Samuɛli 1, 23 - Bibeli do fee

Davidi í faaba inɛi Kela ŋa

¹ Ŋɔi à naa à sɔ̃ Davidi à ni, wee inɛi Filisi ŋa à bɔ Kela igũ ku ce nɔ à bɔ bii à waa kpokpo iya ŋau à wasi iyau ku ko.

² Ŋɔi Davidi í tɔɔ Aɔ̃ Lafɛ̃ɛ í ni, í sĩa n koo n ba inɛi Filisi ŋau bɛ igũ ku ce? Ŋɔi í jɛaa í ni, koo ba ŋa igũ ku ce nɔ i faaba inɛi Kela ŋa.

³ Amma inɛ ŋa iyi à wa bi Davidi à sɔ̃ɔ à ni, wee njo wa mu wa si ilɛi Zudaau ihɛ̃. Bii à dede à bɔ Kela igũ ku ce má bɛbɛi njou á la ku caa.

⁴ Nɔ Davidi í tɔɔ Aɔ̃ Lafɛ̃ɛ má nɔ Aɔ̃ Lafɛ̃ɛ í jɛaa í ni, dede i koo, domi an so inɛi Filisi ŋau n daɛ si awɔ.

⁵ Ŋɔi Davidi do inɛɛ ŋa à bɔ Kela nɔ à ba inɛi Filisi ŋau igũ ku ce. Nɔ í kpa inɛ nkpɔ nŋa nɔ í mu mɛɛmu nŋa ŋa wa. Bɛɛbɛi Davidi í faabaò inɛi Kela ŋa.

⁶ Waati iyi Abiataa amai Ahimelɛkiu í sa í bɔ bi Davidi Kela bɛ, í kooi do efodu [iyi à ya tɔɔò Aɔ̃ Lafɛ̃ɛ].

⁷ Iyi Saulu í gbɔ iyi Davidi í bɔ Kela ŋɔi í ni, Ilaaɔ̃ í soo í daam si awɔ bɛbɛi, domi í koo í cĩmbo araɛ si inɔ ilu iyi í nɛ gambo do isɔ ku nɛ gbugbã ŋa.

⁸ Nɔ í tɔtɔɔ soogeɛ ŋa fei ku ba a koo a bu ilui Kelau koe, nɔ a mu Davidi do inɛɛ ŋa.

⁹ Davidi í gbɔ mii laalɔ iyi Saulu wa dɛdɛ ku cea nŋu, ŋɔi í sɔ̃ Abiataa woo weeu í ni ku naaò efodu wa.

¹⁰ Ŋɔi í ce kutɔɔ í ni, Aɔ̃ Lafɛ̃ɛi inɛi Izirɛli ŋa, ǹ gbɔ iyi Saulu wa ce sɔɔlu ku naa Kela ihɛ̃ ku naa ku lɛgɛ iluu na irim.

¹¹ Inɛ ngboi ilu ŋau ihɛ̃ aa jɔ̀ ku tom awɔ? Si bɛi ǹ gbɔu, ntɔ ntɔi Saulu á naa? Ǹ tɔɔɛi i jɛɛm. Nɔ Aɔ̃ Lafɛ̃ɛ í jɛaa í ni, Saulu á naa.

¹² Ŋɔi Davidi í ni má, inɛ ngboi ilu ihɛ̃ ŋa aa jɔ̀ ku to wa awɔ, amu do inɛm ŋa? Nɔ Aɔ̃ Lafɛ̃ɛ í jɛaa í ni, oo. Aa jɔ̀ ku to ŋɛ awɔ.

¹³ Ŋɔi gbakã Davidi í dede do inɛɛ ŋa zakai aŋa cĩɔ mɛɛfa (600) à fita hai Kela nɔ à koo à waa dabii inɔ sako. Iyi Saulu í gbɔ Davidi í sa hai Kela ŋɔi í kpaasi idɔ kù koo siɛ má.

¹⁴ Ŋɔi Davidi í koo í manji si gbaai Zifu si inɔ lɔkɔlɔkɔi kuta ŋau. Nɔ ajɔ fei Saulu í ya maa dɛdɛɛi, amma Ilaaɔ̃ kù jɔ̀ ku too awɔ pai.

