijuɛ bɛ. Amma Amunɔɔ í kɔ̀ ku jɛ. Nɔ í ni a jɔ̀ inɛ fei ku fita hai inɔ ilei nŋu. Nɔ inɛ fei í fita.

¹⁰ Ŋɔi í sɔ̃ Tamaa í ni, naaò sɔndau wa ilaawa, nɔ n gbaa hai si awɔɛ n jɛ. Ŋɔi Tamaa í so kaa ŋa iyi í ceu í kooa Amunɔɔ wecĩɛu hee ilaawa.

¹¹ Si bɛi wa naa kaa ŋau ku jɛ, ŋɔi Amunɔɔ í jɛ ikɔ̃i awɔɛ nɔ í ni, naa wa n sũòɛ wecĩm.

¹² Nɔ í jɛaa í ni, aawo, wecĩm, maà dasim anyɔ, domi a ci ya ce bɛɛbɛ si ilɛi Izirɛli, maà ce idei anyɔ iyi í to zaka bɛɛbɛ.

¹³ Iwoi an na n lɔò anyɔu bɛ. Nɔ awɔ mɔ i baa i jɛ bɛi hai nɛ anyɔi inɛi Izirɛli ŋa. Bɛbɛi ǹ wa n tɔɔɛi, koo i tɔɔm bi ilaalu, kaa kɔ̀ i som n jɛ aboɛ.

¹⁴ Amma Amunɔɔ í kɔ̀ ku gbɔaa, nɔ í bataɛ do gbugbã í sũòɛ.

¹⁵ Si anyiɛ, ŋɔi Amunɔɔ í cé Tamaa í re baa bɛi í tako í buu wo. Ŋɔi í sɔ̃ɔ í ni, dede i koo i nɛ.

¹⁶ Ŋɔi Tamaa í jɛaa í ni, maà lelem i kɔ̃ɔsiò laalɔ iyi ì ceem. Amma í kɔ̀ ku sotĩ ku gbɔaa.

¹⁷ Nɔ í kpe awaasũ woo ce icɛɛ wa í sɔ̃ɔ í ni, fa abou ihɛ̃ hai bi tom nɔ i bɔòɛ waduude. Nɔ i cĩmbo gambou wa i sɔkɔ.

¹⁸ Ŋɔi woo ce icɛi Amunɔɔ í bɔòɛ waduude nɔ í cĩmbo gambou í sɔkɔ. Tamaa wa dasi ibɔ ku nɛ ila nkpɔ, domi jĩnɛ dimi bɛɛbɛi ama mudɛ̃ɛi ilaalu ŋa à ya maa dasi waati iyi a kù mà mɔkɔ.

¹⁹ Ŋɔi si inɔ kufɔ nla nlaɛu í kosi iriɛ ilúlu, nɔ í ga ibɔ sisɔ ku nɛ ila nkpɔɛu. Ŋɔi í le awɔ si iri í dɔ̃ anu í kpata wa nɛò.

²⁰ Ŋɔi Abusalɔmu wecĩɛu í beeɛ í ni, Amunɔɔ í bataɛi de. Coko bɛɛbɛ, wecĩɛi, nɔ maà mu ideu si inɔ hee ku caa. Ŋɔi Tamaa í nɛ inɔ kufɔ í waò kpasɛ̃i wecĩɛ Abusalɔmu bɛ.

²¹ Ilaalu Davidi í gbɔ ideu fei, nɔ idɔɛ í kɔ̃ ntɔ ntɔ.

²² Abusalɔmu kù sɔ̃ Amunɔɔ ide jiida hee má jɛ ide laalɔ, amma í cóo si na iyi í jɔ̀ í bata Tamaa do gbugbã í sũòɛ.

Abusalɔmu í jɔ̀ à kpa Amunɔɔ í tã í sa

²³ Si anyii adɔ̃ minji, woo ja ntoi angudã ŋa à waa ja ntoi angudãi Abusalɔmu ŋa Baali-Hasɔɔ kɔkɔi ilɛi Efaraimu. Ŋɔi Abusalɔmu í kpe amai ilaalu ŋau fei jingau ku jɛ.

