Samuɛli 1, 2 - Bibeli do fee

Ana wa saabu Ilaaɔ̃

¹ Ŋɔi Ana í ce kutɔɔ í ni, ǹ wɛɛò inɔ didɔ̃ na iriɛ, Aɔ̃ Lafɛ̃ɛ. Awɔi ì muum gbugbã. Ǹ wa n nyaanyi si wajui mbɛɛm ŋa, domi inɔm í dɔ̃ si bɛi ì faabam.

² Inɛ kãma kù má bɛi awɔ, Aɔ̃ Lafɛ̃ɛ, awɔ akãi aa ka tɔɔ, awɔ akãi ì waa degbe inɛɛ ŋa.

³ Inɛ ŋa a maà fɔ ide do faau má. Idei fufu ku tɔɔ ku maà fita hai si gɛlɛ nŋa, domi awɔ Aɔ̃ Lafɛ̃ɛ ì jɛ Ilaaɔ̃ iyi í mà mii fei, awɔi aa kiiti kucei amanɛ ŋa fei.

⁴ Nɔ ì cɛ biooi ilu gbugbã ŋa, amma hai nɛ gbugbã ŋa à ba gbugbã.

⁵ Inɛ ŋa iyi à tako à waa yo wo à waa dɛdɛ icɛ iyi á jɔ̀ a ba mii ku jɛ nsɛi, amma inɛ ŋa iyi ari wa kpa wo à waa sĩmi. Baa inaabo gbɛnda í bí ama mɛɛje, amma abo iyi í bí ama bututu wo í baa í gbe nŋu akã nsɛi.

⁶ Awɔ Aɔ̃ Lafɛ̃ɛ, awɔi ì ya jɔ̀ inɛ gɔ ŋa a ku, nɔ inɛ gɔ ŋa mɔ a wɛɛ, ì ya jɔ̀ inɛ gɔ ŋa a bɔ bi kuwai iku ŋa nɔ inɛ gɔ ŋa mɔ ì ya faaba ŋa.

⁷ Awɔ Aɔ̃ Lafɛ̃ɛ, ì ya jɔ̀ inɛ gɔ ŋa a jɛ ilu are nɔ gɔgɔ ŋa mɔ a nɛ amani, ì ya kaye inɛ gɔ ŋa nɔ ì ya kɔ̃ɔsi inɛ gɔ ŋa má.

⁸ Awɔi ì ya dede kãma iyi í cuku ilɛ, nɔ ì ya nya ilu are hai si inɔ goo bi ku dikã mii riisi ŋa. Nɔ ì ya jɔ̀ a buba do inɛ nla ŋa, nɔ ì ya jɔ̀ a nɛ bɛɛrɛ. Awɔi ì jilɛ icui ilɛ, nɔ si antaiɛi ì lesi andunya.

⁹ Awɔi ì waa gbã inɛɛ ŋa si isɛɛnɛ nŋa. Amma aa jɔ̀ inɛ laalɔ ŋa a ce nfe si ilu kuku, domi amanɛ kaa yɔkɔ ku jɛ igũ do gbugbãi nŋu takaɛ.

¹⁰ Aa la si ŋa wa hai lele bɛi kulai ijĩ, nɔ njo ku mu mbɛɛɛ ŋa. Awɔi aa kiiti inɛi andunya fei, nɔ aa mua ilaalui inɛɛ ŋa gbugbã, nɔ ilaaluu iyi ì cica, aa kɔ̃ɔa si yiiko.

¹¹ Si anyii nŋu Elikana í sinda í nyi Rama má, amma Samuɛli amaɛu í gbe bi Elii woo weeu, wa cea Aɔ̃ Lafɛ̃ɛ icɛ.

Amai Elii ŋa

¹² Amai Elii ŋa inɛ laalɔ ŋai iyi a kù mà bɛɛrɛi Aɔ̃ Lafɛ̃ɛ.

