Samuɛli 1, 30 - Bibeli do fee

Inɛi Amalɛki ŋa à ce asɔɔi Sikilagi

¹ Ajɔ mɛɛtasiaɛ ŋɔi Davidi do inɛɛ ŋa à to Sikilagi nɔ à ba wee inɛi Amalɛki ŋa à naa à ce asɔɔ si ilɛi Zudaa do ikpa awɔ cangai kpãai inunu do si ilui Sikilagi. Iyi à to wa à lɛgɛ iluui nɔ à dasi ina.

² Si anyiɛ nɔ à mu inaabo ŋa do inɛ ŋa iyi à wa bɛ fei hai ama keeke hee do inɛ ngbo ŋa fei. Amma a kù kpa inɛ kãma, à mu ŋai à nɛò ŋa.

³ Iyi Davidi do inɛɛ ŋa à lɔ inɔ iluu ŋɔi à ba wee à jo ile nŋa ŋau nɔ à mu abo nŋa ŋa do ama nŋa ŋa má à nɛò ŋa.

⁴ Ŋɔi Davidi do inɛɛ ŋa à kpata hee à kua gbugbã iyi aa dɔ̃ò anu má.

⁵ Mbɛɛ ŋau à mu abo minjii Davidi ŋau, Ahinoamu inɛi Yizireɛli do Abigali inɛi Kaamɛli jaaɔ̃i Nabaliu.

⁶ Ŋɔi Davidi í wɛɛò inɔ kufɔ nla nla domi inɛɛ ŋa à waa bi a taa kuta a kpaa domi aŋa fei à wɛɛò inɔ kufɔ na amu ŋa iyi à mu. Amma Davidi í yɔkɔ temua nɔ Aɔ̃ Lafɛ̃ɛɛ í kɔ̃ɔa si gbugbã.

⁷ Ŋɔi Davidi í sɔ̃ Abiataa amai Ahimelɛki woo weeu í ni ku soa nŋu efodu wa. Nɔ Abiataa í soo wa.

⁸ Ŋɔi Davidi í bee Aɔ̃ Lafɛ̃ɛ í ni, n lele inɛi Amalɛki ŋau bɛ? An ba ŋa? Ŋɔi Aɔ̃ Lafɛ̃ɛ í jɛaa í ni, lele ŋa, domi aa ba ŋa, nɔ aa faaba inɛɛ ŋa.

^9-10 Ŋɔi Davidi í dasi kpãa do inɛ cĩɔ mɛɛfaɛ ŋa. Iyi à to idoi Bɛsɔɔ iyi wa cã do gbugbã ŋɔi amanɛ cĩɔ minji í leekĩ bɛ domi à gbɛɛji hee í caa nɔ a kaa yɔkɔ a kua. Nɔ Davidi do inɛ cĩɔ mɛɛ ŋa iyi à gbeu à dasi kpãa à waa nɛ.

¹¹ Si inɔ sako bii à waa nɛu ŋɔi à yɛ inɛi Ezibiti gɔ nɔ à gbãa à naaɛ wa bi Davidi. Ŋɔi à náa pɛ̃ɛ do inyi ku mɔ.

¹² Nɔ à náa kaai isoi figi do isoi rezɛ̃ɛ ngbɛ saa minji má. Iyi í jɛ í tã ŋɔi araɛ í baa, domi í ce wo zakai dasã mɛɛta do idũ mɛɛta kù jɛ kù mɔ.

¹³ Ŋɔi Davidi í beeɛ í ni, awɔi yoo. Hai iwoi ì waa naa. Nɔ í jɛaa í ni, amu awaasũi Ezibitii, ǹ wa n jɛ arui inɛi Amalɛki gɔ. Nɔ í to ajɔ mɛɛta wa iyi inɛ ngbom í nɛ̀ í jɔ̀m si na iyi í jɔ̀ n kù wa n nɛ baani.

¹⁴ Awai à tako à koo à ce asɔɔ si ilɛi inɛi Kereti ŋa do si ti inɛi Zudaa ŋa do si ti inɛi Kalɛbu ŋa do ikpa awɔ cangai kpãai inunu, nɔ awai à jo Sikilagi.

¹⁵ Ŋɔi Davidi í beeɛ í ni, aa yɔkɔ i sim bii inɛi Amalɛki ŋau bɛ à wa? Ŋɔi í jɛaa í ni, bii ì jɛsi do irii Ilaaɔ̃ fei i kaa kpam nɔ i kaa bɔɔm bi inɛ ngbom, an gbãɛ ka bɔ hee bi inɛi Amalɛki ŋau.

