Samuɛli 2, 10 - Bibeli do fee

Inɛi Amɔɔ ŋa à cã anyii woo ce icɛi Davidi ŋa

¹ Si anyiɛ, ŋɔi ilaalui inɛi Amɔɔ ŋa í ku, nɔ Hanunu amaɛ í jɛ bomma si agbɛɛ.

² Ŋɔi Davidi í ni, ǹ bi n cea Hanunu jiida bɛi Nahasi baaɛ í ceem. Nɔ í bɛ akaweɛ ŋa a koo a coo fɔɔi ikui baaɛ nɔ a tũ inɔɛ. Iyi akawei Davidi ŋau à to ilɛi inɛi Amɔɔ ŋa,

³ ŋɔi inɛ ngboi inɛi Amɔɔ ŋau à koo à sɔ̃ Hanunu lafɛ̃ɛ nŋa à ni, ì waa tamaa bɛi Davidi í bɛ inɛ ŋau ihɛ̃ wai a naa a tũ idɔɛ si na iyi í jɔ̀ í mà bɛɛrɛi baaɛ? I kù mà iyi í bɛ ŋa wai a naa a cɔ yaasei iluu ku ba ku naa ku ce asɔɔɛ?

⁴ Ŋɔi Hanunu í mu woo bɛi Davidi ŋau, nɔ í jɔ̀ à wa bubui agbã nŋa ŋa, nɔ à bu ibɔ sisɔ nŋa ŋa si anini hee si akai icu. Si anyiɛ nɔ í ni a nɛ.

⁵ Ŋɔi Davidi í gbɔ ideu, nɔ í bɛ inɛ ŋa a bɔ ku kò nŋa, domi inɛ ŋau à wa si anyɔ nla nla. Nɔ í ni a sɔ̃ ŋa a wa ilui Zeriko titã hee agbã nŋa ŋau a wu, si anyiɛ nɔ a baa wa.

Davidi í ce igũ do inɛi Amɔɔ ŋa do inɛi Siri ŋa

⁶ Iyi inɛi Amɔɔ ŋa à yɛ aŋa à cea Davidi taale, ŋɔi à so sooge dubu kɔnfia (20.000) hai bi inɛi Siri ŋa iyi à wa Bɛti-Rehobu do Soba. Nɔ à so dubu akã (1.000) hai bi ilaalui Maaka, do dubu maateeji (12.000) hai bi inɛi Tobu ŋa. Sooge dubu kuntaa do mɛɛta (33.000) ŋau bɛ fei inɛi ilɛi Siri ŋai.

⁷ Iyi Davidi í gbɔ ideu, ŋɔi í jɔ̀ Zoabu í koo si ŋa, nŋu do sooge kaasãanɛ ŋau fei.

⁸ Ŋɔi inɛi Amɔɔ ŋau à fita wa do sɔɔlui igũ à na à wa anu koofai ilu nla nŋau. Inɛi Siri ŋa iyi à naa hai Soba do Rehobu aŋa do soogei Tobu do Maaka ŋa mɔ à wa inya mmu inɔ sako.

⁹ Zoabu í yɛ iyi igũu anyi do wajui á jɛ. Ŋɔi í cica sooge kaasãanɛ ku mà igũi Izirɛli ŋau fei í ce ŋa wuaa akã a ce igũ do soogei Siri ŋa.

¹⁰ Nɔ í so ifɔɛ Abisai inɛ ngboi sooge ŋa iyi à gbeu, a koo a ce igũ do soogei Amɔɔ ŋa.

¹¹ Ŋɔi í sɔ̃ ifɔɛu í ni, bii inɛi Siri ŋa à waa kãmiam naa i sobim. Bii inɛi Amɔɔ ŋa mɔi à na à waa kãmiaɛ, an naa n sobiɛ.

¹² Ka maà ti ka tɛkɛɛò anyi, ka ce wɔɔkɔ na zamaa nwa do ilui Ilaaɔ̃ Lafɛ̃ɛ nwa ŋau, nɔ Aɔ̃ Lafɛ̃ɛ ku ce bɛi í sĩaa.

¹³ Ŋɔi Zoabu do soogeɛ ŋa à waa koo si soogei Siri ŋau, nɔ inɛi Siri ŋau à waa sa nŋa.

¹⁴ Iyi inɛi Amɔɔ ŋa à yɛ iyi inɛi Siri ŋa à waa sa, ŋɔi aŋa mɔ à saa Abisai à koo à dasi inɔ ilu. Ŋɔi Zoabu í jɔ̀ inɛi Amɔɔ ŋau wa nɔ í nyi wa Zeruzalɛmu.

¹⁵ Iyi inɛi Siri ŋa à yɛ inɛi Izirɛli ŋa à kãmia aŋa, ŋɔi à dɛdɛ akpɔ a kɔ̃ɔsi.

¹⁶ Hadadezɛɛ í jɔ̀ à koo à dɛdɛ inɛi Siri ŋa iyi à wa icei idoi Efaratau wa. Ŋɔi à to wa Helamu. Sobaki inɛ ngboi soogei Hadadezɛɛ ŋaui wa jɛ iri nŋa.

¹⁷ Ŋɔi à koo à sɔ̃ Davidi laabaau nŋa. Nɔ í tɔtɔɔ soogei Izirɛli ŋau fei í kuaò idoi Zuudɛ̃ɛu í naa hee Helamu. Ŋɔi inɛi Siri ŋa à ce sɔɔlu a koo do igũ,

¹⁸ amma à saa inɛi Izirɛli ŋa. Nɔ Davidi í kpa sooge cĩɔ mɛɛje (700) iyi à wa si sarɛti ku ja igũ ŋau do masa dubu ciiji (40.000). Ŋɔi í mɛɛ Sobaki inɛ ngbo nŋau nɔ í ku tengi bɛ.

¹⁹ Ŋɔi ilaalui ilu ŋa iyi Hadadezɛɛ wa mu ŋau fei à tɔɔ laakai ku sũ bi inɛi Izirɛli ŋa si bɛi à yɛ à jɛ aŋa igũ. Nɔ inɛi Izirɛli ŋa à ce ŋa aru. Inɛi Siri ŋa a ci ya ce baa idei aŋa a bɔ inɛi Amɔɔ ŋa ku sobi si igũ má.