¹³ Aŋai à jɛ woo wee ŋa. Bɛi à ya maa cea zamaau wee. Waati iyi inɛ gɔ wa ce kuwee fei, amaacɛ nŋa í ya to wai waati iyi iŋau wa gba si inɔ caka ku maa mu kaato iyi í nɛ amaawɔ mɛɛta gɔ,

¹⁴ nɔ ku naa ku gũ kaatou si inɔ caka bii iŋau í wa. Nɔ iŋa iyi kaatou í nya wa fei ti woo weeui í ya jɛ. Nɔ bɛɛbɛi à ya maa cea inɛi Izirɛli ŋa iyi à ya naa Siloo bɛ fei.

¹⁵ Nɔ baa hee a maa jo ikpoi iŋau, amaacɛi woo weeu í ya to wa bi inɛ iyi wa ce kuweeui ku ni, mua woo weeu iŋa iyi à banda wa, domi kù bi iŋa iyi à tɛkɛ, í gbe iyi í wɛɛ tũtũ.

¹⁶ Nɔ bii lafɛ̃ɛu í sɔ̃ɔ í ni, degbe hee bii à jo ikpoi iŋau titã i bɛi i so iyi ì bi, amaacɛu í ya ni, aawo. Nam wa nsɛi nsɛi. Bii ì nɔ ì kɔ̀ mɔ, an sooi do gbugbã.

¹⁷ Nɔ bɛɛbɛi dulum dii ama awaasũ ŋau í la í caa domi a kù waa saalu kuweei Aɔ̃ Lafɛ̃ɛ.

¹⁸ Amma Samuɛli wa cea Aɔ̃ Lafɛ̃ɛ icɛ jiida, wa dasi efodu, waatɔ ibɔi woo wee ŋa iyi à ce do acɔ ku nɛ gbugbã.

Nyaanzei Samuɛli

¹⁹ Adɔ̃ fei iyei Samuɛli í ya ceaa ibɔ keeke gɔ koo muaa waati iyi nŋu do mɔkɔɛ à bɔ Siloo a koo a cea Aɔ̃ Lafɛ̃ɛ kuwee fei.

²⁰ Ŋɔi Elii í wee nŋa nɔ í sɔ̃ Elikana í ni, Aɔ̃ Lafɛ̃ɛ ku jɔ̀ abou ihɛ̃ ku bíɛ amu ŋa a sãsi agbɛi Samuɛli iyi í na Aɔ̃ Lafɛ̃ɛu ihɛ̃. Si anyiɛ nɔ à sinda à baa ide.

²¹ Nɔ Aɔ̃ Lafɛ̃ɛ í gbɔ kutɔɔi Elii. Ŋɔi Ana í bí ama inɛmɔkɔ mɛɛta do ama inaabo minji má. Amma Samuɛli inɛ nŋu wa la si kpasɛ̃i Aɔ̃ Lafɛ̃ɛ.

Elii wa gbagba si amaɛ ŋa

²² Wee Elii í gbo í caa. Ŋɔi í gbɔ daa laalɔ iyi amaɛ ŋa à wasi ku cea inɛi Izirɛli ŋa do bɛi à ya maa sũò inaabo ŋa iyi à waa ce icɛ andɛ koofai ilei acɔi Aɔ̃ Lafɛ̃ɛ.

²³ Ŋɔi í bee ŋa í ni, ǹ gbɔ zamaau fei wa fɔ idei daa laalɔ nŋɛ ŋa. Na mii í ce ì waa ce bɛɛbɛ ŋa.

²⁴ Iŋɛ amam ŋa, i ce laakai ŋa. Iyi ǹ gbɔ à waa fɔ na iri nŋɛ kù sĩa baa keeke. Ì waa dasi inɛi Aɔ̃ Lafɛ̃ɛ ŋa dulum ŋa.

²⁵ Bii inɛ gɔ í ce dulum bi kpaasiɛ Ilaaɔ̃i á teeseɛ, amma bii inɛ gɔ í ce dulum bi Aɔ̃ Lafɛ̃ɛ yooi á teesea. Amma a kù gbɔ idei baa nŋa domi Aɔ̃ Lafɛ̃ɛ í dasi idɔ nŋu ku kpa ŋa.

²⁶ Samuɛli wa la nɔ kuceɛ wa dɔ̃a Aɔ̃ Lafɛ̃ɛ do amanɛ ŋa si.

