Samuɛli 1, 18 - Bibeli do fee

¹ Si bɛi Davidi í fɔ ide wa tã, ŋɔi kubii Davidi í mu idɔi Zonatãa hee í caa. Tengi bɛ gbakã ŋɔi í sinti ku bi Davidi bɛi nŋu takaɛ.

² Hai ajɔ nŋu bɛi Saulu í mu Davidi, kù jɔ̀ ku bɔ ide bi baaɛ má.

³ Nɔ Zonatãa í dĩ akabuu do Davidi si na iyi í jɔ̀ í buu bɛi nŋu takaɛ.

⁴ Ŋɔi í bɔ ibɔ iyi wa dasi í so í na Davidi do ibɔi igũɛ ŋa do taakubaɛ do biooɛ hee do santiikiɛ fei.

⁵ Waati iyi Saulu í bɛ Davidi igũ fei í ya jɛ igũ wai. Na ŋɔi í jɔ̀ Saulu í soo inɛ ngboi wuaa akãi sooge ŋau, nɔ bɛɛbɛi í dɔ̃a zamaau fei si hee do akawei ilaalu ŋau fei.

Saulu wa dɛ Davidi ku kpa

⁶ Waati iyi Davidi í kpa inɛi Filisiu nɔ à waa baa hai igũu, ŋɔi inaabo gɔ ŋa à fita wa hai si ilui Izirɛli ŋa fei à waa naa ku ko ilaalu Saulu à waa kɔ̃ iri nɔ à waa jojo à waa cã isɔ do ama gãgãi inaabo ŋa nɔ à waa dɔ̃ anu do inɔ didɔ̃.

⁷ Inaabo ŋau à waa kɔ̃ iri à waa ni, Saulu í kpa amanɛ dubu nɔ Davidi í kpa amanɛ dubu mɛɛwa.

⁸ Ŋɔi ideu kù dɔ̃a Saulu si nɔ idɔɛ í kɔ̃ ntɔ ntɔ nɔ í fɔ wa ni, à ni Davidi í kpa amanɛ dubu mɛɛwa, amma amu amanɛ dubui ǹ kpa. Debɛi nkãma kù gbea má bii kù jɛ ku jɛ bomma.

⁹ Hai ajɔ nŋu bɛi Saulu í ya maa da Davidi gɔ̃gɔ̃.

¹⁰ Iyi iju í má ŋɔi Ilaaɔ̃ í jɔ̀ inɛi inɔɔko gɔ í naa si Saulu. Bɛ gbakã wa fɔ ide bɛi sũmu si inɔ kpasɛ̃ɛ. Wa mu kakaɛ si awɔ nɔ Davidi wa cã mɔɔlɔɛ bɛi í nɛ dɔ̃ɔnɛi ku ceu.

¹¹ Ŋɔi Saulu í so kakaɛ wa ni si idɔɛ, an gũ Davidii n máa si idĩ. Amma Davidi í saa kakau isɛ gbeeji.

¹² Saulu wa ce njoi Davidi si na iyi í jɔ̀ Aɔ̃ Lafɛ̃ɛ í wɛɛ do Davidi nɔ í fũsi nŋu awɔ.

¹³ Na ŋɔi í jɔ̀ í tekĩò Davidi hai bi titɛɛ nɔ í soo ku jɛ inɛ ngboi sooge dubu. Nɔ hai waati bɛɛbɛi Davidi í ya maa gbã inɛi Izirɛli ŋa si igũ.

¹⁴ Í ya maa jɛ igũi waati kãma fei domi Aɔ̃ Lafɛ̃ɛ í wɛɛ do nŋu.

¹⁵ Iyi Saulu í yɛ bɛi í ya maa jɛ igũ ŋɔi njoɛu í kɔ̃ɔsi.

¹⁶ Amma inɛi Izirɛli do inɛi Zudaa ŋau fei à bi Davidi si na iyi í jɔ̀ í ya cua nŋa à bɔò igũ.

