Samuɛli 1, 4 - Bibeli do fee

¹ Nɔ Samuɛli í sɔ̃ inɛi Izirɛli ŋa fei ideu. Ŋɔi ajɔ nŋu gɔ inɛi Izirɛli ŋa à bɔ igũ bi inɛi Filisi ŋa. À koo à ce asɔ kɔkɔi Ebenezɛɛ, nɔ inɛi Filisi ŋa mɔ à ce asɔ ilui Afɛki.

Inɛi Filisi ŋa à so kpakoi akabuui Aɔ̃ Lafɛ̃ɛ

² Ŋɔi à lɔsi igũ ku ce, nɔ inɛi Filisi ŋa à jɛ inɛi Izirɛli ŋau igũ à kpa inɛ zakai dubu mɛɛ.

³ Waati iyi inɛi Izirɛli ŋa à nyi wa asɔ nŋa ŋɔi inɛ ngbo nŋa ŋa à ni, na mii í ce Aɔ̃ Lafɛ̃ɛ í jɔ̀ inɛi Filisi ŋa à jɛ wa igũ nnyi. Debɛi ka bɔ Siloo káa so kpakoi akabuui Aɔ̃ Lafɛ̃ɛ wa. Waati bɛɛbɛ, bii Aɔ̃ Lafɛ̃ɛ í wa anini nwa á faaba wa hai si awɔi mbɛɛ nwa ŋa.

⁴ Na ŋɔi í jɔ̀ à bɛ inɛ gɔ ŋa Siloo bɛ a koo a so kpakoi akabuui Aɔ̃ Lafɛ̃ɛi lele do ilɛ, nŋu iyi wa buba si afei amaleka ŋa iyi à ce si kpakou iyi à ya kpe serubɛ̃ɛ ŋau bɛ. Ŋɔi Ɔfini do Fineɛzi amai Elii ŋau à toò kpakou wa.

⁵ Iyi à toò kpakou wa asɔ nŋau, ŋɔi inɛi Izirɛli ŋa fei à dɔ̃ anu do inɔ didɔ̃ hee ilɛ wa yaya.

⁶ Ŋɔi inɛi Filisi ŋa à gbɔ anu ku dɔ̃u nɔ à ni, na mii í ce inɛi Ebɛɛ ŋa à wasi ku dɔ̃ anu bɛɛbɛ. Iyi à gbɔ kpakoi akabuui Aɔ̃ Lafɛ̃ɛi í to wa bi inɛi Izirɛli ŋa,

⁷ ŋɔi zigi nŋa í da, à waa ni, Lafɛ̃ɛ nŋai í naa bi tu ŋa. Tako wo kù wa bi tu ŋa, amma nsɛi ijuukpã nwai.

⁸ Aa. Ntɔi, ijuukpã nwai. Yooi á yɔkɔ ku nya wa hai si awɔi Lafɛ̃ɛ ilu gbugbã nŋa, nŋu iyi í dasi inɛi Ezibiti ŋa wahala dimi ikã ikã fei si gbaau.

⁹ Ka koo do wɔɔkɔ bɛi inɛmɔkɔ ŋa na mba ka maà na ka jɛ arui inɛi Ebɛɛ ŋa bɛi aŋa mɔ à tako à jɛ aru nwa wo. Ka ba ŋa ku ja do wɔɔkɔ.

¹⁰ Ŋɔi inɛi Filisi ŋau à dede igũ má à kãmia inɛi Izirɛli ŋau ntɔ ntɔ. Ŋɔi inɛi Izirɛli ŋau fei à sa. Inɛ fei í sa í nɛ ilei acɔɛ. Amanɛ dubu kuntaai í ku ajɔ nŋu.

¹¹ Nɔ Ɔfini do Fineɛzi, amai Elii ŋau mɔ à ku. Ŋɔi inɛi Filisi ŋau à so kpakoi akabuui Aɔ̃ Lafɛ̃ɛu à nɛò.

Ikui Elii do ti aboi Fineɛzi

¹² Nɔ ajɔ nŋu bɛ inɛi dimii Bɛnzamɛɛ gɔ í sa wa hai bi ku ce igũ í bɔ Siloo bɛ. Í ga ibɔɛ nɔ í kosi iriɛ sãa ku nyisi inɔ kufɔɛ.

¹³ Waati bɛɛbɛ Elii wa buba itĩ kpãau bɛ wa degbe inɛ iyi á naaò laabaaui igũ wa, si na iyi í jɔ̀ zigiɛ wa daò kpakoi akabuui Ilaaɔ̃u. Iyi inɛɛu í lɔ inɔ iluu wa, ŋɔi í sɔ̃ inɛ ŋa laabaaui igũu nɔ aŋa fei à wasi ku dɔ̃ anu à waa kpata.

¹⁴ Iyi Elii í gbɔ anu ku dɔ̃u ŋɔi í ni, yoomai í jɛ yaasei anu ku dɔ̃u. Gbakã ŋɔi inɛɛu í toò laabaau wa bi tɛɛ.

¹⁵ Wee Elii í nɛ adɔ̃ cinɛò fɛɛwa do mɛɛjɔ nɔ í fɛɛju.

¹⁶ Ŋɔi inɛɛu í sɔ̃ Elii í ni, hai bi igũ bɛi ǹ sa wa nnyi. Ŋɔi Elii í beeɛ í ni, amam, bɛirei í ce.

¹⁷ Ŋɔi í jɛaa í ni, awa inɛi Izirɛli ŋa à saa inɛi Filisi ŋa domi à kpa si wa inɛ nkpɔ. Iyi í re mɔm à kpa amaɛ ŋa Ɔfini do Fineɛzi nɔ à so kpakoi akabuui Ilaaɔ̃ à nɛò.

¹⁸ Waati iyi Elii í gbɔ à so kpakou ŋɔi í cuku kaiya hai si kitãɛ kɔkɔi gamboi koofai iluu. Ŋɔi kpakɔɛ í lɛgɛ nɔ í ku si na iyi í jɔ̀ í gbo nɔ araɛ í wo. Nŋui í jɛ inɛ ngboi inɛi Izirɛli ŋa adɔ̃ ciiji.

¹⁹ Aboi Fineɛzi, amai Eliiu í wɛɛò asĩ nɔ í maai kubí. Iyi í gbɔ à so kpakou nɔ anaɛ do mɔkɔɛ à ku, ŋɔi ara kuroi kubí í naa siɛ nɔ í gulɛ í bí.

²⁰ Amma ara kurou í tosiɛ hee wa bi ku ku, ŋɔi inaabo ŋa iyi à wa kɔkɔɛ à sɔ̃ɔ à ni, maà ce njo, domi ama inɛmɔkɔi ì bí. Amma kù ce laakaii ide iyi à waa sɔ̃ɔ nɔ kù jɛ nŋa ide kãma.

²¹ Si anyii nŋu, ŋɔi í sɔ amau Ikabɔdu, waatɔ amboe kù wɛɛ má. Í ni, amboei Ilaaɔ̃ í sɛkɛɛ hai si inɛi Izirɛli ŋa. Í fɔ bɛɛbɛi si na iyi í jɔ̀ à so kpakou nɔ mɔkɔɛ do Elii à ku.

²² Í ni má, ntɔi, amboei Ilaaɔ̃ kù wa si anini nwa má domi mbɛɛ nwa ŋa à nɛò kpakoɛ.