Samuɛli 1, 9 - Bibeli do fee

Saulu wa dɛdɛ gbankɛlɛ zãu ŋa iyi à nyɔ

¹ Wee inɛi dimii Bɛnzamɛɛ gɔ í wɛɛ iyi à ya kpe Kisi, amai Abiɛlii. Abiɛli mɔ amai Serɔɔi, Serɔɔ mɔ amai Bekoratii, Bekorati mɔ amai Afiai. Kisiu ilu bɛɛrɛi nɔ í nɛ amani.

² Í nɛ ama awaasũ kusĩa gɔ iyi à ya kpe Saulu. Si inɔi inɛi Izirɛli ŋa inɛ kãma kù sĩa kù too nɔ nŋui í gboka í re aŋa fei do iri.

³ Wee gbankɛlɛ zãui Kisi baai Saulu ŋa à nyɔ, nɔ Kisi í sɔ̃ Saulu í ni, dede i koo i dɛdɛ gbankɛlɛ ŋau wa awɔ do amaacɛ gɔ.

⁴ Ŋɔi Saulu do amaacɛu à too do iri kutai Efaraimu ŋa do ilɛi Salisa amma a kù yɛ ŋa. Si anyiɛ nɔ à too wa do ilɛi Salimu amma a kù wa bɛ mɔ. Nɔ à dabii má si ilɛi dimii Bɛnzamɛɛ fei amma a kù yɛ nkãma.

⁵ Iyi à to si ilɛi Sufu ŋɔi Saulu í sɔ̃ woo ce icɛɛu í ni, jɔ̀ ka bɔ ide. Bii kù jɛ bɛɛbɛ, zigii baam á na ku da na iri nwa nɔ ku gbɛjɛ idei gbankɛlɛ ŋau.

⁶ Ŋɔi woo ce icɛu í jɛaa í ni, waliii Ilaaɔ̃ gɔ í wa inɔ ilu ihɛ̃. Í nɛ bɛɛrɛ nɔ mii iyi í fɔ fei í ya cei dee dee. Ka koo káa yɔɔ, á yɔkɔ ku jɛ á sɔ̃ wa do ikpa bii aa ka dɛdɛò ŋa.

⁷ Ŋɔi Saulu í ni, bii à koo bi tɛɛ, mii aa ka mua. A kù nɛ sɔnda kãma si inɔ bɔgɔ nwa, a kù nɔ a kù nɛ nkãma iyi aa ka muaa. Bɛirei aa ka ce.

⁸ Ŋɔi woo ce icɛu í jɛaa í ni, ǹ nɛ ama kpɛkɛlɛi isɔ fũfũ gɔ ihɛ̃. Ka koo káa náa na mba ku nyisi wa kpãau.

^9-10 Ŋɔi Saulu í jɛaa í ni, to, ka koo. Nɔ à bɔ inɔ ilu tengi bii waliiu í wa. Tako wo bii inɛi Izirɛli ŋa à waa bi Ilaaɔ̃ ku ba ide ku fɔ à ya nii, ka bɔ bi woo yɛ, domi inɛ iyi à ya kpe walii nsɛi, tako wo woo yɛi.

¹¹ Iyi Saulu do woo ce icɛu à waa koo ŋɔi à ko mudɛ̃ɛ gɔ ŋa iyi à fita hai inɔ iluu à waa bɔ inyi ku kpã. Ŋɔi à bee ŋa à ni, woo yɛu í wa ihɛ̃?

¹² Ŋɔi mudɛ̃ɛ ŋau à jɛ nŋa à ni, oo. Í tako ŋɛ í to wa ihɛ̃, domi nnyi ajɔ iyi inɛi inɔ ilu ŋa à ya ce kuwee si geeteui. I koo ńya ńya

¹³ aa yɔɔ bii ì waa lɔ inɔ iluu gbakã ŋa hee ku maa gũ geeteu. Inɛ kãma kaa jɛ bii kù to wa domi nŋui á ce kutɔɔ si kuweeu, inɛ ŋa a bɛi a jɛ. I koo nsɛi, aa baa bɛ ŋa.

Saulu í ko Samuɛli

¹⁴ Ŋɔi Saulu do amaacɛu à waa bɔ inɔ iluu. Iyi à waa to, ŋɔi à ko Samuɛli wa bɔ geeteu.