Davidi í so Mikali amai Saulu í jɛ aboɛ

¹⁷ Ŋɔi Saulu wa fɔ si idɔɛ í ni, n kù bi ku jɛ amu takam nii n kpa Davidi, amma á sĩa ku jɛ inɛi Filisi ŋai a kpaa. Na nŋu, í sɔ̃ Davidi í ni, ama inaabo sintem Merabu wee. An muuɛi ku jɛ aboɛ bii ì nyisi araɛ ilu wɔɔkɔ si icɛi igũi Aɔ̃ Lafɛ̃ɛ iyi à waa ce.

¹⁸ Amma Davidi í jɛaa í ni, n kù jɛ nkãma, nɔ inɛi kpasɛ̃m do nyaanzem ŋa kãma kù jɛ ngɔgɔ si ilɛi Izirɛli. Bɛirei ilaalu á ce ku jɛ anam.

¹⁹ Amma iyi waati í to bii Saulu á mua Davidi Merabu amaɛ, í sooi í na Adirɛli inɛi Mehola.

²⁰ Mikali, ifɔi Merabu, í bi Davidi. Iyi Saulu í gbɔ ideu ŋɔi í dɔ̃aa si.

²¹ Nɔ wa fɔ si idɔɛ í ni, an muaa Mikalii ku ba do saabuɛ inɛi Filisi ŋau a toò awɔ. Bɛɛbɛi isɛ gbeejisia má Saulu í sɔ̃ Davidi í ni, hai nnyi ǹ bi n jɛ anaɛ.

²² Ŋɔi Saulu í sɔ̃ akaweɛ ŋa í ni a koo a kpe Davidi kɔkɔlɛ nɔ a sɔ̃ɔ a ni, wee ilaalu do inɛi anyiɛ ŋa fei à nɛ kubiɛ. Bɛbɛi jɛsi ilaaluu ku jɛ anaɛ.

²³ Ŋɔi à koo à sɔ̃ Davidi, nɔ Davidi í ni, ì waa tamaa á faala ŋa bii ilaalu í jɛ anam? Amu kãmài nɔ n kù nɛ bɛɛrɛ kãma gɔ.

²⁴ Nɔ inɛ ŋau à koo à sɔ̃ Saulu bɛi Davidi í dɔ̃.

²⁵ Ŋɔi Saulu í ni a koo a sɔ̃ Davidi a ni ilaalu kù bee jĩnɛi abɔdɔ̃ kãma, í gbe jɔnfɔlɔ cĩɔi inɛi Filisi ŋa ku ba ku sãò idɔɔkɔ̃ iyi wa mu si gãmɛ nŋa. Wee Saulu wa dɛdɛ kpãai bɛi á ba ku jɔ̀ Davidi ku dasiò awɔi inɛi Filisi ŋa.

²⁶ Ŋɔi à koo à sɔ̃ Davidi bɛi ilaaluu í dɔ̃, nɔ í jɛsi nŋu ku dɛdɛ mii iyi ilaalu í beeɛu ku bɛi ku so abou. Hee awaati iyi à dau ku maa to wa

²⁷ ŋɔi Davidi do inɛɛ ŋa à koo à kpa inɛi Filisi ŋa inɛmɔkɔ cĩɔ minji nɔ à nya jɔnfɔlɔ nŋa ŋa wa à naa à na Saulu ku ba Davidi ku so aboɛ. Na ŋɔi í jɔ̀ Saulu í náa Mikali ama inaaboɛ.

²⁸ Si bɛi í yɛ iyi Aɔ̃ Lafɛ̃ɛ í wɛɛ do Davidi nɔ Mikali í nɛ kubiɛ,

²⁹ ŋɔi njo í sisi í muu má nɔ í cóo si kuwɛɛɛ fei.

³⁰ Si waati nŋu, bii inɛi Filisi ŋa à bɔ igũ si inɛi Izirɛli ŋa, Davidi í ya jɛ ŋa igũi ku re inɛ ngboi soogei Saulu ŋa iyi à gbe. Na ŋɔi í jɔ̀ í nya iri ntɔ ntɔ.