Ijuukpã iyi Elii do nyaanzeɛ ŋa aa na a yɛ

²⁷ Ŋɔi walii gɔ í naa bi Elii í sɔ̃ɔ í ni, Aɔ̃ Lafɛ̃ɛ í ni nŋu í tusɛa inɛi kpasɛ̃i balaɛ ŋa arai nŋu bɛi nŋu í yɛ fei waati iyi à wa ilɛi Ezibiti bi Faraɔ̃ à waa jɛ aru. Mà iboi.

²⁸ Si inɔi dimii inɛi Izirɛli ŋa fei balaɛ Arɔ̃ɔi nŋu í cica ku jɛ woo weei nŋu. Nŋui nŋu í jɔ̀ í ya dasi ibɔ iyi à ya kpe efoduu, nɔ nŋu í daa icɛi kuweeu si awɔ do icɛi tuae ku jo. Nɔ si anyiɛ iŋai kuwee ŋa iyi inɛi Izirɛli ŋa à ya naaò wa bi ti nŋu nŋu í ya jɔ̀ bubuɛ ku jɛ titɛɛ do ti tɔkuɛ ŋai.

²⁹ Na mii í ce awɔ do amaɛ ŋa i kù waa saalu kuwee ŋau do amua ŋa iyi nŋu í jilɛ nŋɛ i ce bi kuwai nŋu ŋa. Na mii í ce awɔ ì waa saalu amaɛ ŋa í re nŋu, nɔ ì so kuwee ŋa iyi inɛi nŋu ŋa inɛi Izirɛli ŋa à ya naaò wa bi ti nŋu ì cicaa ara nŋɛ iŋau iyi í sĩa í re ŋa ku ba i ŋɔ i ce kaato ŋa.

³⁰ Na nŋu, í ni nŋu í tako í cea inɛi kpasɛ̃ɛ do ti baaɛ ŋa kuwã wo í ni aŋai aa jɛ woo weei nŋu ŋa hee do ajɔ fei. Amma bɛbɛi nŋu kaa ce bɛɛbɛ má. Ntɔ ntɔ, inɛ ŋa iyi à waa saalu nŋu aŋai nŋu á saalu. Amma inɛ ŋa iyi a kù waa saalu nŋu, aa yɛ anyɔ.

³¹ Nɔ kaa kpɛ má iyi inɛ kãma kaa gbo si inɔ kpasɛ̃ɛ do si kpasɛ̃i baaɛ, domi aŋa fei aa kui si awaati iyi à waa nɛ gbugbã.

³² Nɔ awɔ takaɛ aa yɛ wahala nla nla iyi á naa si bi kuwai nŋu Ilaaɔ̃. Baa do iyi nŋu á cea inɛi Izirɛli ŋa jiida baa yooma fei, mɔkɔ ngbo kãma kaa wa si kpasɛ̃ɛ.

³³ Amma do nŋu fei, kù jɛ aŋa feii nŋu á nya hai si icɛi kuweeu. Baa do iyi inɛ nkpɔ nŋa á na ku ku nŋu á jɔ̀ inɛ akã, ku ba ku yɛ wahala do inɔ kufɔ.

³⁴ Nɔ iyi á na ku ba amaɛ ŋa Ɔfini do Fineɛzi á jɛɛ nyinda, domi si ajɔ akãi aŋa minji fei aa ku.

³⁵ Si anyiɛ nŋu á cica woo wee ilu naanɛ iyi á ce bɛi nŋu í bi. Nŋui á jɛ woo weei ilaalu iyi nŋu á cica hee do ajɔ fei nɔ nŋu á jɔ̀ tɔkuɛ ŋa a na a jɛ woo wee ŋa hee do ajɔ fei.

³⁶ Nɔ inɛ ŋa iyi à gbe si inɔ kpasɛ̃ɛ fei aa na a gulɛ si wajui woo weeu a maa tɔɔ kpɛkɛlɛ gɔ walakɔ pɛ̃ɛ. Nɔ aa maa ni, ǹ wa n tɔɔɛi, jɔ̀ n ba icɛ gɔ si icɛi woo wee ŋau ku ba n ba mii ku jɛ.