Samuɛli 1, 27 - Bibeli do fee

Davidi í koo í manji ilɛi inɛi Filisi ŋa má

¹ Ŋɔi Davidi í fɔ si idɔɛ í ni, bii n kù ce laakai, ajɔ akã Saulu á naa ku kpam. Nkãma kù gbeem má bii kù jɛ n sa n koo n manji si ilɛi inɛi Filisi ŋa ku ba Saulu ku maà maa dɛdɛm si ilɛi Izirɛli bii fei. Bɛɛbɛi an ba n fitaò hai si awɔɛ.

² Nɔ Davidi í dede do inɛ cĩɔ mɛɛfaɛ ŋa à bɔ bi Akisi ilaalui Gati amai Maɔku.

³ Nɔ Davidi do inɛɛ ŋa à koo à buba Gati bi Akisi. Inɛ fei í kooi do kpasɛ̃ɛ ŋa. Nɔ Davidi takaɛ í koo do abo minjiɛ ŋa Ahinoamu inɛi Yizireɛli do Abigali inɛi Kaamɛli jaaɔ̃i Nabaliu.

⁴ Iyi Saulu í gbɔ à ni Davidi í sa í nɛ Gati, ŋɔi kù waa leleɛ má.

⁵ Ajɔ nŋu gɔ Davidi í sɔ̃ Akisi í ni, bii ì gbam do inɔ akã, jɔ̀ n koo n buba si ilu akãi ilɛu tengi bii an ba n wa, domi kù sĩa awaɛ ka maa tɔtɔɔ si ilu akã bii à ya jɛ bomma ihɛ̃.

⁶ Nɔ ajɔ nŋu bɛ Akisi í na Davidi Sikilagi. Na ŋɔi í jɔ̀ Sikilagi í jɛ ilui ilaalui Zudaa ŋa hee ku baa nnyi.

⁷ Davidi í ce adɔ̃ akã do cukpa mɛɛ ilɛi inɛi Filisi ŋa bɛ.

⁸ Hai Sikilagi bɛi Davidi do inɛɛ ŋa à koo à zamba inɛi Gesuu ŋa do inɛi Girizi ŋa do inɛi Amalɛki ŋa, aŋa iyi à tako à wa bɛ wo hai ku kpɛ. Ilɛ nŋa í sinti hai anyii Suu hee ku bɔ ilɛi Ezibiti.

⁹ Bii Davidi do inɛɛ ŋa à koo si ilui inɛ ŋau à ya kpa inɛi ilu ŋaui fei mam mam, hai inɛmɔkɔ ŋa hee ku koo si inaabo ŋa. Nɔ à ya ko nyau nŋa ŋai do angudã nŋa ŋa do iwo nŋa ŋa do kɛtɛ nŋa ŋa do gbankɛlɛ nŋa ŋa do kpookpo nŋa ŋa a bɛi a sinda a baa bi Akisi.

¹⁰ Nɔ bii Akisi í bee ŋa hee iwoi à koo à ko mii ŋau bɛ wa, à ya ni, si ilɛi Zudaai do ikpa awɔ cangai kpãai inunu, walakɔ ti inɛi Yerameɛli ŋa walakɔ ti inɛi Keni ŋa.

¹¹ Amma Davidi kù jɔ̀ inɛ kãma njaawɛ, domi kù bi a naa Gati bɛ a fɔ mii iyi wa ce. Nɔ bɛɛbɛi í ce si waatii kuwɛɛɛ fei si ilɛi inɛi Filisi ŋa.

¹² Nɔ Akisi í naanɛ Davidi ntɔ ntɔ domi wa tamaa bɛi mii ŋa iyi wa ceò bɛ á jɔ̀ inɛi Izirɛli ŋa a cóoi, nɔ ku baa ku jɛ woo ce icɛɛ hee do ajɔ fei.