Samuɛli 1, 28 - Bibeli do fee

¹ Si waati nŋu bɛ inɛi Filisi ŋa à tɔtɔɔ sooge nŋa ŋa ku ba a bɔ igũ si ilɛi Izirɛli. Nɔ Akisi í sɔ̃ Davidi í ni, jɔ̀ i mà iyi aa toom igũ, awɔ do inɛɛ ŋa.

² Ŋɔi Davidi í jɛaa í ni, ntɔ ntɔ, aa yɛ bɛi amu amaacɛɛ an ce. Nɔ Akisi í sɔ̃ɔ í ni, bii bɛɛbɛi, an soɛ i jɛ sooge woo degbem hee do ajɔ fei.

Saulu í bɔ alisi ilui Eni-dɔɔ

³ Si waati iyi Samuɛli í ku inɛi Izirɛli fei í kpata akũɛ nɔ à suu inɔ iluɛ Rama. Wee í ko Saulu í ganji woo ce alisi ŋa do woo ba iku ŋa ide ku fɔ a ce icɛ nŋa si ilɛu.

⁴ Ŋɔi ajɔ nŋu gɔ soogei Filisi ŋa à naa à ce asɔ kɔkɔi Sunɛmu. Nɔ Saulu mɔ í tɔtɔɔ inɛi Izirɛli ŋa fei nɔ à koo à ce asɔ kɔkɔi Giliboa.

⁵ Iyi Saulu í hɔ̃nnɛ asɔi soogei inɛi Filisi ŋa, ŋɔi zigiɛ í da hee wa yaya.

⁶ Ŋɔi í tɔɔ Aɔ̃ Lafɛ̃ɛ, amma Aɔ̃ Lafɛ̃ɛ kù jɛaa baa si ala, hee má jɛ hai si urimui woo weeu, walakɔ hai bi walii ŋa.

⁷ Ŋɔi Saulu í sɔ̃ akaweɛ ŋa í ni a dɛdɛa nŋu inaabo iyi í ya ba iku ŋa ide ku fɔ wa ku ba nŋu koo ce kubeeɛ. Ŋɔi à jɛaa à ni, abo gɔ í wa Endɔɔ iyi í ya ba iku ŋa ide ku fɔ.

⁸ Ŋɔi Saulu í dasi ibɔ mmu ŋa í kpaasiò araɛ í bɛi wa bɔ Eni-dɔɔ do mɔkɔ minji gɔ ŋa. Iyi idũ í dũ ŋɔi à to bi abou. Ŋɔi Saulu í sɔ̃ɔ í ni, kpeem iku gɔ wa iyi an sɔ̃ɛ iriɛ ku ba n ce kubee.

⁹ Ŋɔi abou í jɛaa í ni, ì mà sãa sãa iyi Saulu í ganji alisi ku ce do iku ŋa ku ba ide ku fɔ si ilɛu. Na mii í ce ì naa ì waa siim ku ba a kpam.

¹⁰ Ŋɔi Saulu í sɔ̃ɔ í ni, ntɔ ntɔ a kaa ceɛ laalɔ kãma hee do irii Aɔ̃ Lafɛ̃ɛ fei.

¹¹ Ŋɔi abou í beeɛ í ni, yooi ì bi n jɔ̀ ku fita wa. Ŋɔi í jɛaa í ni, jɔ̀ Samuɛli ku fita wa.

¹² Iyi abou í yɛ Samuɛli ŋɔi í dɔ̃ anu hee lele nɔ í bee Saulu í ni, na mii í ce ì lɛlɛɛm. Asee awɔi Saulu?

¹³ Ŋɔi Saulu í sɔ̃ɔ í ni, maà ce njo. Fɔ mii iyi ì waa yɛ. Nɔ abou í ni, ǹ wa n yɛ zĩi gɔ iyi wa fita wa hai ilɛ.

