Samuɛli 1, 25 - Bibeli do fee

Nabali í kɔ̀ Davidi ku sobi

¹ Si waati nŋu bɛi Samuɛli í ku nɔ inɛi Izirɛli ŋau fei à tɔtɔɔ à kpata akũɛ. Nɔ à suu Rama si inɔ kpasɛ̃ɛ. Si anyiɛ nɔ Davidi í bɔ si gbaai Parãa.

² Mɔkɔ ilu amani nla nla gɔ í wa Maɔ̃ɔ. Í nɛ angudã dubu mɛɛta (3.000) do iwo dubu akã (1.000). Ikoɛ í wa kɔkɔi ilui Kaamɛli, nɔ ajɔ nŋu gɔ mɔkɔu í bɔ Kaamɛli ntoi angudãɛ ŋa ku ja.

³ Mɔkɔui à ya kpe Nabali si dimii Kalɛbu, aboɛ mɔ Abigali. Abou í sĩa nɔ í nɛ laakai, amma mɔkɔu í gaabu nɔ í nɛ inɔ kukã.

⁴ Davidi í wa si gbaau nɔ hai bɛi í gbɔ iyi Nabali wa ja ntoi angudãɛ ŋa.

⁵ Ŋɔi í bɛ siɛ awaasũ mɛɛwa a koo a coo fɔɔ ilui Kaamɛli bɛ,

⁶ a ni, Ilaaɔ̃ ku jɔ̀ hundeɛ ku sɔ, nɔ ku muuɛ laakai ku sũ, awɔ do kpasɛ̃ɛ do mii iyi ì nɛ fei.

⁷ Lafɛ̃ɛ nwa Davidi í gbɔ iyi woo ja ntoi angudãɛ ŋau à waa ce icɛ bi tɛɛ. Nɔ wee waati iyi awa do woo degbe mɛɛmuɛ ŋa à wa Kaamɛli ihɛ̃ a kù ce nŋa taale kãma nɔ a kù jɛ inɛ gɔ ku ce ŋa ile.

⁸ Aa yɔkɔ i bee woo ce icɛɛ ŋau nɔ aa sɔ̃ɛ a ni ntɔi. Na nŋu, Davidi wa tɔɔɛ si ajɔi jingau ihɛ̃ i gba wa bi tɛɛ nɔ i mu nwa mii iyi aa yɔkɔ i na wa, awa do Davidi woo ce icɛɛ ŋa.

⁹ Iyi awaasũ ŋau à to bi Nabali, ŋɔi à sɔ̃ɔ ide ŋa iyi Davidi í bɛ ŋaò wau fei nɔ à waa degbeɛ.

¹⁰ Ŋɔi Nabali í jɛ nŋa í ni, yooi à ya kpe Davidi amai Izai. Si awaati bii à wa siu ihɛ̃ aru ŋa aŋa nkpɔ nkpɔi à ya maa sa hai bi lafɛ̃ɛ nŋa ŋa.

¹¹ Ì waa tamaa an so pɛ̃ɛ do inyi do iŋa iyi n cea woo ja ntoi mɛɛmum ŋa n koo n na inɛ ŋa iyi n kù mà baa hai iwoi à waa naa? Aawo.

¹² Ŋɔi awaasũ ŋau à sinda à nyi wa bi Davidi à naa à sɔ̃ɔ ide iyi Nabali í fɔ fei.

¹³ Ŋɔi Davidi í sɔ̃ inɛɛ ŋa í ni inɛ fei ku so taakubaɛ. Nɔ aŋa fei à so taakuba nŋa ŋa nɔ Davidi mɔ í so titɛɛ. Nɔ zakai amanɛ cĩɔ mɛɛ (400) í tooɛ, amanɛ cĩɔ minji (200) mɔ í gbe bi aso nŋau.

Abigali í naa Davidi ku sobi

¹⁴ Ŋɔi inɛ akãi woo ce icɛi Nabali ŋau í koo í sɔ̃ Abigali aboi Nabali í ni, wee Davidi í bɛ inɛ ŋa wa hai gbaau a naa a ce lafɛ̃ɛ nwa fɔɔ, amma í la si ŋai.

¹⁵ Do nŋu fei bi tu wa inɛ jiida ŋai. A kù ce nwa taale kãma nɔ a kù jɛ inɛ gɔ ku ce wa ile si waati iyi awaò ŋa ŋa à wa bi ku degbe.

