Samuɛli 1, 24 - Bibeli do fee

Davidi í kɔ̀ Saulu ku kpa

¹ Hai bɛ má ŋɔi Davidi í koo í buba Eni-Gedi si iri kuta ŋa.

² Waati iyi Saulu í baa hai bi inɛi Filisi ŋa ku lele ŋɔi à naa à sɔ̃ɔ má à ni, Davidi wee í wa gbaai Eni-Gedi.

³ Ŋɔi Saulu í cica sooge dubu mɛɛta (3.000) si inɛi Izirɛli fei nɔ à dede à bɔ Davidi do inɛɛ ŋa ku dɛdɛ hee antaii kuta iyi à ya kpe kutai iwoi ido ŋa.

⁴ Ŋɔi í to gaa bii angudã ŋa à wa si kɔkɔi itĩ kpãau nɔ í yaa angule í bɔ si inɔ isai kuta gɔ. Nɔ wee Davidi do inɛɛ ŋa mɔ à wa hee lɛlɛi isai kutau.

⁵ Ŋɔi inɛi Davidi ŋa à sɔ̃ɔ à ni, ajɔ iyi Aɔ̃ Lafɛ̃ɛ wa fãaui ihɛ̃ si bii í ni, ajɔ gɔ wa naa iyi an so mbɛɛɛ n daɛ si awɔ ku ba i ceaa bɛi ì bi. Ŋɔi Davidi í dede sɛ̃ɛ í koo í bu itĩi ibɔi Saulu do kumanji.

⁶ Si anyiɛ ŋɔi inɔɛ í fɔ si na iyi í jɔ̀ í bu itĩi ibɔi Saulu.

⁷ Ŋɔi í sɔ̃ inɛɛ ŋa í ni, Aɔ̃ Lafɛ̃ɛ ku maà jɔ̀ n lesi lafɛ̃ɛm Saulu awɔ hee ku jɛ n kpaa, domi Aɔ̃ Lafɛ̃ɛi í cicaɛ ku jɛ ilaalu.

⁸ Ide iyi Davidi í fɔu bɛi í ganji inɛɛ ŋa a kpa Saulu. Ŋɔi Saulu í dede í fita hai inɔ isau nɔ í dasi kpãa wa nɛ.

⁹ Iyi Saulu í fita wa nɛ gbakã ŋɔi Davidi mɔ í fita wa hai inɔ isau nɔ í wasi ku dɔ̃ anu wa kpoo í ni, lafɛ̃ɛm ilaalu. Ŋɔi Saulu í sinda í cɔ anyi nɔ Davidi í sɛɛbataa hee ilɛ.

¹⁰ Nɔ í sɔ̃ɔ í ni, bɛirei í ce ì waa gbɔ idei inɛ ŋa iyi à waa ni ǹ wa n dɛdɛ ku ceɛ laalɔ.

¹¹ Awɔ takaɛ í yɔɔ bɛbɛi do ijuɛ iyi Aɔ̃ Lafɛ̃ɛ í soɛ í daam si awɔ si inɔ isai kutau ihɛ̃. Inɛm ŋa à sɔ̃m à ni n kpaɛ amma ǹ jɔ̀ɛ nɔ ǹ ni, n kaa n lesi lafɛ̃ɛm iyi Aɔ̃ Lafɛ̃ɛ í cicau awɔ.

¹² Awɔ baam, cɔ itĩi ibɔɛ iyi ǹ wa n mu si awɔm. Si bɛi ǹ bu itĩi ibɔɛ wa nɔ n kù kpaɛ, jɔ̀ i mà iyi n kaa n ceɛ laalɔ n kaa n kɔ̀siɛ nɔ n kù ce kurara bi titɛɛ ajɔ kãma. Amma awɔ ì waa dɛdɛ kpãa bɛi aa ce i kpam do.

¹³ Aɔ̃ Lafɛ̃ɛi á kiiti awaɛ nɔ nŋui á kpãɛ iju si laalɔ iyi ì ceem amma amu takam n kaa n lesiɛ awɔ.

¹⁴ Mɔndai tako gɔ í ni, hai bi ilu inɔ kukã ŋai laalɔ wa naa. Amma amu n kaa n lesiɛ awɔ.

¹⁵ Awɔ ilaalui Izirɛli, yooi ì wasi ku dɛdɛ. Amui. Ì waa lelem, amu iyi n kù re aja iku walakɔ gãi.

¹⁶ Aɔ̃ Lafɛ̃ɛi á kiiti wa. Nŋui wa cɔ wa nɔ nŋui á bii anyim. Nŋui á nam ntɔ nɔ ku nyam hai si awɔɛ.

¹⁷ Iyi Davidi í ba Saulu ide ku fɔ í tã, ŋɔi Saulu í ni, amam Davidi, awɔi ì waa bam ide ku fɔ? Ŋɔi í dɔ̃ anu wa kpata.

¹⁸ Nɔ í sɔ̃ Davidi í ni, awɔ ì jɛ dee dee ì rem, domi ì ceem jiida nɔ amu ǹ wa n ceɛ laalɔ.

¹⁹ Nnyi ì nyisim jiida ku jɛɛ, domi Aɔ̃ Lafɛ̃ɛ í som í daɛ si awɔ amma i kù kpam.

²⁰ Bii inɛ gɔ í ko mbɛɛɛ í ya jɔ̀ ku nɛ do baaniɛi? Aɔ̃ Lafɛ̃ɛ ku sãɛ jiida iyi ì ceem nnyiu ihɛ̃.

²¹ Bɛbɛi ǹ mà kãm kãm iyi awɔi aa na i jɛ ilaalui inɛi Izirɛli ŋa [si anyim], nɔ bommau kaa fita hai si awɔɛ.

²² Bɛbɛi naa ceem kuwã do irii Aɔ̃ Lafɛ̃ɛ iyi si anyii ikum i kaa gbɛjɛ idem do nyaanzem ŋa nɔ i kaa kpa tɔkum ŋa má.

²³ Nɔ Davidi í ce kuwãu do kugbasi. Si anyiɛ Saulu í dede í bɔ ide nɔ Davidi do inɛɛ ŋa mɔ à nyi bi ku manji nŋa.