Samuɛli 1, 26 - Bibeli do fee

Davidi í kɔ̀ Saulu ku kpa má

¹ Ŋɔi inɛi Zifu ŋa à bɔ Gibea à koo à sɔ̃ Saulu à ni, Davidi wee wa manji si geetei Hakila ikpa nunui daakɔ si gbaau.

² Ŋɔi Saulu í dede wa bɔ Davidi ku dɛdɛ ikpa gbaai Zifu, nŋu do sooge dubu mɛɛta ŋa (3.000) iyi í cica si ilɛi Izirɛli.

³ Nɔ à koo à ce asɔ si geetei Hakila, kɔkɔi gbaau si itĩ kpãa. Hai gbaau Davidi í gbɔ iyi Saulu í naa wa dɛdɛɛ,

⁴ nɔ í bɛ inɛ gɔ ŋa a koo a cɔ mà ntɔi, nɔ à ba wee ntɔ ntɔ Saulu í to wa.

⁵ Ŋɔi Davidi í dede í bɔ tengi bii Saulu ŋa à ce asɔu nɔ í yɛ agbɛ bii Saulu í ya sũ do Abinɛɛ amai Nɛɛ, inɛ ngboi soogeɛ ŋa. Í ya sũi hee aninii asɔu nɔ soogeɛ ŋa mɔ à kaakoɛ.

⁶ Ŋɔi Davidi í kpe Ahimelɛki inɛi Hɛtiu do Abisai ifɔi Zoabu amai Seruya í bee ŋa í ni, yoo nŋɛi i bi ku sim asɔi Saulu. Nɔ Abisai í ni, amu an siɛ.

⁷ Iyi idũ í dũ ŋɔi Davidi do Abisai à bɔ asɔ nŋa, ŋɔi à ba wee Saulu wa sĩ njoo hee aninii asɔu nɔ kakaɛ wa gũ si ilɛ bi ku to iriɛ. Nɔ Abinɛɛ do sooge ŋau à sũ à kaakoɛ.

⁸ Ŋɔi Abisai í sɔ̃ Davidi í ni, Ilaaɔ̃ í so mbɛɛɛ í daɛ si awɔ mbɛ idũuyi. Jɔ̀ n koo n gũu kaka n máa si ilɛ bɛ. Kaka anu akã í to, n kaa n nɛ bukaatai n siaa si má mɔm.

⁹ Amma Davidi í ni, aawo. Maà kpaa, domi inɛ iyi í kpa inɛ iyi Aɔ̃ Lafɛ̃ɛ í cica, Aɔ̃ Lafɛ̃ɛ á yɛ taaleɛ.

¹⁰ Ǹ wa n sɔ̃ɛi hee do irii Aɔ̃ Lafɛ̃ɛ fei, Aɔ̃ Lafɛ̃ɛ takaɛi á sãa gbeseɛ. Á yɔkɔ ku jɔ̀ ku ku walakɔ a kpaa si igũ.

¹¹ Amma amu Aɔ̃ Lafɛ̃ɛ ku maà jɔ̀ n cea inɛ iyi Aɔ̃ Lafɛ̃ɛ í cica laalɔ kãma. Na nŋu, ka so kaka iyi í wa bi ku to iriɛ do jɔlɔi inyiɛu ka nɛò.

¹² Ŋɔi Davidi í koo í so kakau do jɔlɔi inyi iyi í wa bi ku to irii Saulu à nɛò. Inɛ kãma kù yɛ ŋa nɔ inɛ gɔ kù mà mii iyi à ce mɔm, nɔ baa akã nŋa ku jĩ domi Aɔ̃ Lafɛ̃ɛ í jɔ̀ à waa sĩ njoo mam mam.

¹³ Ŋɔi Davidi í kita hai si iri kutau nɔ í koo í gũ hee si antaii iri kuta jĩijĩ mmu gɔ.

¹⁴ Ŋɔi wa sɛ̃ɛ irii Abinɛɛ wa ni, Abinɛɛ, jɛɛm. Nɔ Abinɛɛ í jɛaa í ni, ì waa tamaa bɛi aa yɔkɔ i maa dɔ̃ anu wa si ilaalu?

