Samuɛli 1, 22 - Bibeli do fee

Davidi í jɛ inɛ ngboi wuaai inɛ gɔ ŋa

¹ Hai bɛ má ŋɔi Davidi í sa í koo í manji inɔ isai kuta iyi í wa kɔkɔi ilui Adulamu. Igbãɛ ŋa do inɛi kpasɛ̃i baaɛ ŋa fei à gbɔ bii í wa nɔ aŋa mɔ à dede à bɔ bi tɛɛ.

² Inɛ ŋa iyi à wa si wahala do inɛ ŋa iyi à waa mu gbese hee ku koo si inɛ ŋa iyi inɔ nŋa ci ya dɔ̃ fei à naa à tɔtɔɔ bi tɛɛ nɔ í jɛ inɛ ngbo nŋa. Nɔ do yaase bɛɛbɛi zakai amanɛ cĩɔ mɛɛ (400) í koo bi tɛɛ.

³ Hai bɛ má Davidi í dede í bɔ ilui Misipe ilɛi Moabu. Ŋɔi í sɔ̃ ilaalui Moabu í ni, ǹ wa n tɔɔɛi, jɔ̀ iyeò baam ŋa a naa wa bi tɛɛ hee n mà bɛi Ilaaɔ̃ wa bi ku ceem.

⁴ Nɔ í koo í gbã iyeò baaɛ ŋa wa í bɔò ŋa inɔ kpasɛ̃i ilaaluu. Tengi bɛi à wa si waati iyi Davidi wa manji si iri kutau.

⁵ Ajɔ nŋu gɔ ŋɔi walii iyi à ya kpe Gadi í naa í sɔ̃ Davidi í ni, fita hai bii ì waa manjiu ihɛ̃ i nyi ilɛi Zudaa. Nɔ Davidi í fita í bɔ hee inɔ agbo nlai Herɛti.

Saulu í kpa woo weei Nɔbu ŋa

⁶ Ajɔ nŋu gɔ Saulu wa buba abɛi jĩi ndii bombom gɔ si iri kutai Gibea. Wa mu kakaɛ nɔ akaweɛ ŋa fei à wa bi tɛɛ bɛ. Ŋɔi Saulu í gbɔ laabaaui Davidi do inɛɛ ŋa,

⁷ nɔ í sɔ̃ akaweɛ ŋa í ni, iŋɛ inɛi Bɛnzamɛɛ ŋa i sotĩ i gbɔ ŋa. Ì waa tamaa ŋa bɛi amai Izai inɛi Zudaau bɛ á mu nŋɛ ilɛ do jĩi ndii rezɛ̃ɛ ŋa bɛi amu? Mà ì waa tamaa ŋa á yɔkɔ ku jɔ̀ iŋɛ inɛi Bɛnzamɛɛ ŋa i jɛ inɛ ngboi sooge dubu do ti cĩɔ ŋa. Aawo.

⁸ Na mii í ce ì ce anu akã nɔ ì kɔ̀ ku sɔ̃m ŋa iyi amam í dĩ akabuu do Davidi. Baa akã nŋɛ kù lasabu ku naa ku sɔ̃m waati iyi amam í sɔ̃ inɛɛu bɛ bɛi á ce ku ba kpãa ku kpam do, bɛi wa ce nnyi.

⁹ Doɛgi inɛi Edɔmuu mɔ í wa inɔi akawei Saulu ŋau, ŋɔi í ni, ǹ yɛ amai Izaiu í bɔ Nɔbu bi Ahimelɛki amai Ahitubu.

¹⁰ Nɔ Ahimelɛki í ce kubee bi Aɔ̃ Lafɛ̃ɛ na iriɛ nɔ í náa sɔnda ŋa do taakubai Goliati inɛi Filisiu.

¹¹ Ŋɔi Saulu í bɛ inɛ ŋa a koo a kpe Ahimelɛki woo weeu wa, nŋu do inɛi kpasɛ̃ɛ ŋa iyi à jɛ woo wee si ilui Nɔbu fei. Nɔ aŋa fei à naa si wajui ilaaluu.

