Samuɛli 1, 20 - Bibeli do fee

Zonatãa í bii anyii Davidi

¹ Ŋɔi Davidi í sa hai Rama bi kuwai walii ŋa í bɔ bi Zonatãa í beeɛ í ni, mii ǹ ce. Kurara yoomai walakɔ dulum yoomai ǹ cea baaɛ iyi wa bi ku kpam do.

² Zonatãa í jɛaa í ni, aawo. I kaa ku pai. Baam ci ya singaam nkãma. Na mii í ce á singaam iyi ihɛ̃. Nkãma kaa ceɛ.

³ Amma Davidi í sɔ̃ɔ í ni, ntɔ ntɔ bɛɛbɛi. Amma baaɛ í mà kãm kãm iyi awɔ kpaasim nii. Á yɔkɔ ku fɔ si idɔɛ ku ni, kù sĩa Zonatãa ku mà domi inɔɛ á fɔ bii í gbɔ. Amma ǹ wa n sɔ̃ɛ do irii Aɔ̃ Lafɛ̃ɛ fei hee do kuwɛɛɛ fei, kuwɛɛm ku re agbãawɔ akã má si ilɛu ihɛ̃.

⁴ Ŋɔi Zonatãa í sɔ̃ Davidi í ni, mii iyi ì bi fei an ceɛ.

⁵ Nɔ Davidi í ni, wee ala jingaui cukpa titɔ̃i, nɔ awaò ilaalu à nɛ ka buba ka jɛ ajɔ. Jɔ̀ n koo n manji inɔ sako hee ku to alɛi ajɔ mɛɛtasiau.

⁶ Bii baaɛ í beeɛ í ni na mii í ce n kù naa, nɔ i sɔ̃ɔ i ni ǹ tɔɔɛ ǹ ni i jɔ̀ n bɔ ilum Betelehɛmu si na iyi í jɔ̀ ǹ nɛ kuweei adɔ̃ ku ce do inɛi kpasɛ̃m ŋa.

⁷ Bii í jɛsi, aa mà iyi kaa kpam má. Amma bii idɔɛ í kɔ̃, jɔ̀ i mà iyi kãm kãm wa dɛdɛ ku kpam nii hee nsɛi.

⁸ Bɛɛbɛi aa yɔkɔ i nyisiò kubiɛ si afei awaɛ domi awaɛ à dĩ akabuui si wajui Aɔ̃ Lafɛ̃ɛ. Nɔ mɔm, bii í jɛ ǹ ce kurara si mii gɔ, awɔ takaɛ kpam do iyi aa daa baaɛ si awɔ.

⁹ Ŋɔi Zonatãa í ni, aawo. Kaa ce ajɔ kãma. Nɔ bii ǹ gbɔ baam wa dɛ ku ceɛ laalɔ, ntɔ ntɔ an sɔ̃ɛ.

¹⁰ Nɔ Davidi í beeɛ í ni, yooi á naa ku sɔ̃m bii í jɛ baaɛ í na í fɔ ide do idɔɔkɔ̃.

¹¹ Ŋɔi Zonatãa í ni, ka bɔ waduude. Ŋɔi aŋa minji fei à fita à bɔ inɔ sakou.

¹² Ŋɔi Zonatãa í sɔ̃ Davidi í ni, ǹ wa n sɔ̃ɛi do irii Aɔ̃ Lafɛ̃ɛi inɛi Izirɛli ŋa, ala walakɔ ala akã suku bɛ ihɛ̃ an bee baam ide n ba n yɛ bɛi á ce. Bii í jɛ í nɛ kubiɛ hee nsɛi an bɛ inɛ gɔ wa ku naa ku sɔ̃ɛ.

¹³ Bii laalɔ mɔi í nɔ wa bi ku ceɛ, an jɔ̀ i gbɔ nɔ i nɛ do laakai ku sũ. Bii n kù ce bɛɛbɛ, Aɔ̃ Lafɛ̃ɛ ku kpãm iju jiida jiida. Nɔ ku wɛɛ do awɔ bɛi í tako í wɛɛ do baam.

¹⁴ Si anyiɛ bii í jɛ ǹ wɛɛ si hunde má, jɔ̀ i ce araarem na kubii Aɔ̃ Lafɛ̃ɛ ku ba n maà n ku.

¹⁵ Nɔ baa bii í jɛ ǹ na ǹ kui, jɔ̀ i ce araarei inɛi kpasɛ̃m ŋa baa si waati iyi Aɔ̃ Lafɛ̃ɛ á na ku maa kpa mbɛɛɛ ŋa akã akã si andunyau ihɛ̃.

¹⁶ Bɛɛbɛi Zonatãa í dĩ akabuu do inɛi kpasɛ̃i Davidi ŋa í ni, Aɔ̃ Lafɛ̃ɛ ku kpa mbɛɛi Davidi fei.

¹⁷ Nɔ Zonatãa í sɔ̃ Davidi í ni ku sisi ku cea nŋu kuwãi kubi má. Zonatãa takaɛ í bi Davidi bɛi í bi araɛ.

¹⁸ Nɔ í ni má, alai jingaui cukpa titɔ̃ nɔ a kaa yɛɛ bɛ domi agbɛɛ á gbe ngbɛ.

¹⁹ Nɔ ajɔ mɛɛtasiau i nɛ wa i na i manji hee tengi bii ì tako ì manjiu wo kɔkɔi kuta iyi à ya kpe Ezɛli.

²⁰ Nɔ an na n ta afa mɛɛta wa ikpa bi kutau bɛi ǹ wa n bi n ta mii gɔ.

