Samuɛli 1, 3 - Bibeli do fee

¹ Amma Samuɛli wa cea Aɔ̃ Lafɛ̃ɛ icɛ si wajui Elii. Waati bɛɛbɛ Aɔ̃ Lafɛ̃ɛ ci ya kpɔò ku ba amanɛ ide ku fɔ nɔ ci ya jɔ̀ ku ce kuyɛ waati kãma fei.

Aɔ̃ Lafɛ̃ɛ í cica Samuɛli ku jɛ walii

² Wee ijui Elii woo weeu kù waa yɛ ilu sãa sãa má. Idũ ajɔ nŋu gɔ wa sũ tengi bii í nɛ dɔ̃ɔnɛɛ.

³ Samuɛli mɔ wa sĩ njoo si inɔ kpasɛ̃i Aɔ̃ Lafɛ̃ɛ. Wee kpakoi akabuui Ilaaɔ̃ mɔ í wa inɔ ileu. Hee iju ku maa má, waati iyi fitilai kpasɛ̃u wa má,

⁴ ŋɔi Aɔ̃ Lafɛ̃ɛ í kpe Samuɛli. Nɔ Samuɛli í jɛ í ni, amu wee.

⁵ Nɔ í dede í sɛi í bɔ bi Elii í ni, ǹ gbɔ ì kpem, amu wee. Amma Elii í ni, n kù kpeɛ, nyi i koo sũ. Nɔ Samuɛli í nyi í koo í sũ.

⁶ Ŋɔi Aɔ̃ Lafɛ̃ɛ í nyi í kpe Samuɛli má. Nɔ Samuɛli í dede í bɔ bi Elii í ni, ǹ gbɔ ì kpem, amu wee. Amma Elii í ni, n kù kpeɛ amam. Nyi i koo i sũ má.

⁷ Wee waati bɛɛbɛ Samuɛli kù mà Aɔ̃ Lafɛ̃ɛ domi Aɔ̃ Lafɛ̃ɛ kù baa ide ku fɔ titã.

⁸ Ŋɔi Aɔ̃ Lafɛ̃ɛ í kpe Samuɛli má isɛ gbɛɛtasia. Nɔ Samuɛli í dede í bɔ bi Elii má nɔ í ni, ǹ gbɔ ì kpem, amu wee. Bɛbɛi Elii í mà iyi Aɔ̃ Lafɛ̃ɛi wa kpe amau.

⁹ Ŋɔi í sɔ̃ Samuɛli bɛbɛi í ni, nyi i koo i sũ. Nɔ bii inɛ gɔ í kpeɛ jɛaa i ni, fɔ ide Aɔ̃ Lafɛ̃ɛ, domi amu woo ce icɛɛ ǹ wa n gbɔ. Nɔ Samuɛli í nyi í koo í sũ agbɛɛ.

¹⁰ Ŋɔi Aɔ̃ Lafɛ̃ɛ í nyi wa má í naa í leekĩ bɛ nɔ í kpe Samuɛli bɛi í tako í kpoou wo. Ŋɔi Samuɛli í jɛaa í ni, fɔ ide, domi amu woo ce icɛɛ ǹ wa n gbɔ.

¹¹ Ŋɔi Aɔ̃ Lafɛ̃ɛ í sɔ̃ Samuɛli í ni, wee an jɔ̀ wahala nla nla gɔ ku naa si inɛi Izirɛli ŋa, inɛ iyi í gbɔɔ fei á ya muu bitii.

¹² Ide laalɔ ŋau iyi ǹ wãò Elii do inɛɛ ŋa, si ajɔ nŋu bɛi an jɔ̀ fei ndɛɛ fei ku kɔ̃.

¹³ Ǹ tako ǹ sɔ̃ɔ wo iyi an kpã inɛi kpasɛ̃ɛ ŋa iju hee do ajɔ fei na dulum iyi amaɛ ŋa à ce. Amaɛ ŋau a kù saalum nɔ do iyi í nɛ kumàsiɛ fei, kù ganji ŋa.

¹⁴ Na ŋɔi í jɔ̀ ǹ fɔ do kugbasi ǹ ni kuwee kãma do amua kãma iyi inɛi kpasɛ̃i Elii ŋa aa ce kaa yɔkɔ ku jɔ̀ n kpa dulum du ŋa pai.

¹⁵ Ŋɔi Samuɛli í sũ má hee iju í má, í bɛi í koo í cĩ gamboi kpasɛ̃i Aɔ̃ Lafɛ̃ɛ. Amma wa ce njo ku sɔ̃ Elii kuyɛ iyi í ce.

¹⁶ Ŋɔi Elii í kpoo wa í ni, amam Samuɛli. Nɔ Samuɛli í jɛ í ni, amu wee.

¹⁷ Nɔ Elii í ni, ide yoomai Ilaaɔ̃ í baɛ ku fɔ. Sɔ̃m fei sãa sãa. Bii i kù sɔ̃m fei sãa sãa, Ilaaɔ̃ kú kpãɛ iju ntɔ ntɔ.

¹⁸ Ŋɔi Samuɛli í sɔ̃ɔ ide ŋau fei sãa sãa, kù singa kãma. Nɔ Elii í ni, to. Aɔ̃ Lafɛ̃ɛ ku ce bɛi í bi.

¹⁹ Ŋɔi Samuɛli í la wa koo. Aɔ̃ Lafɛ̃ɛ í wɛɛ do nŋu, nɔ í jɔ̀ ide iyi í fɔ fei í ya cei.

²⁰ Nɔ bɛɛbɛi si ilɛi Izirɛli fei hai Dãa hee ku bɔ Bɛɛseba inɛ ŋa à mà iyi Samuɛli í jɛ waliii Aɔ̃ Lafɛ̃ɛ do ntɔ.

²¹ Aɔ̃ Lafɛ̃ɛ í mɔsi í ya maa nyisi araɛ Siloo bɛ bi Samuɛli ku maa baa ide ku fɔ.