¹² Ŋɔi Saulu í ni, sotĩ i gbɔ, awɔ amai Ahitubu. Nɔ í jɛaa í ni, ǹ wa n gbɔ, lafɛ̃ɛm.

¹³ Ŋɔi Saulu í beeɛ í ni, bɛirei í ce iŋɛò amai Izaiu ì ce anu akã ì kɔ̀sim ŋa. Bɛirei í ce ì náa pɛ̃ɛ ŋa do taakuba. Bɛirei í ce ì ce kubee bi Ilaaɔ̃ na iriɛ ku ba ku dɛdɛò kpãa bɛi á ce ku kpam bɛi wa ce nnyi.

¹⁴ Ŋɔi Ahimelɛki í jɛa ilaaluu í ni, si inɔi akaweɛ ŋa fei, kãma nŋa kù nɛ naanɛ kù to Davidi. Awɔi ì waa jɛ anaɛ nɔ nŋu mɔ inɛ ngboi ciikuɛ ŋai. Í nɛ bɛɛrɛ hee í caa si inɔ kpasɛ̃ɛ ihɛ̃.

¹⁵ Kù jɛ ajɔ nŋu bɛi ǹ sinti kubee ku ce na iriɛ bi Ilaaɔ̃. Maà yɛ taalem walakɔ inɛi kpasɛ̃m gɔ. Ntɔ ntɔ n kù mà nkãma si ideu bɛ.

¹⁶ Ŋɔi Saulu í ni, Ahimelɛki, awɔ do inɛi kpasɛ̃ɛ ŋa fei aa kpa ŋɛi.

¹⁷ Ŋɔi í sɔ̃ soogeɛ ŋa iyi à wa kɔkɔɛu í ni, i sinda ŋa i koo i kpa woo weei Aɔ̃ Lafɛ̃ɛ ŋau fei domi aŋai à sobi Davidi. À mà sãa sãa iyi Davidi wa sai nɔ a kù naa a kù sɔ̃m. Amma soogei Saulu ŋa baa akã nŋa kù jɛsi nŋu ku lesi woo weei Aɔ̃ Lafɛ̃ɛ ŋau awɔ hee ku kpa ŋa.

¹⁸ Ŋɔi Saulu í sɔ̃ Doɛgi í ni, sinda i kpa woo wee ŋau. Nɔ í sinda si woo wee ŋau í kpa ŋa. Ajɔ nŋu bɛ í kpa woo wee cinɛ do miiu, aŋa iyi à waa dasi ibɔi efodu iyi à ce do acɔ ku nɛ gbugbã.

¹⁹ Si anyiɛ Saulu í jɔ̀ a bɔ Nɔbu, ilui woo wee ŋau, à kpa inɛmɔkɔ ŋa do inaabo ŋa do amu ŋa do ama kpɔtɔɔ ŋa hee ku koo si do kɛtɛ ŋa do gbankɛlɛ ŋa do angudã ŋa do iwo ŋa fei.

²⁰ Í gbe tɔkui Ahitubu iyi à ya kpe Abiataa amai Ahimelɛkiu nŋu akãi í ba í sa í bɔ bi Davidi.

²¹ Nɔ í sɔ̃ɔ í ni Saulu í kpa woo weei Aɔ̃ Lafɛ̃ɛ ŋau fei.

²² Ŋɔi Davidi í sɔ̃ɔ í ni, ajɔ iyi ǹ naa bɛu ǹ yɛ Doɛgi mɔ í wa Nɔbu bɛ. Ǹ mà kãm kãm á koo ku sɔ̃ Saulu ide ŋau fei. Na irim nii à kpaò nyaanzeɛ ŋa fei.

²³ Bɛbɛi gbe bi tom ihɛ̃ nɔ i maà ce njoi nkãma má. Inɛ iyi wa dɛdɛ ku kpam wa dɛdɛ awɔ mɔ ku kpai. Bii ì wa bi titom an muɛ ku ce ncɛɛ.