¹⁴ Ŋɔi Saulu í beeɛ í ni, bɛirei í yɛ. Ŋɔi í jɛaa í ni, mɔkɔ ngbo gɔi wa fita wa, wa dasi kumboo. Ŋɔi Saulu í mà iyi Samuɛlii, nɔ í kɔmba iriɛ í sɛɛbata hee ilɛ.

¹⁵ Ŋɔi Samuɛli í bee Saulu í ni, na mii í ce ì dede laakaim ì jɔ̀ ǹ fita wa. Ŋɔi Saulu í jɛaa í ni, ǹ wa si inɔ kufɔ nla nlai. Inɛi Filisi ŋa à waa bam igũ ku ce, nɔ Ilaaɔ̃ í tɛkɛɛ hai bi tom. Í kɔ̀ ku jɛɛm baa hai bi walii ŋa, walakɔ hai si ala ŋa. Na ŋɔi í jɔ̀ ǹ kpeɛ wa ku ba i sɔ̃m mii iyi an ce.

¹⁶ Ŋɔi Samuɛli í ni, bɛirei í ce ì naa ì waa beem ide si bɛi ì mà tã iyi Aɔ̃ Lafɛ̃ɛ í sɛkɛɛ hai bi titɛɛ nɔ wa jɛ mbɛɛɛ.

¹⁷ Aɔ̃ Lafɛ̃ɛ á kpãɛ iju bɛi ǹ tako ǹ sɔ̃ɛ wo. Á gba bommau hai si awɔɛ nɔ ku na Davidi.

¹⁸ Si bɛi ì kɔ̀ ku jirima idei Aɔ̃ Lafɛ̃ɛ si waati iyi í ni i kpa inɛi Amalɛki ŋau fei i sãò idɔɔkɔ̃ɛ si ŋa, na ŋɔi í jɔ̀ í kɔ̀siɛ nnyi.

¹⁹ Nɔ mɔm Aɔ̃ Lafɛ̃ɛ á so ŋɛ, awɔ do inɛi Izirɛli ŋa fei ku daa inɛi Filisi ŋa si awɔ. Nɔ ala awɔ do amaɛ ŋa fei aa kpa ŋɛ nɔ awaò ŋɛ ŋa ka naa ka wa inya akã ihɛ̃. Nɔ Aɔ̃ Lafɛ̃ɛ ku so wuaai soogei inɛi Izirɛli ŋa ku daa inɛi Filisi ŋa si awɔ.

²⁰ Iyi Saulu í gbɔ idei Samuɛli gbakã ŋɔi í cuku hee ilɛ, domi idei Samuɛliu í jɔ̀ zigiɛ í da hee í caa. Iyi í re mɔm, í kua gbugbã domi kù jɛ sɔnda kãma hai dasã hee do idũ waati bɛɛbɛ.

²¹ Ŋɔi abou í naa kɔkɔi Saulu. Iyi í yɛ bɛi zigiɛ í da ŋɔi í sɔ̃ɔ í ni, wee ǹ gbɔ ide iyi ì fɔ nɔ ǹ jirimaɛ n kù saalu baa kuwɛɛm.

²² Awɔ mɔ, gbɔ ide iyi an fɔ bɛbɛi. Jɔ̀ n naaɛ sɔnda wa i jɛ ku ba i nɛ gbugbã i dasiò kpãa.

²³ Amma Saulu í kɔ̀ ku jɛ. Ŋɔi akaweɛ ŋa do abou à wasi ku manteɛ hee í na í jɛsi nɔ í dede hai ilɛ í buba si antaii daayi.

²⁴ Ŋɔi abou í so ama kɛtɛ ku dɔ̃ ara gɔ iyi wa sɛ̃, nɔ í jɔ̀ a kpaa gbãa gbãa nɔ í so iyafũ í fɔɔ nɔ í ceò pɛ̃ɛ hai nɛ levɛ̃ɛ.

²⁵ Ŋɔi í so sɔndau wa í naa í jilɛa Saulu do akaweɛ ŋa, nɔ à jɛ à bɛi à dede à nɛ idũu bɛ.