Samuɛli 1, 16 - Bibeli do fee

Ilaaɔ̃ í cica Davidi ilaalu

¹ Ŋɔi Aɔ̃ Lafɛ̃ɛ í sɔ̃ Samuɛli í ni, maà kpataa Saulu má domi ǹ kɔ̀siɛ nɔ kaa jɛ ilaalui inɛi Izirɛli ŋa má. Dasi ikpo si inɔ ngoɛ i bɔ Betelehɛmu bi Izai. Si inɔi amaɛ ŋai ǹ yɛ ilaalu iyi an so.

² Ŋɔi Samuɛli í ni, n kaa n yɔkɔ. Bii ǹ koo Saulu á na ku gbɔ nɔ ku kpam. Nɔ Aɔ̃ Lafɛ̃ɛ í ni, mu ama kɛtɛ zãu gɔ i kooò nɔ i sɔ̃ ŋa i ni ì waa naa kuwee ku ceem.

³ Nɔ i kpe Izai mɔ bi kuweeu. An sɔ̃ɛ mii iyi aa ce. Inɛ iyi ǹ cicau, tontooaa ikpo si iri.

⁴ Ŋɔi Samuɛli í ce bɛi Aɔ̃ Lafɛ̃ɛ í fɔu, í dede í bɔ Betelehɛmu. Iyi inɛ ngboi ilu ŋau à yɔɔ ŋɔi njo í mu ŋa nɔ à sɛi à koo à beeɛ à ni, baanii ì waa naaò wa ihɛ̃?

⁵ Nɔ í ni, oo. Ǹ naa ku cea Aɔ̃ Lafɛ̃ɛ kuweei. I wɛ ku ba i má ŋa nɔ i naa wa do amu ajɔ káa ce kuweeu. Nɔ í sɔ̃ Izai do amaɛ ŋa mɔ í ni a wɛ ku ba a má a bɛi a naa bi kuweeu.

⁶ Waati iyi à to wa ŋɔi Samuɛli í yɛ Eliabu [ama yemmai Izai] nɔ í fɔ si idɔɛ í ni, kãm kãm á jɛ inɛ iyi Aɔ̃ Lafɛ̃ɛ í cicaui ihɛ̃.

⁷ Amma Aɔ̃ Lafɛ̃ɛ í sɔ̃ɔ í ni, maà cɔ kusĩaɛ do kugbokaɛ domi ǹ kɔ̀siɛ. Amu Aɔ̃ Lafɛ̃ɛ n ci ya n cɔ iyi amanɛ wa cɔ, domi arai amanɛ í ya cɔ amma amu ǹ ya n cɔɔi hee si idɔ.

⁸ Ŋɔi Izai í kpe Abinadabu mɔ wa í naaɛ wa wajui Samuɛli nɔ Samuɛli í ni, Aɔ̃ Lafɛ̃ɛ kù cica inɛ ihɛ̃ mɔ.

⁹ Izai í naaò Sama mɔ wa amma Samuɛli í ni, Aɔ̃ Lafɛ̃ɛ kù cica inɛ ihɛ̃ mɔ.

¹⁰ Bɛɛbɛi Izai í jɔ̀ ama mɛɛje ŋau à bɔ si wajui Samuɛli, amma Samuɛli í sɔ̃ɔ í ni, