Samuɛli 2, 11 - Bibeli do fee

Davidi í so Baseba aboi Uri

¹ Iyi adɔ̃ í ka si sukui igũ ku bɔi ilaalu ŋa, ŋɔi Davidi í bɛ Zoabu do soogei Izirɛli ŋau do inɛ ngbo nŋa ŋa a koo a ce igũ do inɛi Amɔɔ ŋa. Ŋɔi à ce asɔɔi ilɛu à waa koo hee à to Raba ilu nla nŋau. Amma Davidi takaɛ í gbe Zeruzalɛmu.

² Alɛ ajɔ nŋu gɔ, Davidi í dede hai si daayiɛ nɔ wa dabii dabii si antaii ileɛ. Si bɛi wa dabiiu, ŋɔi í hɔ̃nnɛ inaabo gɔ hai bɛ wa wɛ, nɔ abou í sĩa ntɔ ntɔ.

³ Ŋɔi Davidi í ni a koo a bee yaasei abou wa. Ŋɔi à koo, nɔ à baa à sɔ̃ɔ à ni, Baseba ama inaaboi Eliamui, aboi Uri, inɛi Hɛtiu.

⁴ Ŋɔi Davidi í bɛ inɛ ŋa a koo a kpoo wa. Ŋɔi abou í naa bi Davidi nɔ Davidi í sũòɛ. Wee waati bɛɛbɛi abou wa ce buki iyi á jɔ̀ ku maaju má si anyii awɔ ku muɛ . Nɔ í dede í bɔ ideɛ.

⁵ Ŋɔi abou í na í nɛ asĩ, nɔ í ni a koo a sɔ̃ Davidi iyi nŋu í nɛ asĩ.

⁶ Ŋɔi Davidi í ni a sɔ̃ Zoabu ku jɔ̀ Uri inɛi Hɛtiu ku naa wa. Nɔ Zoabu í jɔ̀ í koo.

⁷ Uri í bɔ bi Davidi, nɔ Davidi í beeɛ laabaaui Zoabu do soogei Izirɛli ŋa do igũ iyi à wa si.

⁸ Si anyiɛ, Davidi í cea Uri amua nɔ í sɔ̃ɔ í ni, bɔ kpasɛ̃ i koo i sĩmi. Ŋɔi Uri í fita hai kpasɛ̃i ilaaluu.

⁹ Amma kù bɔ kpasɛ̃. Í koo í sũi anu koofai kpasɛ̃i ilaaluu, nŋu do ciikui ilaalu ŋau fei.

¹⁰ Ŋɔi à koo à sɔ̃ Davidi à ni, Uri kù bɔ ideɛ ku sũ. Nɔ Davidi í bee Uri í ni, hai ilu si ì waa baa ba. Bɛirei í ce i kù bɔ kpasɛ̃ɛ ku sũ.

¹¹ Ŋɔi Uri í jɛaa í ni, kpakoi Ilaaɔ̃ do soogei Izirɛli ŋa do ti Zudaa ŋa do lafɛ̃ɛm Zoabu à waa sũ si ilei acɔ ŋa bi ku ce igũ, nɔ amu n bɔ ide n koo n jɛ n mɔ nɔ n tɔtɔɔ sɛ̃ɛ do abom? Ntɔ ntɔ, hee do si wajuɛ iyi ǹ wa n leekĩ ihɛ̃ fei, n kaa n ce bɛɛbɛ pai.

¹² Ŋɔi Davidi í sɔ̃ Uri í ni, sũ ihɛ̃ má nnyi, ala nɔ n jɔ̀ ì nɛ. Nɔ Uri í gbe Zeruzalɛmu bɛ má ajɔ nŋu do iju kumáɛ.

¹³ Ŋɔi Davidi í kpoo ku jɛ do ku mɔ aŋaò ajɔ, nɔ í jɔ̀ í mɔ atɛ̃ hee wa kpaa. Amma iyi idũ í dũ, í nyi í fita má í koo í sũ do ciikui ilaalu ŋau. Kù bɔ kpasɛ̃ɛ.

¹⁴ Iyi iju í má daakɔu, ŋɔi Davidi í kɔ tia í na Uri koo na Zoabu.

¹⁵ Í kɔ si tiau í ni, i tale si Uri tengi bii igũ wa gbãa nɔ i sa i jɔ̀ɔ ŋa ku ba a kpaa.

Davidi í jɔ̀ à kpa Uri mɔkɔi Baseba

¹⁶ Waati iyi Zoabu í ka tiau í tã, ŋɔi í cɔ iluu nɔ í jilɛ Uri tengi bii sooge mbɛɛ ku nɛ gbugbã ŋau à wa.

¹⁷ Ŋɔi inɛi ilu ŋau à fita wa à waa ba Zoabu igũ ku ja. Ŋɔi à kpa inɛ gɔ ŋa si inɔi soogei Davidi ŋau, nɔ à kpa Uri inɛi Hɛtiu mɔ.

¹⁸ Ŋɔi Zoabu í bɛ inɛ gɔ koo sɔ̃ Davidi mii iyi í ce bi igũu fei.

¹⁹ Nɔ í sɔ̃ woo bɛu í ni, bii ì koo ì sɔ̃ ilaaluu mii iyi í ce si igũu fei ì tã,

²⁰ á yɔkɔ ku jɛ idɔɛ á kɔ̃ nɔ ku ni, na mii í jɔ̀ ì má kɔkɔi iluu si igũu ŋa. I kù mà iyi à ya ta afa ŋa wa hai antaii bindiu ŋai?

²¹ Mà yooi í kpa Abimelɛki amai Zerubesɛti. Kù jɛ inaaboi í tale siɛ ama alɔ nla nla gɔ wa hai lelei bindii ilui Tebɛɛ, nɔ í kuu? To, na mii í jɔ̀ ì má iluu hee bɛɛbɛ ŋa. Waati bɛɛbɛ nɔ i jɛaa i ni, woo ce icɛɛ Uri inɛi Hɛtiu mɔ í ku.

²² Ŋɔi woo bɛu í dasi kpãa wa. Iyi í to wa, nɔ í sɔ̃ Davidi ide iyi Zoabu í jilɛaa ku fɔu fei.

²³ Í ni, inɛ ŋau à ba si wa saai. À fita si wa wai inɔ sako, nɔ à lele ŋa à bɔò ŋa hee anu koofai iluu.

²⁴ Ŋɔi ilu bioo ŋa à ta afa wa si wa hai lelei bindi, nɔ soogeɛ gɔ ŋa à ku, nɔ Uri inɛi Hɛtiu mɔ í ku.

²⁵ Ŋɔi Davidi í sɔ̃ woo bɛu í ni, koo i sɔ̃ Zoabu i ni, maà ti i maa weewea na ideu bɛ, domi kù jɛ waati kãma feii à ya jɛ igũ. Teese i dasi gbugbã nɔ i lɛgɛ iluu. Awɔ mɔ, jɔ̀ i muaa gbugbã.

²⁶ Ŋɔi aboi Uri í gbɔ ikui mɔkɔɛ nɔ í kpata akũɛ.

²⁷ Waati iyi akũu í tã, ŋɔi Davidi í bɛ inɛ gɔ koo gbãa wa nɔ í gbaa kpasɛ̃ɛ. Í soo abo nɔ í bíaa ama inɛmɔkɔ. Mii iyi Davidi í ceu kù dɔ̃a Aɔ̃ Lafɛ̃ɛ si.