¹⁵ Si bɛi Davidi í mà Saulu í wasi ku dɛdɛ nŋu, ŋɔi í buba si ilui Ɔrɛsi si gbaai Zifuu.

¹⁶ Ajɔ nŋu gɔ ŋɔi Zonatãa amai Saulu í dede í bɔ bi Davidi ilui Ɔrɛsi bɛ, nɔ í kɔ̃ɔa si gbugbã si idei Ilaaɔ̃,

¹⁷ í ni, maà ce njo má, domi Saulu kaa baɛ. Awɔi aa naa i jɛ bommai Izirɛli nɔ amu mɔ n jɛ minjisiaɛ. Nɔ baa Saulu baam takaɛ í mà sãa sãa.

¹⁸ Ŋɔi aŋa minji fei à dĩ akabuu si wajui Aɔ̃ Lafɛ̃ɛ. Si anyiɛ Zonatãa í bɔ ide, amma Davidi í gbe Ɔrɛsi bɛ.

Saulu wa dɛdɛ Davidi

¹⁹ Ŋɔi inɛi Zifu ŋa à bɔ Gibea à koo à sɔ̃ Saulu à ni, Davidi wee wa manji ikpa ilɛ nwa ihɔ̃ si lɔkɔlɔkɔi kuta ŋa iyi à wa kɔkɔi ilui Ɔrɛsi, si geetei Hakila ikpa awɔ cangai kpaai inunu si gbaau.

²⁰ Si bɛi ì waa dɛdɛ ku kpaa ntɔ ntɔ, ilaalu, naa wa aa ka jɔ̀ i too awɔ.

²¹ Ŋɔi Saulu í ni, Aɔ̃ Lafɛ̃ɛ ku wee nŋɛ si na iyi í jɔ̀ ì ce araarem ŋa.

²² Bɛbɛi i nyi má ŋa nɔ i koo i teese i bee tengi bii í ya bɔ, do inɛ iyi í koo í yɔɔ. Ǹ mà sãa sãa Davidi í nɛ bisi hee í caa.

²³ I koo i cɔ bi ku manjiɛ fei wa ŋa nɔ i ce zɛɛzɛgɛi inya ŋau wa ŋa. Si anyiɛ nɔ awaò ŋɛ ŋa ka koo ajɔ. Bii í wa si ilɛ nwa ihɛ̃i an dɛdɛɛi tengi bii í lɔ fei si dimii Zudaa ŋa.

²⁴ Ŋɔi inɛ ŋau à cua wa à tako Saulu à baa Zifu. Waati bɛɛbɛ Davidi mɔ í tekĩ í bɔ si gbaai Maɔ̃ɔ si lɔɔma ikpa awɔ cangai kpaai inunu si gbaau.

²⁵ Ŋɔi Saulu do soogeɛ ŋa à bɔ Davidi ku dɛdɛ. Iyi Davidi í gbɔ Saulu wa naa nɔ í sa í bɔ si iri kuta nla gɔ iyi í wa si inɔ gbaai Maɔ̃ɔu. Iyi Saulu í gbɔ bii í wa má ŋɔi í bɔ ku dɛdɛɛ do ikpa bɛ.

²⁶ Ŋɔi Saulu wa too cingaai iri kutau, nɔ Davidi do inɛɛ ŋa mɔ à waa too cingaa ikpa alala inya mmu. Ŋɔi Davidi wa dɛdɛ kpãa bɛi á ce ku saa Saulu do saasa amma í gbe keeke Saulu do soogeɛ ŋa a ba a kaako ŋa.

²⁷ Tengi bɛ gbakã ŋɔi inɛ gɔ í naa í sɔ̃ Saulu í ni, baa wa ńya ńya, domi inɛi Filisi ŋa à faata wa si ilɛ nwa.

²⁸ Gbakã ŋɔi Saulu í jɔ̀ Davidi ku lele nɔ í sinda í bɔ inɛi Filisi ŋa ku ba. Na ŋɔi í jɔ̀ à ya kpe inyau bɛ Kutai njɛ ku fɛɛfɛ.