Samuɛli 1, 31 - Bibeli do fee

Ikui Saulu

¹ Inɛi Filisi ŋa à bɔ igũ si inɛi Izirɛli ŋa si antaii iri kutai Giliboa. Ŋɔi inɛi Izirɛli ŋa à waa sa nɔ à kpa si ŋa inɛ bututu.

² Ŋɔi inɛi Filisi ŋau à waa lele Saulu do amaɛ ŋa nɔ à kpa Zonatãa do Abinadabu do Maliki-Sua amai Saulu ŋau.

³ Nɔ igũu í mante Saulu ntɔ ntɔ nɔ woo ta afa ŋau à taa à mɛɛ nla nla.

⁴ Ŋɔi Saulu í sɔ̃ woo so jĩnɛi igũɛu í ni ku yɔ taakubaɛ wa nɔ ku naa ku kpa nŋu ku ba inɛi Filisi hai bu bango ŋau a maà naa a kpa nŋu a bɛi a maa nyaanyiò. Amma inɛ iyi wa so jĩnɛi igũu í kɔ̀, domi zigiɛ í da ntɔ ntɔ. Nɔ Saulu takaɛ í so taakubau í cuku í sɛɛbata si imɔɛ.

⁵ Si bɛi woo so jĩnɛi igũu í yɛ Saulu í ku, ŋɔi nŋu mɔ í ce bɛɛbɛ nɔ aŋa fei à ku ajɔ.

⁶ Bɛɛbɛi ajɔ akãu bɛ Saulu do ama inɛmɔkɔ mɛɛtaɛ ŋa do woo so jĩnɛi igũɛ do inɛɛ ŋa fei à ku ajɔ.

⁷ Nɔ inɛi Izirɛli ŋa iyi ide nŋa í wa si lɔɔmai kutau do ikpa alala ihɔ̃ do inɛ ŋa iyi à wa icei idoi Zuudɛ̃ɛu à gbɔ iyi sooge nŋa ŋa à waa sa, nɔ à kpa Saulu do amaɛ ŋa, ŋɔi aŋa mɔ à fita hai inɔ ilu nŋa ŋau à waa sa. Nɔ inɛi Filisi ŋa à naa à buba si ilu ŋau.

⁸ Iyi iju í má, ŋɔi inɛi Filisi ŋau à bɔ jĩnɛi iku ŋau ku ko, nɔ à yɛ ikui Saulu do ama mɛɛtaɛ ŋa si antaii iri kutai Giliboau.

⁹ Ŋɔi à bu irii Saulu nɔ à so jĩnɛi igũɛ ŋa. Si anyiɛ nɔ à bɛ inɛ ŋa a koo a sisia inɛ fei laabaau jiidau si ilɛ nŋa fei hee do bi iwɛ̃ nŋa ŋa.

¹⁰ Jĩnɛi igũi Saulu iyi à sou, à koo à dasi inɔ ilei iwɛ̃ nŋa iyi à ya kpe Asitaate à bɛi à kɔa ikuɛ si bindii Bɛti-Sãa.

¹¹ Iyi inɛi Yabɛsi-Galaadi ŋa à gbɔ bɛi inɛi Filisi ŋa à cea Saulu,

¹² ŋɔi inɛmɔkɔ ilu wɔɔkɔ ŋau fei à dede à waa koo bɛ. Iyi à nɛ idũ akã ŋɔi à to nɔ à nya ikui Saulu do ti amaɛ ŋa wa hai si antaii bindiu, à baaò ŋa wa Yabɛsi à naa à jo ŋa bɛ.

¹³ Nɔ à so kũkũ nŋa ŋa iyi à gbe à koo à suu si abɛi jĩi ndii bombom iyi í wa Yabɛsi bɛ à bɛi à dĩ anu ajɔ mɛɛje.