Samuɛli 1, 8 - Bibeli do fee

Inɛi Izirɛli ŋa à bi aŋa a nɛ ilaalu

¹ Waati iyi Samuɛli í gbo ŋɔi í so ama inɛmɔkɔɛ ŋa à jɛ inɛ ngboi inɛi Izirɛli ŋa.

² Zoɛli ama sinteɛ do minjisiaɛ Abiya, aŋai à jɛ inɛ ngbo ŋa si ilui Bɛɛseba.

³ Amma a kù waa too yaase jiidai baa nŋa. Kɔdɛɛ nŋa í jɔ̀ a kù waa kiiti inɛ ŋa dee dee, domi inɛ ŋa iyi à ya ce nŋa amua ŋai à ya na ntɔ.

⁴ Na ŋɔi í jɔ̀ inɛ ngboi inɛi Izirɛli ŋa fei à tɔtɔɔ nɔ à bɔ Rama bi Samuɛli,

⁵ nɔ à sɔ̃ɔ à ni, awɔ wee ì gbo, nɔ amaɛ ŋa a kù waa too yaase jiidaɛ. Bɛbɛi dɛdɛ nwa ilaalu iyi á maa gbã nwa si bɛi inɛi ilɛ mmu ŋa fei à waa ce.

⁶ Ideu kù dɔ̃a Samuɛli si, si bɛi à bi aŋa a nɛ ilaalu, nɔ í koo wa ce kutɔɔ.

⁷ Ŋɔi Aɔ̃ Lafɛ̃ɛ í sɔ̃ Samuɛli í ni, gbɔ ide iyi zamaau wa sɔ̃ɛ fei, domi kù jɛ awɔi à kɔ̀si, amma amui. A kù bi n jɛ ilaalu nŋa má.

⁸ Hai waati iyi ǹ nya ŋa hai ilɛi Ezibiti à sinda à toom anyii à koo à waa tɔɔ iwɛ̃ nŋa ŋa hee do nsɛi fei. Bɛi à sinda à toom anyiu bɛ, bɛɛbɛ mɔi aa sinda a tooa awɔ mɔ anyi.

⁹ Na nŋu, jɛ nŋa si. Amma sɔ̃ ŋa a ce laakai si mii ŋa iyi ilaaluu á na ku bee ŋa.

Mii iyi ilaalu á bee si inɛɛ ŋa

¹⁰ Ŋɔi Samuɛli í naa í sɔ̃ ŋa ide iyi Aɔ̃ Lafɛ̃ɛ í fɔ fei na ilaalu iyi à tɔɔ,

¹¹ í ni, mii ŋa iyi ilaalu á bee ŋɛ wee. Á so ama inɛmɔkɔ nŋɛ ŋa a jɛ soogeɛ ŋa, aŋai aa maa mu sarɛtii igũɛ ŋa, nɔ inɛ gɔ nŋa ŋa aa gũ acĩɛ ŋa, inɛ gɔ nŋa ŋa mɔ aa maa cuaa sarɛtiu,

¹² inɛ gɔ nŋa ŋa aa jɛ inɛ ngboi sooge dubu, inɛ gɔ nŋa ŋa mɔ inɛ ngboi sooge ciitaa. Awaasũ nŋɛ ŋai aa ya faa ilɛ nɔ a da mii ŋa iyi í gbɛ̃, aŋai aa ceaa jĩnɛi igũ do ti sarɛti ŋau fei.

¹³ Á so mudɛ̃ɛ nŋɛ ŋa a jɛ woo ce tuae do woo ce sɔnda ŋa do woo ce pɛ̃ɛ ŋa.

¹⁴ Á gba fiti bubui ilɛ jiida nŋɛ ŋa do iko nŋɛ ŋa tengi bii ì lɔ ama jĩi ndii rezɛ̃ɛ ŋa do jĩi ndii olivi ŋa nɔ ku na akaweɛ ŋa.

¹⁵ Si mii ŋa iyi ì gbɛ̃ ŋa, si inɔi mɛɛwa fei á ya nya akãi ku na ciikuɛ ŋa do akaweɛ ŋa.

¹⁶ Nɔ á so woo ce icɛ inaabo do inɛmɔkɔ nŋɛ ŋa do awaasũ nŋɛ ŋa iyi à nɛ gbugbã hee do gbankɛlɛ nŋɛ ŋa ku ba a ya ceaa icɛ.

¹⁷ Si angudã nŋɛ ŋa do iwo nŋɛ ŋa, si ara mɛɛwa fei á ya gba akãi, nɔ iŋɛ taka nŋɛ aa jɛ aruɛ ŋa.

¹⁸ Nɔ waati bɛɛbɛi aa maa weewea si Aɔ̃ Lafɛ̃ɛ ŋa na ilaalu iyi iŋɛ taka nŋɛ ì cicaa ara nŋɛ ŋa, amma kaa jɛ nŋɛ.

¹⁹ Do nŋu fei à kɔ̀ ku gbɔ idei Samuɛli. Nɔ à ni, aawo, à bi ka nɛ ilaalui

²⁰ ku ba awa mɔ ka yɛ bɛi inɛi ilɛ mmu ŋa fei. À bi ilaalu iyi á maa gbã wa, nŋui á maa cua nwa bii à waa bɔ igũ nɔ ku ba wa igũ ku ce.

²¹ Iyi Samuɛli í gbɔ bɛi inɛi Izirɛli ŋa à dɔ̃ fei ŋɔi í koo í sɔ̃ Aɔ̃ Lafɛ̃ɛ.

²² Ŋɔi Aɔ̃ Lafɛ̃ɛ í sɔ̃ Samuɛli í ni, gbɔ iyi à waa fɔ nɔ i cica nŋa ilaaluu. Si anyii nŋu ŋɔi Samuɛli í sɔ̃ ŋa í ni inɛ fei ku nɛ iluɛ.