Davidi í jɛ inɛi Amalɛki ŋa igũ

¹⁶ Ŋɔi awaasũu í gbã Davidi í bɔòɛ hee bi inɛi Amalɛki ŋa, nɔ í ba wee à waa tɛ si ilɛu à wasi ku jɛ nɔ à waa mɔ à waa jojo si na iyi í jɔ̀ à so amani nla nla wa hai ilɛi inɛi Filisi ŋa do ilɛi Zudaa.

¹⁷ Ŋɔi Davidi í lɔ si ŋa í kpa ŋa hai amɛɛjuumáu hee alɛ í koo í lɛu, nɔ baa akã nŋa kù ba kù fita si, í gbe awaasũ cĩɔ mɛɛ gɔ ŋa iyi à gũ kpookpo ŋa à saò.

¹⁸ Nɔ Davidi í gba amani nŋau fei wa hai bi inɛi Amalɛki ŋa, nɔ í gba abo minjiɛ ŋau mɔ wa.

¹⁹ Inɛ kãma kù gaizia hai ama keeke ku bɔ inɛ ngbo, hai ama inɛmɔkɔ hee do inaabo fei, hai amani nŋau hee do mii ŋa iyi à so fei, Davidi í baaò fei ndɛɛ wa.

²⁰ Nɔ í gba angudã gaa gɔ ŋa má do kɛtɛ gaai inɛi Amalɛki ŋa, nɔ inɛ ŋa iyi à waa gbã mɛɛmu ŋau à waa ni, iyi ihɛ̃i í jɛ mii ŋa iyi Davidi í ba wa hai si igũu.

²¹ Iyi Davidi wa to kɔkɔi inɛ cĩɔ minji ŋa iyi à gbɛɛji nɔ à mɔngɔ ku tooɛ à gbe idoi Bɛsɔɔ, ŋɔi aŋa mɔ à dede à waa ko ŋa wa. Ŋɔi Davidi í tɛkɛɛ si ŋa nɔ í ce ŋa fɔɔ.

²² Nɔ si inɔi inɛ ŋa iyi à bɔ igũu, ilu inɔ kukã do hai nɛ araare gɔ ŋa à waa ni, si bɛi inɛ cĩɔ minji ŋau a kù si wa igũu, a kaa ka mu nŋa nkãma si amani ŋa iyi à ba wa, í gbe abo nŋa ŋa do ama nŋa ŋa iyi aa ka sindo nŋa a bɔò.

²³ Amma Davidi í ni, iŋɛ inɛm ŋa, i maà ce bɛɛbɛ si mii ŋa iyi Aɔ̃ Lafɛ̃ɛ í mu nwa, domi nŋui í bii anyi nwa nɔ í so inɛi Amalɛki ŋa iyi à tako à ce asɔɔi ilu nwa í da nwa si awɔ.

²⁴ Inɛ kãma kaa jɛ nŋɛ si ide iyi ì waa fɔ ŋa. Ikpɛ̃ zaka akãui inɛ fei á ba, hai inɛ iyi í bɔ igũ hee do inɛ iyi í gbe bi aso ŋau fei.

²⁵ Nɔ bɛɛbɛi à ya maa ce hai ajɔ nŋu bɛ hee ku baa nnyi. Nɔ iyi bɛ í baa í jɛ woodai inɛi Izirɛli ŋa.

²⁶ Iyi à baa inɔ ilu Sikilagi, ŋɔi Davidi í samba fiti mbɔi amaniu bi inɛ ngboi ilɛi Zudaa ŋa iyi à jɛ kpaasiɛ ŋa nɔ í sɔ̃ ŋa í ni, amua nŋɛ mbɛ si amani ŋa iyi à gba wa hai bi mbɛɛi Aɔ̃ Lafɛ̃ɛ ŋa.

²⁷ Bɛɛbɛi í sambaa inɛ ngboi Betɛli ŋa, do inɛ ngboi Ramɔti ŋa do inɛ ngboi Yatii ŋa,

²⁸ do inɛ ngboi Aroɛɛ ŋa, do inɛ ngboi Sifimɔti ŋa do inɛ ngboi Esitemɔa ŋa,

²⁹ do inɛ ngboi Rakali ŋa, do inɛ ngboi ilui Yerameɛli ŋa do inɛ ngboi ilui Keni ŋa,

³⁰ do inɛ ngboi Ɔɔma ŋa, do inɛ ngboi Borasãa ŋa, do inɛ ngboi Ataki ŋa,

³¹ do inɛ ngboi Eborɔ̃ɔ ŋa hee do ilu bii Davidi do inɛɛ ŋa à buba wo fei.