Samuɛli 1, 6 - Bibeli do fee

Inɛi Filisi ŋa à sindo kpakou wa

¹ Kpakoi akabuui Aɔ̃ Lafɛ̃ɛ í ce cukpa mɛɛje si ilɛi inɛi Filisi ŋau.

² Ŋɔi inɛi Filisi ŋau à kpe woo wee nŋa ŋa do woo ce alisi nŋa ŋa à bee ŋa à ni, bɛirei aa ka cea kpakoi Aɔ̃ Lafɛ̃ɛ. I sɔ̃ wa do yaase bɛi aa ka sindoɛò si agbɛɛ.

³ Ŋɔi à jɛ nŋa à ni, bii ì waa sindo kpakou ŋa, i maà sindoɛ ngbɛ ngbɛ, amma aa cea Lafɛ̃ɛi inɛi Izirɛli ŋa amua iyi aa tɔɔɛò suuru ŋai. Bii ì ce bɛɛbɛ ŋa aa ba iri, nɔ aa mà ŋa mii iyi í ce Lafɛ̃ɛ nŋau wa kpã ŋɛ iju.

⁴ Ŋɔi à bee ŋa à ni, amua yoomai aa ka ceaa. Ŋɔi à jɛ nŋa à ni, si na iyi í jɔ̀ wahala akãi í to si iŋɛ do ilaalu miiu nŋɛ ŋa, á sĩa i dɛ wura i yɔɔ ŋa nɔ i ceò mii miiu iyi í jɔ ngoli do mii miiu má iyi í jɔ kute ŋa

⁵ iyi à bɛjɛ ilɛ nŋɛ. Do yaase bɛɛbɛi aa nyisiò iyi ì mà bɛɛrɛi Lafɛ̃ɛ nŋau ŋa. Á yɔkɔ ku jɛ Lafɛ̃ɛ nŋau kaa kpã ŋɛ iju má, iŋɛ do ilɛ nŋɛ do Lafɛ̃ɛ nŋɛ ŋa fei.

⁶ I maà ti i lele idɔ nŋɛ ŋa bɛi inɛi Ezibiti ŋa do ilaalu nŋa à ce wo. I jɔ̀ i ye gigi ŋa do bɛi Lafɛ̃ɛ nŋau í kpã ŋa iju a bɛi a jɔ̀ inɛi Izirɛli ŋa à nɛ.

⁷ Bɛbɛi i dɛdɛ sarɛti titɔ̃ ŋa nɔ i mu kɛtɛ abo minji iyi a kù le nŋa si zuugu baa fii gbakã titã. Kɛtɛ ŋau a jɛ kɛtɛ ŋa iyi à nɛ ama kpɔtɔɔ ŋa. Aŋai aa dĩa sarɛtiu ŋa, amma aa baaò ama nŋa ŋa wa idei.

⁸ Si anyiɛ aa so kpakoi Aɔ̃ Lafɛ̃ɛ i dasi inɔ sarɛtiu ŋa, nɔ amuai wura ŋa iyi ì cea Aɔ̃ Lafɛ̃ɛ na dulum du ŋɛu aa dasi inɔ ama kpako gɔ i bɛi i jilɔɔ kɔkɔi kpakou ŋa, nɔ i jɔ̀ sarɛtiu ku nɛ ŋa.

⁹ Nɔ i maa cɔɔ ŋa. Bii kɛtɛ ŋau à mu kpãa iyi wa bɔ ilɛi Izirɛli do ikpa ilui Bɛti-Semɛsi, aa ka mà iyi Lafɛ̃ɛ nŋaui í kpã wa iju. Bii kù jɛ bɛɛbɛ mɔ, aa ka mà iyi kù jɛ nŋu, amma wa naai hai bii gɔ.

¹⁰ Nɔ à ce bɛɛbɛ. À mu kɛtɛ abo minji iyi à nɛ ama kpɔtɔɔ ŋa nɔ à dĩ nŋa sarɛtiu à bɛi à jɔ̀ ama kɛtɛ ŋau kpasɛ̃.