²⁴ Ŋɔi í bɔ bi ilaaluu nɔ í ni, wee woo ja ntoi angudã ŋa à wa bi tom. Awɔ do woo ce icɛɛ ŋa i naa bi tom ŋa.

²⁵ Amma ilaaluu í jɛaa í ni, aawo amam, awa fei aa kaa ka koo ku ba ka maà na ka jɛ asoɛ. Ŋɔi Abusalɔmu í manteɛ, amma ilaaluu í kɔ̀ ku koo, nŋu de í weea.

²⁶ Ŋɔi Abusalɔmu í ni, jɔ̀ baa Amunɔɔ ifɔm ku naa bi tu wa. Nɔ ilaaluu í jɛaa í ni, na mii í jɔ̀ ì bi ku naa bi tɛɛ.

²⁷ Si bɛi Abusalɔmu wa manteɛ, ŋɔi í jɛsi Amunɔɔ do ifɔɛ ŋa iyi à gbe ŋau fei a koo.

²⁸ Ŋɔi Abusalɔmu í sɔ̃ amaacɛɛ ŋa í ni, i maa nɛɛsi Amunɔɔ ŋa. Waati iyi inɔɛ á dɔ̃ si atɛ̃ vɛ̃ɛ an ni, i kpaa ŋa. Bii ì gbɔ bɛɛbɛ ŋa, i kpaa i maà sika ŋa. I maà ce njo ŋa nɔ i ce wɔɔkɔ ŋa. Idei irim nii á jɛ.

²⁹ Ŋɔi woo ce icɛi Abusalɔmu ŋau à cea Amunɔɔ bɛi Abusalɔmu í fɔu. Nɔ amai ilaalu ŋau à dede aŋa fei à gũ mulee nŋa ŋa à sa.

³⁰ Si bɛi à wa kpãa à waa nɛ, laabaau í tosi Davidi à ni Abusalɔmu í kpa amai ilaalu ŋau fei nɔ baa akã nŋa kù fita si.

³¹ Ŋɔi Davidi í dede í ga ibɔɛ nɔ í koo í sũ ilɛ ku nyisiò inɔ kufɔɛ. Nɔ woo ce icɛɛ ŋa fei à wa bɛ do ibɔ ku ga.

³² Ŋɔi Zonadabu amai Simea igbãi Davidi í so ide í ni, ilaalu lafɛ̃ɛm ku maà tamaa bɛi amaɛ ŋau feii à ku. Amunɔɔ nŋu akãi à kpa. Nɔ Abusalɔmu í dasi idɔ nŋu ku ce bɛɛbɛi hai ajɔ iyi Amunɔɔ í bata Tamaa wecĩɛ do gbugbã í sũòɛ.

³³ Debɛi ilaalu lafɛ̃ɛm ku maà ti ku coo si bɛi amaɛ ŋa fei à ku, domi Amunɔɔ nŋu akãi í ku.

³⁴ Si anyiɛ nɔ Abusalɔmu í sa. Ŋɔi woo degbe bindiu í ba wee inɛ nkpɔ gɔ ŋa à waa naa do kpãa iyi í wa do anyiɛ hai do iri kutau wa.

³⁵ Ŋɔi Zonadabu í sɔ̃ ilaaluu í ni, amaɛ ŋai à waa baa bɛ. Nɔ idem nɔu í jɛ ntɔ.

³⁶ Iyi í fɔ ideu wa tã gbakã ŋɔi amai ilaalu ŋau à to wa. Ŋɔi à dɔ̃ anu à waa kpata. Ilaaluu do woo ce icɛɛ ŋa mɔ à kpata do cikãaju ntɔ ntɔ.

³⁷ Nɔ ajɔ fei Davidi í ya maa kpata ikui amaɛui. Abusalɔmu í sai í bɔ bi Talimai amai Amihuu ilaalui Gɛsuu.

³⁸ Abusalɔmu í ce adɔ̃ mɛɛta Gɛsuu bi Talimai bɛ.

³⁹ Nɔ Davidi í jɔ̀ɔ kù waa leleɛ má, domi í tɔɔ araɛ suuru na ikui Amunɔɔu.