Samuɛli 1, 5 - Bibeli do fee

Kpakoi akabuui Aɔ̃ Lafɛ̃ɛ í wa bi inɛi Filisi ŋa

¹ Inɛi Filisi ŋa à so kpakoi akabuui Ilaaɔ̃ hai Ebenezɛɛ à bɔò Asidodi.

² Ŋɔi à bɔò kpakou inɔ ilei iwɛ̃ nŋa Dagɔ̃ɔ nɔ à jilɔɔ kɔkɔi mii iyi à ce iyi í jɔ iwɛ̃u.

³ Iyi iju í má daakɔ ŋɔi inɛi ilu ŋau nɔ à dede à koo à ba wee Dagɔ̃ɔ í cuku í sɛɛbata si wajui kpakoi Aɔ̃ Lafɛ̃ɛu, ŋɔi à soo à jilɔɔ má si agbɛɛ.

⁴ Iyi iju í má má ŋɔi inɛ ŋau à dede daadaakɔu nɔ à ba wee Dagɔ̃ɔ í cuku í sɛɛbata má si wajui kpakoi Aɔ̃ Lafɛ̃ɛu. Iriɛ do awɔɛ ŋa fei í cɛ wa jilɛ si andɛi ileu, gãgãɛ nŋu akãi í gbe.

⁵ Na ŋɔi í jɔ̀ woo weei Dagɔ̃ɔ ŋa do inɛ ŋa iyi à waa lɔ inɔ ilei Dagɔ̃ɔ Asidodi bɛ fei, kãma nŋa gɔ ci ya tɛ andɛi ileu suusuu waati iyi à waa bi a lɔ bɛ hai ajɔ nŋu hee ku baa nnyi.

⁶ Si anyiɛ ŋɔi Aɔ̃ Lafɛ̃ɛ wa nyisi inɛi Asidodi ŋa gbugbãɛ, í wahala ŋa do dimii ngoli gɔ ŋa, aŋa do inɛi ilɛɛko nŋa ŋa.

⁷ Iyi à yɛ wahala iyi í ba aŋa ŋɔi à ni, kpakoi Lafɛ̃ɛi inɛi Izirɛli ŋa kaa wa bi tu wa má, domi Lafɛ̃ɛ nŋau wa kpã wa iju, awa do Lafɛ̃ɛ nwa Dagɔ̃ɔ fei.

⁸ Ŋɔi à bɛ inɛ gɔ ŋa a koo a kpe ilaalui inɛi Filisi ŋau fei wa. Iyi ilaalu ŋau à to wa nɔ à bee ŋa à ni, bɛirei aa ka ceò kpakou ihɛ̃. Nɔ à jɛ nŋa à ni, i tekĩɛ hai ihɛ̃ i soo i bɔò ilui Gati ŋa. Ŋɔi à ce bɛɛbɛ.

⁹ Amma iyi à tekĩò kpakou wa Gati bɛ, Aɔ̃ Lafɛ̃ɛ í kpã aŋa mɔ iju. Inɛ fei hai ama keeke hee ku bɔ do inɛ ngbo fei à so bɔ̃ɔ dimi akãu. Aŋa fei njo í mu ŋa ntɔ ntɔ.

¹⁰ Gbakã ŋɔi à so kpakou à bɔò Ekorɔ̃ɔ. Iyi à toò kpakou inɔ iluu ŋɔi inɛi ilu ŋau à wasi ku dɔ̃ anu à ni, wee ì so kpakou ì naaò wa ihɛ̃ ŋa na mba i kpa awa mɔ fei ŋa.

¹¹ Ŋɔi à bɛ inɛ gɔ ŋa a koo a kpe ilaalu nŋa ŋa wa. Iyi à to wa nɔ à sɔ̃ ŋa à ni, i sindo kpakoi Lafɛ̃ɛi inɛi Izirɛli ŋau agbɛɛ ŋa. Bii kù jɛ bɛɛbɛ Lafɛ̃ɛ nŋau á kpa awa fei. Do ntɔ, njo í mu inɛi ilu ŋau fei domi Ilaaɔ̃ í kpã ŋa iju jiida jiida.

¹² Inɛ ŋa iyi à gbe a kù ku ŋau mɔ à so bɔ̃ɔi ngoliu nɔ à gbɔ anu ku dɔ̃ nŋa hee lelei Aɔ̃.