¹¹ Ŋɔi à so kpakoi akabuui Aɔ̃ Lafɛ̃ɛ do ama kpako si bii à dasi mii ŋa iyi à ce do wurau à dasi ŋa inɔ sarɛtiu.

¹² Kɛtɛ ŋau à so kpãai Bɛti-Semɛsi à waa tooɛ do anu ku dɔ̃ a kù yaa bii kãma. Ilaalui inɛi Filisi ŋau à too ŋai hee kɔkɔi Bɛti-Semɛsi.

¹³ Wee inɛi Bɛti-Semɛsi ŋa à waa mu bilee si lɔɔma. Iyi à wu iju nɔ à hɔ̃nnɛ kpakou wa naa, ŋɔi inɔ nŋa í dɔ̃.

¹⁴ Iyi kɛtɛ ŋau à to ikoi Zozue inɛi Bɛti-Semɛsi, ŋɔi à leekĩ kɔkɔi kuta nla gɔ. Ŋɔi inɛ ŋau à lɛgɛ sarɛtiu nɔ à kpa kɛtɛ ŋau à cea Aɔ̃ Lafɛ̃ɛ kuwee iyi à ya jo si ina fei sãa sãa.

¹⁵ Inɛi Levii ŋau à tako à nya kpakoi Aɔ̃ Lafɛ̃ɛu titã do ama kpakou à lesi antaii kuta nlau. Ajɔ nŋu bɛi inɛi Bɛti-Semɛsi ŋau à cea Aɔ̃ Lafɛ̃ɛ kuwee ŋa iyi à ya jo si ina fei sãa sãa do kuwee mmu ŋa má.

¹⁶ Ilaalu miiui inɛi Filisi ŋa iyi à waa too sarɛtiu wa à yɔɔ, à bɛi à sinda à nɛ Ekorɔ̃ɔ ajɔ nŋu.

¹⁷ Yaasei mii ndii wura iyi í jɔ ngoli iyi inɛi Filisi ŋau à ce à na Aɔ̃ Lafɛ̃ɛ na dulum du ŋau wee. À ce mii ŋaui miiu miiu, akã ti Asidodi, akã mɔ ti Gaza, akã mɔ ti Asikalɔ̃ɔ, akã mɔ ti Gati, akã mɔ ti Ekorɔ̃ɔ.

¹⁸ À ce mii ndii wura iyi í jɔ kute ŋa si bɛi kukpɔi ilui ilaalu nŋa ŋa í to, hai ilu nla nŋa ŋa iyi à kaakoɛ do bindi do ilɛɛko nŋa ŋa hee ku bɔ kuta nla si bii à lesi kpakoi akabuui Aɔ̃ Lafɛ̃ɛu. Kutau í wa si ikoi Zozue inɛi Bɛti-Semɛsiu hee do nnyi fei.

¹⁹ Inɛi Bɛti-Semɛsi gɔ ŋa à cɔ inɔ kpakou. Ŋɔi Aɔ̃ Lafɛ̃ɛ í kpã ŋa iju, si amanɛ dubu ciitaa í kpa amanɛ kitaò fɛɛwa. Nɔ inɛ ŋa iyi à gbe ŋau à wɛɛò inɔ kufɔ na ijuukpã nlau.

²⁰ Ŋɔi à ni, inɛ kãma kaa yɔkɔ ku wɛɛ si wajui Aɔ̃ Lafɛ̃ɛ inɛ kumáu ihɛ̃. Iwoi aa ka bɔò kpakoɛ ku jĩò wa.

²¹ Ŋɔi à bɛ inɛ ŋa a koo a sɔ̃ inɛi ilui Kiria-Yarimu ŋa a ni, wee inɛi Filisi ŋau à baaò kpakoi akabuui Aɔ̃ Lafɛ̃ɛ wa. I naa i soo i nɛò ide nŋɛ.