¹⁵ Ŋɔi Davidi í sɔ̃ɔ í ni, i kù jɛ inɛmɔkɔi? Si inɔi soogei ilɛi Izirɛli ŋa, kãma kù jɛ saaɛ. To, bɛirei í ce i kù yɔkɔ i kù degbe ilaalu lafɛ̃ɛɛ. I kù mà iyi inɛ gɔ í naa ku kpaa?

¹⁶ Mii iyi ì ceu bɛ kù sĩa, hee do irii Aɔ̃ Lafɛ̃ɛ fei, í to a kpa ŋɛ si na iyi í jɔ̀ i kù wɔ njoo i kù degbe lafɛ̃ɛ nŋɛ, ilaalu iyi Aɔ̃ Lafɛ̃ɛ í cica. Bɛbɛi, cɔ bi ku to irii ilaaluu. Iwoi kakaɛ do jɔlɔi inyiɛ í wa.

¹⁷ Ŋɔi Saulu í mà imui Davidi nɔ í ni, imuɛi ǹ wa n gbɔ ntɔ ntɔ Davidi, amam? Nɔ Davidi í jɛaa í ni, oo, amui, ilaalu lafɛ̃ɛm.

¹⁸ Bɛirei í ce ì waa lelem, amu woo ce icɛɛ. Taale yoomai ǹ ce, mà daa yoomai ǹ ceɛ.

¹⁹ Bɛbɛi, sotĩ i gbɔ ide iyi ǹ wa n fɔ. Bii í jɛ Aɔ̃ Lafɛ̃ɛi wa tale siɛ ì waa ceem bɛɛbɛ jɔ̀ ka ceaa kuwee iyi á tũ idɔɛ. Amma bii í jɛ amanɛ ŋai à waa tale siɛ, Aɔ̃ Lafɛ̃ɛ ku ceekpe ŋa, domi à waa lelem nii hai si ilɛ iyi Aɔ̃ Lafɛ̃ɛ í jilɛa inɛɛ ŋa. Í yɛi bɛi à waa ni n koo n tɔɔ iwɛ̃ ŋa.

²⁰ Amma nsɛi maà jɔ̀ n koo n ku si ilɛ mmu bii an jĩò Aɔ̃ Lafɛ̃ɛ. Amu iyi ì waa dɛ ku kpa n kù re baa gãi nɔ ì waa lelem bɛi kpau iyi tobi wa lele si antaii iri kuta.

²¹ Ŋɔi Saulu í ni, amui ǹ ce dulum. Baa wa Davidi amam, domi n kaa n ceɛ laalɔ gɔ má si na iyi í jɔ̀ ì saalu kuwɛɛm idũ ana nɔ i kù kpam. Ǹ ce bɛi sũmu nɔ ǹ ceò kurara nla nla.

²² Ŋɔi Davidi í ni, kakaɛ wee ihɛ̃. Jɔ̀ inɛ gɔ ku naa ku gbaa.

²³ Aɔ̃ Lafɛ̃ɛ í ya sãa inɛ feii si bɛi naanɛ do dee dee ku jɛɛ í to. Wee Aɔ̃ Lafɛ̃ɛ í soɛ í daam si awɔ idũ ana, amma n kù bi n lesi inɛ iyi Aɔ̃ Lafɛ̃ɛ í cica awɔ.

²⁴ Si bɛi ǹ yɛ kuwɛɛɛ í nɛ bɛɛrɛ nnyi, bɛɛbɛ mɔi Aɔ̃ Lafɛ̃ɛ á jɔ̀ kuwɛɛm ku nɛaa bɛɛrɛ nɔ ku nyam hai si wahala baa yooma fei.

²⁵ Ŋɔi Saulu í sɔ̃ Davidi í ni, Ilaaɔ̃ ku weeɛ, awɔ amam. Mii iyi ì waa dɛ fei Ilaaɔ̃ ku muuɛ. Nɔ Davidi í sinda í nɛ, nɔ Saulu mɔ í bɔ ideɛ.