Samuɛli 2, 12 - Bibeli do fee

Natãa í naa í sɔ̃ Davidi kuraraɛ

¹ Ŋɔi Aɔ̃ Lafɛ̃ɛ í bɛ walii Natãa si Davidi. Nɔ Natãa í naa bi tɛɛ í sɔ̃ɔ í ni, mɔkɔ minji gɔ ŋa à wa ilu akã. Inɛ akã í jɛ ilu amani, inɛ akãu mɔ ilu arei.

² Ilu amaniu í nɛ angudã do kɛtɛ ŋa nkpɔ nkpɔ.

³ Ilu areu kù nɛ nkãma, í gbe ama angudã zãu gɔ iyi í ra. Í ya maa wo angudãui, nɔ wa la do amaɛ ŋa ajɔ. Angudãu í ya maa jɛ sɔndaɛ nɔ ku maa mɔ inyi si kaaleɛ. Tengi bii í ya sũ, bɛi ama angudãu mɔ í ya sũ, nɔ wa cɔɔ mɔm nii bɛi ama inaaboɛ.

⁴ Ajɔ nŋu gɔ inɛ njoo gɔ í bɔ idei ilu amaniu. Nɔ ilu amaniu í koo í mu angudãi ilu areu í kpaa í yaaɛò inɛ njooɛu, domi kù bi ku nya si angudãɛ ŋa walakɔ si kɛtɛɛ ŋa ku ceaò yaaɛ.

^5-6 Ŋɔi idɔi Davidi í kɔ̃ si ilu amaniu ntɔ ntɔ, nɔ í sɔ̃ Natãa í ni, do iri Aɔ̃ Lafɛ̃ɛ, inɛ iyi í ce bɛɛbɛu, angudã mɛɛi á sã, si na iyi í jɔ̀ kù ce araarei ilu areu. Nɔ mii iyi í ceu bɛ mɔm, í to a kpaa.

⁷ Ŋɔi Natãa í sɔ̃ Davidi í ni, awɔi ì jɛ inɛɛu bɛ. Aɔ̃ Lafɛ̃ɛi inɛi Izirɛli ŋa í ni, amui ǹ cicaɛ ì jɛ ilaalui Izirɛli, nɔ ǹ faabaɛ hai si awɔi Saulu.

⁸ Ǹ jɔ̀ ì gba kpasɛ̃i lafɛ̃ɛɛ, ǹ jilɛɛ aboi lafɛ̃ɛɛ ŋau à jɛ aboɛ ŋa, nɔ ǹ naɛ bommai Izirɛli do Zudaa. Bii iyi bɛ í kerei wo, an kɔ̃ɔɛ si má.

⁹ Na mii í ce ì donda idem ì ce mii iyi kù sĩam si. Awɔi ì kpa Uri inɛi Hɛtiu, domi awɔi ì jɔ̀ inɛi Amɔɔ ŋa à kpaa, nɔ ì sinda ì so aboɛ ì ce ndɛɛ abo.

¹⁰ Bɛbɛi, igũ kaa tã si inɔ kpasɛ̃ɛ si na iyi í jɔ̀ ì dondam do si na iyi í jɔ̀ ì so aboi Uri inɛi Hɛtiu ì ce ndɛɛ abo.

¹¹ Na nŋu, an jɔ̀ inɛi kpasɛ̃ɛ ŋa a ceɛ laalɔ. An so aboɛ ŋa n na inɛi kpasɛ̃ɛ gɔ ku sũò ŋa dasã nkpa si wajuɛ.

¹² Awɔ ì cooi si asii, amma amu, an cooi dasã si wajui inɛi Izirɛli ŋa fei.

¹³ Ŋɔi Davidi í sɔ̃ Natãa í ni, ǹ ce dulum bi Aɔ̃ Lafɛ̃ɛ. Nɔ Natãa í sɔ̃ Davidi í ni, Aɔ̃ Lafɛ̃ɛ í ceɛ suurui dulum dɛɛ, i kaa ku má.

¹⁴ Amma si bɛi ì yaako Aɔ̃ Lafɛ̃ɛ si daau bɛ iyi ì ce, ama inɛmɔkɔ iyi í bíɛu á kui.

¹⁵ Ŋɔi Natãa í sinda í bɔ ide. Si anyiɛ ŋɔi Aɔ̃ Lafɛ̃ɛ í dasi ama iyi jaaɔ̃i Uri í bía Davidiu bɔ̃ɔ ntɔ ntɔ.

Amai Davidi do Baseba í ku

¹⁶ Ŋɔi Davidi í lɔsi Ilaaɔ̃ ku tɔɔ na amau, í dĩ anu, nɔ í ya lɔ ilei koo sũ ilɛ hee iju koo máu.

¹⁷ Ŋɔi inɛ ngboi woo ce icɛi kpasɛ̃ɛ ŋau à naa à tɔɔɛ ku dede hai ilɛ, amma í kɔ̀ nɔ kù jɛ sɔnda kãma aŋaò ŋa.