¹⁵ Nɔ wee, hee Saulu ŋa à maa naa bɛ Aɔ̃ Lafɛ̃ɛ í tako í sɔ̃ Samuɛli wo í ni,

¹⁶ ala si awaati bɛ ihɛ̃ má an jɔ̀ i ko inɛi dimii Bɛnzamɛɛ gɔ. Tontooaa ikpo si iri i nyaa ikã domi nŋui á jɛ ilaalui inɛi Izirɛli ŋau. An jɔ̀ ku faaba inɛm ŋa hai si awɔi inɛi Filisi ŋa, domi ǹ ce araare nŋa si na iyi í jɔ̀ anu ku dɔ̃ nŋa í to wa hee bi tom.

¹⁷ Si bɛɛbɛ, iyi Samuɛli í hɔ̃nnɛ Saulu wa, ŋɔi Aɔ̃ Lafɛ̃ɛ í sɔ̃ɔ í ni, inɛ iyi ǹ sɔ̃ɛ ideɛu mbɛ. Nŋui á jɛ ilaalui inɛm ŋa.

¹⁸ Iyi Saulu í to wa bi Samuɛli bi anu koofai iluu ŋɔi í beeɛ í ni, iwoi kpasɛ̃i woo yɛu í wa.

¹⁹ Ŋɔi Samuɛli í jɛaa í ni, amui ǹ jɛ woo yɛu ihɛ̃. Gũ antaii geete bi ku ce kuweeu, tengi bɛi awaɛ ŋa aa ka jɛ nnyi. Alai an jɛɛ si ide ŋa iyi ì ya maa bee araɛ fei, n bɛi n jɔ̀ i bɔ.

²⁰ Maà jɔ̀ zigiɛ ku daò gbankɛlɛ ŋa iyi à nyɔ hai ajɔ mɛɛta wa, domi à yɛ ŋa. Nɔ mii jiida ŋa iyi à wa si ilɛi Izirɛli fei, titɛɛ do ti inɛi kpasɛ̃i baaɛ ŋai aa baa a jɛ.

²¹ Ŋɔi Saulu í jɛaa í ni, amu inɛi Bɛnzamɛɛi. Dimi nwai í kere í re si dimii inɛi Izirɛli ŋa. Nɔ nyaanzem ŋa a kù kpɔ a kù to ti inɛ ŋa iyi à gbe. Na mii í ce ì waa sɔ̃m ide dimi bɛ ihɛ̃.

²² Ŋɔi Samuɛli í gbã Saulu do amaacɛu í bɔò ŋa inɔ ile bii à waa jɛ. Ŋɔi í jɔ̀ à buba si kitã sinte ŋa iyi à nɛ bɛɛrɛ à re si inɔi amanɛ kuntaa ŋa iyi à kpe ku jɛu wa.

²³ Ŋɔi í sɔ̃ woo ce sɔndau í ni ku naaò iŋa iyi nŋu í tako í náa ku jilɛu wa.

²⁴ Ŋɔi woo ce sɔndau í so itãu wa í naa í jilɛa Saulu. Ŋɔi Samuɛli í ni, sɔnda iyi à jilɛɛ wee. So i jɛ, domi awɔi ǹ jilɛa waati iyi ǹ kpe inɛ ŋa wa. Nɔ bɛɛbɛi Samuɛli do Saulu à jɛ inya akã ajɔ nŋu bɛ.

²⁵ Iyi à kita wa hai antaii geeteu à bɔ inɔ ilu nɔ Samuɛli do Saulu à gũ antaii sikifai ilei Samuɛli à waa fɔ ide.

Samuɛli í cica Saulu ku jɛ ilaalu bɛi Aɔ̃ Lafɛ̃ɛ í sɔ̃ɔu

²⁶ Saulu do amaacɛɛ à jĩ hai amɛɛjuumá. Ŋɔi Samuɛli í kpe Saulu si lelei sikifau má í ni, an too ŋɛ n koo n leekĩ nŋɛ nyankuti. Ŋɔi à dasi kpãa à waa nɛ.

²⁷ Iyi à fita hai inɔ iluu ŋɔi Samuɛli í sɔ̃ Saulu í ni ku sɔ̃ amaacɛu ku maa cua. Waati iyi à gbe aŋa minji nŋa ŋɔi í sɔ̃ Saulu má í ni, leekĩ titã, an sɔ̃ɛ ide iyi Ilaaɔ̃ í fɔ.