²¹ Si anyiɛ an bɛ ama awaasũ woo ce icɛm gɔ wa ku naa ku dɛdɛ afam ŋau wa. Bii ǹ sɔ̃ɔ ǹ ni afam ŋau a kù bɔ kù jĩ kú nyi wa amɛɛ ihɛ̃ ku naa ku so ŋa, jɔ̀ i mà hee do irii Aɔ̃ Lafɛ̃ɛ fei iyi ì nɛ laakai ku sũ nɔ maà ce njo má.

²² Amma bii ǹ sɔ̃ ama awaasũu ǹ ni afam ŋau à wa hee jĩijĩ, debɛi jɔ̀ i dede i nɛ domi Aɔ̃ Lafɛ̃ɛ í bi i nɛi.

²³ Si gãmɛi akabuui kubi iyi awaɛ à dĩ, Aɔ̃ Lafɛ̃ɛi í jɛ sɛɛda nwa hee do ajɔ fei.

²⁴ Ŋɔi Davidi í koo í manji inɔ sakou. Ajɔi jingaui cukpa titɔ̃u í to, ŋɔi Saulu í koo í buba tengi bii à ya jɛu.

²⁵ Si bɛi í nɛ dɔ̃ɔnɛɛ ŋɔi í buba si kitãɛ iyi wa má si idĩ, ŋɔi Zonatãa í buba wajuɛ, nɔ Abinɛɛ mɔ í buba kɔkɔɛ, amma agbɛi Davidi í gbe ngbɛ.

²⁶ Ajɔ nŋu bɛ Saulu kù fɔ ide kãma, domi wa tamaa Davidi í ce ngɔgɔ iyi á jɔ̀ kú nɛ riisi nɔ kaa jɔ̀ ku jɛ jingauu.

²⁷ Amma iyi iju í má ajɔ minjisiai jingauu, agbɛi Davidi í kɔ̀ í wɛɛ ngbɛ, ŋɔi Saulu í bee Zonatãa í ni, bɛirei í ce amai Izaiu kù naa ana nɔ nnyi má kù naa jingauu ku jɛ.

²⁸ Nɔ Zonatãa í jɛaa í ni, Davidi í naa í tɔɔm í ni n jɔ̀ nŋu ku bɔ Betelehɛmu.

²⁹ Í ni aŋa à nɛ kuwee kpasɛ̃ nɔ igbãɛi í naa í kpoo. Nɔ í ni má bii ǹ nɛ kubii nŋu ntɔ ntɔi, n yɔɔdaa nŋu koo yɛ igbã ŋau. Na ŋɔi í jɔ̀ kù naa ihɛ̃ jingauu ku jɛ.

³⁰ Ŋɔi idɔi Saulu í kɔ̃ si Zonatãa í ni, awɔ ama ku donda inɛi nɔ amai ajai. I kù mà, kpaasi iyi ì dĩ do amai Izaiu bɛ, anyɔɛi do anyɔi iyeɛ?

³¹ Ntɔ ntɔ, bii í wɛɛ si hunde, jɔ̀ i mà iyi i kaa jɛ bommau nɔ kuwɛɛɛ kaa kpɛ si andunyau ihɛ̃ pai. Bɛbɛi jɔ̀ a koo a dɛdɛɛ wa a naaɛ wa ihɛ̃ domi í to a kpaa.

³² Ŋɔi Zonatãa í jɛa baaɛ í ni, bɛirei í ce ì waa dɛ ku kpaa. Daa mii í ce.

³³ Nɔ Saulu í so kakaɛ wa dɛdɛ ku sɔò Zonatãa. Hai bɛ gbakã Zonatãa í mà iyi kãm kãm baai nŋu wa dɛdɛ ku kpa Davidii.

³⁴ Ŋɔi í dede hai bi kujɛu do idɔɔkɔ̃ nla nla. Kù ba ŋa sɔnda kãma ku jɛ ajɔ minjisiai jingauu. Yaase bɛi baaɛ í buu í tosiɛ í jɔ̀ inɔɛ í fɔ ntɔ ntɔ na mii iyi baau wa bi ku cea Davidi.

³⁵ Iyi iju í má daakɔ ŋɔi Zonatãa í gbã ama awaasũ gɔ aŋaò à bɔ sako tengi bii aŋaò Davidi à ce adako.

³⁶ Ŋɔi Zonatãa í sɔ̃ ama awaasũu í ni, sɛi i maa koo, nɔ i so afa ŋa iyi an taò wa. Iyi awaasũu wa nɛ ŋɔi Zonatãa í ta afau í cuaa hee jĩijĩ.

³⁷ Si bɛi inɛɛu wa to tengi bii afau í dingaa, ŋɔi Zonatãa í ni, afau kù wa wajuɛ?

³⁸ Sɛi wa gbãa gbãa, maà leekĩ. Nɔ ama awaasũu í so afau wa í baaò wa bi Zonatãa.

³⁹ Amma kù sikaò ide kãma. Zonatãa do Davidi aŋai à mà yaasei ndu ŋa.

⁴⁰ Nɔ Zonatãa í na ama awaasũu jĩnɛɛ ŋau nɔ í sɔ̃ɔ í ni ku bɔò inɔ ilu.

⁴¹ Iyi í nɛ ŋɔi Davidi í fita wa hai alalai kutau nɔ í sɛɛbataa Zonatãa fii mɛɛta. Ŋɔi aŋa minji fei à sakoo njɛ à waa kpata, amma Davidi í kpata í re.

⁴² Si anyii nŋu ŋɔi Zonatãa í sɔ̃ Davidi í ni, koo nɛ do laakai ku sũ. Nɔ i maa ye gigii akabuu iyi awaɛ à dĩ do irii Aɔ̃ Lafɛ̃ɛ à ni, Aɔ̃ Lafɛ̃ɛ ku jɔ̀ awaɛ ka nɛ anu akã hee ku koo si do tɔku nwa ŋa fei.