¹⁶ Aŋai à bii anyi nwa dasã do idũ waati iyi à waa degbe mɛɛmu nwa ŋa bi tu ŋa.

¹⁷ Bɛbɛi lasabu, nɔ i cɔ bɛi aa ce, domi kù nɛ sika kãma laalɔu á naa si lafɛ̃ɛ nwa do si kpasɛ̃ɛ fei. Nɔ lafɛ̃ɛ nwau í gaabu í jɔ̀ baa inɛ kãma ci ya baa ide ku fɔ.

¹⁸ Bɛ gbakã ŋɔi Abigali í so pɛ̃ɛ cĩɔ minji do bɔgɔ batai vɛ̃ɛ minji do angudã miiu iyi à se, do inyamale nantaa miiu iyi à sɔ̃, do isoi rezɛ̃ɛ ngbɛ saa cĩɔ do kaai isoi figi ngbɛ ikɔ cĩɔ minji í kãa gbankɛlɛɛ ŋa.

¹⁹ Nɔ í sɔ̃ amaacɛɛ ŋa í ni, i maa cuam ŋa nɔ n maa n too ŋɛ wa. Amma kù sɔ̃ mɔkɔɛ Nabali ide kãma.

²⁰ Ŋɔi í gũ gbankɛlɛɛ í too do alalai iri kuta iyi wa de kpãau tɛɛ. Nɔ wee Davidi do inɛɛ ŋa à waa kòo wa.

²¹ Waati bɛɛbɛ Davidi wa fɔ si inɔɛ wa ni, icɛ iyi ǹ cea mɔkɔu bɛ si inɔ gbaau fei ngbɛi. Amui ǹ degbea mɛɛmuɛ ŋa, nɔ inɛ gɔ kù ce ile baa akã nŋa, nɔ wee nsɛi laalɔi wa sãam si jiida iyi ǹ ceaa.

²² Ilaaɔ̃ ku kpãm iju bii ǹ jɔ̀ iju í má í ba Nabali do inɛ iyi í jɛ inɛmɔkɔ si inɔ kpasɛ̃ɛ bɛ fei.

²³ Iyi Abigali í hɔ̃nnɛ Davidi ŋɔi í kita gbãa gbãa hai antaii gbankɛlɛɛ nɔ í sɛɛbataa Davidi hee ilɛ

²⁴ í ni, amui ǹ ce kurarau, lafɛ̃ɛm. Jɔ̀ n baɛ ide ku fɔ, amu woo ce icɛɛ, nɔ i gbɔ iyi an fɔ.

²⁵ Maà saalu idei Nabali domi à sɔɔ iri à báa, si bɛi à waa kpoo Nabali, waatɔ nnyɛi, nɔ ntɔ ntɔ sũmui. Amma amu n kù yɛ awaasũ ŋa iyi ì bɛ wau.

²⁶ Bɛbɛi ǹ mà kãm kãm iyi Aɔ̃ Lafɛ̃ɛi í ganjiɛ i naa i kpa inɛ ŋa i sãò gbesei laalɔ iyi Nabali í ceɛ. Mbɛɛɛ ŋa do inɛ ŋa iyi à bi a ceɛ laalɔ Aɔ̃ Lafɛ̃ɛ ku kpã ŋa iju bɛi á cea Nabali mɔ.

²⁷ Gba amua iyi ǹ naaɛ wa, lafɛ̃ɛm, nɔ i kpɛ̃a inɛ ŋa iyi à waa tooɛ.

²⁸ Ǹ wa n tɔɔɛi i ceem suurui kuraram. Nɔ ǹ mà iyi ntɔ ntɔ Aɔ̃ Lafɛ̃ɛ kaa jɔ̀ bommau ku fita hai si kpasɛ̃ɛ, domi awɔ mɔ ì waa ba mbɛɛi Aɔ̃ Lafɛ̃ɛ ŋa igũ ku ce. Aɔ̃ Lafɛ̃ɛ kú maà jɔ̀ i ce laalɔ ajɔ kãma si kuwɛɛɛ fei.

²⁹ Baa do iyi inɛ gɔ wa leleɛ nɔ wa dɛ ku kpaɛ, Aɔ̃ Lafɛ̃ɛɛ á bii anyiɛ nɔ ku faabaɛ, amma á nya hundei mbɛɛɛ ŋa ku nyɔɔ hee jĩijĩ bɛi kutai atavim.

