Samuɛli 1, 19 - Bibeli do fee

Zonatãa í kɔ̀ a kpa Davidi

¹ Si anyiɛ ŋɔi Saulu í sɔ̃ Zonatãa amaɛ do akaweɛ ŋa fei í ni a kpa Davidi. Amma si bɛi Zonatãa í nɛ kubii Davidi nla nla,

² ŋɔi í koo í sɔ̃ɔ í ni, Saulu baam wa dɛdɛ ku kpaɛ. Jɔ̀ i ce sɔɔlu i maa wɛɛò nɔ ala daakɔ i koo i manji kɔkɔlɛ bii gɔ.

³ Amu do baam aa ka fita wa ajɔ ka naa kɔkɔi tengi bii ì waa manjiu. An sɔ̃ɔ ide si gãmɛɛ n cɔ bɛi á ce, nɔ n na n sɔ̃ɛ.

⁴ [Iyi iju í má daakɔu] ŋɔi Zonatãa í koo í ba baaɛ nɔ í sisiaa jiida ku jɛi Davidi í ni, maà ce dulum gɔ bi Davidi domi nŋu mɔ kù ce dulum kãma bi titɛɛ. Mii ŋa iyi wa ce fei wa cooi na aranfãaniɛ.

⁵ Nɔ kù saalu baa kuwɛɛɛ í kpaò inɛi Filisiu nɔ Aɔ̃ Lafɛ̃ɛ í faabaò inɛi Izirɛli ŋa fei. Awɔ takaɛ ì yɔɔ nɔ ì wɛɛò inɔ didɔ̃. Na mii í ce aa ce dulum i kpa Davidi ngbɛ ngbɛ, nŋu iyi kù ce taale gɔ.

⁶ Ŋɔi Saulu í gbɔ idei Zonatãa nɔ í ni, ǹ jɛsi do irii Aɔ̃ Lafɛ̃ɛ fei, n kaa n kpa Davidi má.

⁷ Ŋɔi Zonatãa í kpe Davidi í sɔ̃ɔ bɛi aŋaò baaɛ à dɔ̃ fei. Si anyiɛ í gbãa í naaɛ wa bi Saulu, nɔ Davidi í mɔsi icɛɛ má bɛi tako.

Mikali í faaba Davidi

⁸ Ŋɔi igũ í dede má nɔ Davidi í kãmia inɛi Filisi ŋau mam mam nɔ à saa.

⁹ Ŋɔi ajɔ nŋu gɔ Aɔ̃ Lafɛ̃ɛ í jɔ̀ inɛi inɔɔko í naa si Saulu má waati iyi wa buba inɔ kpasɛ̃. Saulu wa mu kakaɛ, Davidi mɔ wa cã mɔɔlɔɛ.

¹⁰ Ŋɔi gbakã Saulu í sɔɔ kaka ku máa si idĩ, amma Davidi í sa nɔ kakau í koo í dingaa si idĩu. Nɔ idũu Davidi í fita í sa.

¹¹ Nɔ Saulu í bɛ inɛɛ ŋa kpasɛ̃i Davidi a koo a maa degbeɛ. Bii iju í má nɔ a kpaa. Amma Mikali aboi Davidi í sɔ̃ɔ í ni, bii i kù sa idũuyi, ala daakɔ aa ku.

¹² Ŋɔi í sobi Davidi í kitaɛ hai do fɛrɛnti í sa í nɛ.

¹³ Si anyiɛ í so ama dekĩ nŋa í tɔɔ si antaii daayi nɔ í so batai iwo í jilɔɔ bi ku to iriɛ í bɛi í biiɛ do acɔ.

¹⁴ Iyi amaabɛi Saulu ŋau à bɔ Davidi ku mu, nɔ aboɛ í ni kù waa nɛ baani.

¹⁵ Ŋɔi Saulu í sisi í bɛ ŋa wa í ni, i soo wa do daayiɛ fei ku ba n kpaa.

¹⁶ Iyi amaabɛ ŋau à nyi wa ŋɔi à na à ba wee ama dekĩu í wa si antaii daayiu nɔ à bii iriɛ do batai iwo.

¹⁷ Ŋɔi Saulu í bee Mikali í ni, bɛirei í ce ì lɛlɛɛm zaka bɛi ihɛ̃ nɔ ì jɔ̀ mbɛɛm í sa. Ŋɔi Mikali í jɛaa í ni, nŋui í ni bii n kù jɔ̀ nŋu ku nɛ fei, nŋu á kpam nii.

Saulu í bɔ Davidi ku dɛdɛ bi kuwai walii ŋa

¹⁸ Bɛɛbɛi Davidi í sa í bɔ Rama bi Samuɛli, nɔ í sɔ̃ɔ bɛi Saulu í cea nŋu fei. Nɔ aŋaò Samuɛli à koo à buba bi kuwai walii ŋa.

¹⁹ Ŋɔi à koo à sɔ̃ Saulu à ni, Davidi wee í wa Rama bi kuwai walii ŋa.

²⁰ Ŋɔi Saulu í bɛ inɛ ŋa má a koo a mu Davidi wa. Amma iyi à to bɛ à yɛ wuaai walii ŋau à waa ce walii nɔ Samuɛli wa cua nŋa. Ŋɔi hundei Ilaaɔ̃ í naa si ŋa nɔ aŋa mɔ à waa ce walii.

²¹ Iyi Saulu í gbɔ ideu, ŋɔi í bɛ inɛ mmu ŋa má. Iyi aŋa mɔ à to ŋɔi à waa ce walii. Ŋɔi Saulu í nyi í sisi í bɛ inɛ ŋa isɛ gbɛɛtasia má, nɔ aŋa mɔ à ce walii bɛi inɛi tako ŋau.

²² Si anyiɛ ŋɔi Saulu takaɛ í dede wa bɔ Rama. Iyi í to lɔgɔ nlai Seku ŋɔi í bee do ikpa bii Samuɛli do Davidi à wa. Ŋɔi à jɛaa à ni, à wa Rama bi kuwai walii ŋa.

²³ Ŋɔi í dede wa nɛ ikpa bi kuwai walii ŋau. Ŋɔi hundei Ilaaɔ̃ í naa si nŋu mɔ nɔ í ce walii wa nɛò hee í to bɛ.

²⁴ Nŋu mɔ í bɔ ibɔɛ nɔ wa ce walii si wajui Samuɛli. Ajɔ nŋu bɛ í cuku ilɛi basĩ hai dasã hee do idũ fei. Na ŋɔi í ce inɛ ŋa à ya maa ni, Saulu mɔ í jɛ waliii bɛbɛi?