Samuɛli 1, 21 - Bibeli do fee

¹ Ŋɔi Davidi í nɛ, nɔ Zonatãa mɔ í nyi inɔ ilu.

Davidi í bɔ Nɔbu bi Ahimelɛki woo weeu

² Ŋɔi Davidi í bɔ Nɔbu bi Ahimelɛki woo weeu. Iyi í to ŋɔi Ahimelɛki í sɛi í kòo wa do njo í ni, na mii í ce awɔ akãi ì waa naa ihɛ̃ nɔ inɛ kãma kù tooɛ wa.

³ Ŋɔi Davidi í jɛaa í ni, ilaalu í dasim icɛ gɔ nɔ í ni n maà n jɔ̀ inɛ kãma ku mà ide iyi nŋu í bɛm do wa. Na ŋɔi í jɔ̀ ǹ naa amu akã nɔ ǹ jilɛ tengi bii awaò inɛm ŋa aa ka kò.

⁴ To, bɛbɛi, sɔnda yoomai ì nɛ. Muum pɛ̃ɛ ara miiu wa, walakɔ mii iyi í wɛɛ fei.

⁵ Ŋɔi woo weeu í jɛaa í ni, n kù nɛ pɛ̃ɛ mmu gɔ ihɛ̃ má bii kù jɛ iyi à jilɛa Aɔ̃ Lafɛ̃ɛ. An yɔkɔ n muuɛ inɛ nŋu bii inɛɛ ŋa a kù tɔtɔɔ sɛ̃ɛ do inaabo ŋa si ajɔ minji ŋau ihɛ̃.

⁶ Ŋɔi Davidi í jɛaa í ni, dimii sɛ̃ɛ ku tɔtɔɔ bɛɛbɛ, à ganji nwa waati iyi à waa bɔ igũ. Bii inɛm ŋa à jɔ̀ jĩnɛ nŋa ŋa à má na icɛ iyi kù jɛ ti Aɔ̃ Lafɛ̃ɛ, bɛirei ti nnyiu ihɛ̃ á yɛ.

⁷ Ŋɔi woo weeu í na Davidi pɛ̃ɛ ŋa iyi à jilɛa Aɔ̃ Lafɛ̃ɛu, si na iyi í jɔ̀ pɛ̃ɛ mmu gɔ kù wɛɛ má. Pɛ̃ɛ ŋau à jilɛa Aɔ̃ Lafɛ̃ɛi wo nɔ à nyaa wa ku ba a sãsi pɛ̃ɛ iyi wa gbãa.

⁸ Ajɔ nŋu bɛ Doɛgi inɛi Edɔmu gɔ í wa bɛ ku ba ku cea Ilaaɔ̃ icɛ gɔ. Nŋui wa jɛ inɛ ngboi woo degbe angudãi Saulu ŋa.

⁹ Ŋɔi Davidi í bee Ahimelɛki í ni, i kù nɛ kaka walakɔ taakuba bɛ? Amu n kù ba n kù so taakubam wa hee má jɛ jĩnɛi igũ gɔ si na iyi í jɔ̀ ilaalu í bi wũau ku ce gbãa gbãa.

¹⁰ Nɔ woo weeu í jɛaa í ni, taakubai Goliati inɛi Filisi iyi ì kpa si inɔi lɔɔmai Elau í wa ihɛ̃. Wa bii do acɔ do alalai efodu. Bii ì bi inɛ nŋu, koo soo, domi mmu gɔ kù wɛɛ má. Nɔ Davidi í ni, gɔgɔ kù wɛɛ má iyi á ce ncɛɛ ku to inɛ bɛ. Naaò inɛ nŋu wa.

Davidi í bɔ Gati bi inɛi Filisi ŋa

¹¹ Ajɔ nŋu bɛ má Davidi í dede í mɔsi wa saa Saulu í nɛ hee bi Akisi ilaalui Gati.

¹² Ŋɔi akawei Akisi ŋa à sɔ̃ɔ à ni, kù jɛ Davidi ilaalui inɛi Izirɛli ŋaui ihɛ̃ ya. Nŋui à kɔ̃a iri à jojoò à waa ni, Saulu í kpa amanɛ dubu, nɔ Davidi í kpa amanɛ dubu mɛɛwa.

¹³ Iyi Davidi í gbɔ ide ŋau, ŋɔi wa ce njoi Akisi ntɔ ntɔ.

¹⁴ Ŋɔi wa ce si waju nŋa bɛi sũmu wa fɔ ide hai nɛ yaase. Í wasi ku kɔ si gamboi ilu nŋau nɔ wa jò antɔ si agbãɛ.

¹⁵ Ŋɔi Akisi í sɔ̃ akaweɛ ŋau í ni, i kù yɛ iyi inɛɛu ihɛ̃ í sũmu ŋai? Na mii í ce ì naaɛ wa bi tom ŋa.

¹⁶ Mà ì tamaa bɛi amu mɔ n kù nɛ sũmu ŋai í jɔ̀ ì naam inɛɛu ihɛ̃ wa ŋa ku naa ku maa ce bɛi sũmu si wajum. Aawo. Kaa lɔ wa inɔ kpasɛ̃m.