^30-31 Na nŋu, maà kpa inɛ ŋa si ngbɛ i sãò gbese. Nɔ waati iyi Aɔ̃ Lafɛ̃ɛ á na ku ceɛ jiida ŋa iyi í tako í fɔu fei nɔ ku soɛ i jɛ ilaalui inɛi Izirɛli ŋa i kaa ni, bii ǹ mà wo, nɔ i kaa yɛ taalei araɛ. Waati iyi Aɔ̃ Lafɛ̃ɛ á ceɛ jiidau, jɔ̀ i ye gigim.

³² Ŋɔi Davidi í sɔ̃ Abigali í ni, ǹ saabu Aɔ̃ Lafɛ̃ɛi inɛi Izirɛli ŋa si na iyi í jɔ̀ í bɛɛ wa nnyi nɔ ì naa ku kom.

³³ Ilaaɔ̃ ku weeɛ na bisi jiidaɛ iyi ì nɛ ì ganjim do n kpaò inɛ ŋa nɔ n sã gbese.

³⁴ Amma Aɔ̃ Lafɛ̃ɛi inɛi Izirɛli ŋa í ganjim n ce laalɔ. Bii kù jɛ ì saasa ì kom wa wo, inɛmɔkɔ kãma kaa gbea Nabali hee iju ku maa má.

³⁵ Ŋɔi Davidi í gba amua ŋa iyi Abigali í naaò wau. Nɔ í sɔ̃ɔ í ni, Ilaaɔ̃ ku siɛ ide baani. Ǹ gbɔ ide iyi ì fɔ nɔ an ce bɛi ì bi.

Ikui Nabali, Davidi í so Abigali

³⁶ Waati iyi Abigali wa to wa inɔ kpasɛ̃, nɔ í ba wee Nabali wa jɛ jingau nla gɔ bɛi jingaui ilaalu ŋa. Í wɛɛò inɔ didɔ̃ nɔ atɛ̃ wa kpaa, nɔ Abigali kù sɔ̃ɔ ide kãma hee iju í koo í máò.

³⁷ Amma iyi iju í má atɛ̃u í fo siɛ, ŋɔi Abigali aboɛ í naa í sɔ̃ɔ ide ŋa iyi í ce fei. Ŋɔi ideu í gũu hee í kasãm.

³⁸ Si anyii ajɔ mɛɛwa ŋɔi Aɔ̃ Lafɛ̃ɛ í jɔ̀ í ku.

³⁹ Iyi Davidi í gbɔ ikui Nabali ŋɔi í ni, ǹ wa n saabu Aɔ̃ Lafɛ̃ɛ si na iyi í jɔ̀ í sãa Nabali laalɔ iyi í ceem do arabu iyi í bum. Ǹ wa n saabuɛ si na iyi í jɔ̀ í ganjim n ce laalɔ, nɔ í jɔ̀ inɔ kukãi Nabali í cuku si antaiɛ. Si anyiɛ ŋɔi Davidi í bɛ inɛ ŋa wa a koo a bee Abigali bii á jɛ nŋu ku soo ku jɛ aboi nŋu.

⁴⁰ Iyi amaacɛi Davidi ŋau à to ilui Kaamɛli bi titɛɛ ŋɔi à sɔ̃ɔ à ni, Davidii í bɛ wa wa bi tɛɛ ku ba ka soɛ wa i jɛ aboɛ.

⁴¹ Ŋɔi Abigali í dede í sɛɛbata hee ilɛ nɔ í ni, ǹ tã sɔɔlu n jɛ arui lafɛ̃ɛm nɔ n ya n maa n wiɛ kutɛi amaacɛɛ ŋa.

⁴² Ŋɔi í dede gbãa gbãa í gũ gbankɛlɛ, nɔ mudɛ̃ɛ miiu woo ce icɛɛ ŋau à suu. Aŋa fei à too woo bɛi Davidi ŋau nɔ í koo í so Davidi í jɛ mɔkɔɛ.

⁴³ Nɔ wee Davidi í tako í so Ahinoamu hai Yizireɛli, nɔ aŋa minji fei à jɛ aboɛ ŋa.

⁴⁴ Amma í ko Saulu í gba amaɛ Mikali abo sintei Davidiu tã í na Paati amai Laisi inɛi Galimu.