¹⁸ Ajɔ mɛɛjesiaɛ, ŋɔi amau í ku. Nɔ njo wa mu woo ce icɛi Davidi ŋau a koo a sɔ̃ɔ iyi amau í ku. Nɔ à wasi ku ni, waati iyi amau í wɛɛ, à sɔ̃ɔ ide, nɔ í kɔ̀ ku gbɔ nwa. Bɛirei aa ka ce ka sɔ̃ɔ ka ni amau í ku. Bii à sɔ̃ɔ, á cea araɛ laalɔ.

¹⁹ Ŋɔi Davidi í yɛ woo ce icɛɛ ŋau à waa nya gundu à waa busi njɛ, ŋɔi í mà iyi amau í kui. Nɔ í bee ŋa í ni, amau í kui? Ŋɔi à jɛ à ni, oo, amau kù wɛɛ.

²⁰ Ŋɔi Davidi í dede hai ilɛu í koo í wɛ, í jɔ ikpo í kpaasi ibɔɛ ŋa, í bɛi í bɔ kpasɛ̃i Aɔ̃ Lafɛ̃ɛ í koo í sɛɛbata í ce kutɔɔ. Iyi í baa kpasɛ̃, nɔ í ni a na nŋu sɔnda wa, nɔ í jɛ.

²¹ Ŋɔi woo ce icɛɛ ŋa à beeɛ à ni, yoomai í jɛ yaasei ide iyi ì ceu bɛ. Waati iyi amau í wɛɛ ì dĩ anu ì waa kpataò. Bɛbɛi iyi í ku nɔ ì dede ì waa jɛ sɔnda.

²² Ŋɔi í jɛ nŋa í ni, waati iyi amau í wɛɛu, ǹ dĩ anu ǹ wa n kpataò, domi ǹ wa n ni si idɔm, yooi í mà mà Aɔ̃ Lafɛ̃ɛ kaa ce araarem nɔ ku jɔ̀ amau ku wɛɛ.

²³ Bɛbɛi iyi í ku, na mii an maa n dĩ anu má. An yɔkɔ n baaòɛ wai? Ajɔ wa naa iyi amui an bɔ bi tɛɛ, amma nŋu kaa yɔkɔ ku nyi wa bi tom.

Davidi do Baseba à ba ama mmuɛ

²⁴ Ŋɔi Davidi í lɛlɛ Baseba aboɛ, nɔ í bɔ bi tɛɛ aŋaò à tɔtɔɔ sɛ̃ɛ. Nɔ í so asĩ í bí ama inɛmɔkɔ iyi à kpe Salomɔɔ. Nɔ Aɔ̃ Lafɛ̃ɛ í bi amau,

²⁵ nɔ í bɛ walii Natãa bi Davidi í ni koo sɔ̃ɔ ku kpe amau Yedediya má, waatɔ inɛ iyi Aɔ̃ Lafɛ̃ɛ í bi.

Davidi í jɛ ilui Raba igũ

²⁶ Zoabu wa mɔsi igũu si inɛi Amɔɔ ŋa, nɔ í gba cingaa akãi Raba ilu nla nŋau, tengi bii ilaaluu í wa.

²⁷ Ŋɔi í bɛ inɛ ŋa a koo a sɔ̃ Davidi a ni, ǹ wa n ce igũ Raba, nɔ ǹ gba cingaa akã bii inyi í wau tã.

²⁸ Na nŋu, awɔ mɔ, tɔtɔɔ sooge ŋa iyi à gbe ŋau, nɔ i naa i gba iluu ŋa ku ba amu takam n maà n na n koo n jɔɔ igũ, nɔ amboeu ku na ku jɛ tom.

²⁹ Ŋɔi Davidi í tɔtɔɔ sooge ŋau fei í bɔ igũ Raba. Ŋɔi í ce igũ nɔ í kãmia iluu.

³⁰ Ŋɔi í nya fulai bommau hai si irii ilaalu nŋau. Fulau do wurai à coo. Kuwoɛ í to kiloo kuntaa do ku lesi nɔ à masi kuta ku nɛ fia gɔ. Ŋɔi à daa Davidi si fulau, nɔ í ko amani nkpɔ nkpɔ hai iluu í nɛò.

³¹ Nɔ í dasi inɛi Raba ŋa iyi à gbe ŋau icɛi aru ŋa ku ce. Í jɔ̀ à ce icɛ ikã ikã baa yooma fei, inɛ gɔ ŋa do sii, inɛ gɔ ŋa do dunduusu, inɛ gɔ ŋa mɔ do dagba, nɔ inɛ gɔ ŋa à waa nya biiki ŋa. Bɛɛbɛi í cea ilui inɛi Amɔɔ ŋau fei. Si anyiɛ nɔ í sinda í baa Zeruzalɛmu do soogeɛ ŋau fei.