Samuɛli 1, 29 - Bibeli do fee

Inɛi Filisi ŋa à nya Davidi hai inɔi sooge nŋa ŋa

¹ Ŋɔi inɛi Filisi ŋa à tɔtɔɔ wuaai sooge nŋa ŋa fei Afɛki, nɔ inɛi Izirɛli ŋa mɔ à ce asɔ kɔkɔi isɔ̃i Yizireɛli.

² Ŋɔi ilaalui Filisi ŋa à waa cua wuaai sooge cĩɔ nŋa ŋa do ti dubu nŋa ŋa, nɔ Davidi do inɛɛ ŋa mɔ à wa anyi nŋa wa do Akisi ilaalui Gati.

³ Ŋɔi inɛ ngboi Filisi ŋa à bee Akisi à ni, mii inɛi Ebɛɛ ŋau ihɛ̃ à waa ce ihɛ̃. Ŋɔi Akisi í jɛ nŋa í ni, i kù mà Davidi ŋa, nŋu iyi í tako wa jɛ akawei Saulu ilaalui Izirɛli wo? Awaò à wɛɛ í kpɛ, nɔ n kù yɛ taale kãma siɛ hai waati iyi í to wa hee ku baa nnyi.

⁴ Amma idɔi inɛ ngbo ŋau í kɔ̃ si Akisi nɔ à sɔ̃ɔ à ni ku jɔ̀ Davidi ku sinda ku nyi ilu bii í tako í jilɔɔ wo. Nɔ ku maà too aŋa bi ku ce igũ ku ba ku maà na ku sinda si aŋa bii à waa ce igũ. Nɔ à ni má, bɛirei á ce ku nɛ bɛɛrɛ si wajui Saulu má, bii kù jɛ í jɔ̀ Saulu í to inɛ nwa ŋa awɔ sisi.

⁵ Ka maà gbɛjɛ iyi Davidiu ihɛ̃i inaabo ŋa à cĩ wo à waa jojou à waa ni, Saulu í kpa amanɛ dubu, nɔ Davidi í kpa amanɛ dubu mɛɛwa.

⁶ Ŋɔi Akisi í kpe Davidi nɔ í sɔ̃ɔ í ni, hee do irii Aɔ̃ Lafɛ̃ɛ fei, ǹ yɛ iyi awɔ inɛ dee deei nɔ ǹ bi awaɛ ka bɔ bi ku ce igũ domi n kù yɛ daa laalɔ kãma siɛ hai waati iyi ì to wa bi tom hee ku baa nnyi. Amma inɛ ngbo kpaasim ŋa a kù bi ideɛ.

⁷ Na nŋu, sinda i bɔ do laakai ku sũ ku ba ku maà fɔ inɔ nŋa.

⁸ Ŋɔi Davidi í bee Akisi í ni, awɔ ilaalu lafɛ̃ɛm, daa yoomai ǹ ce. Mà mii ì yɛ sim hai waati iyi ǹ wa bi tɛɛ iyi á jɔ̀ n kaa n siɛ igũ bi mbɛɛɛ ŋa.

⁹ Nɔ Akisi í jɛaa í ni, ǹ mà iyi i kù ce daa kãma, domi ì nɛ bɛɛrɛ bi tom bɛi amalekai Ilaaɔ̃. Amma inɛ ngbo nwa ŋa à ni i kaa too wa igũu.

¹⁰ Na nŋu, i dede hai amɛɛjuumá ŋa awɔ do inɛɛ ŋa nɔ i dasi kpãa i nɛ ŋa bii inya í sinti ku má.

¹¹ Ŋɔi Davidi do inɛɛ ŋa à daja à nyi ilɛi inɛi Filisi ŋa, nɔ inɛi Filisi ŋau mɔ à nɛ ilui Yizireɛli.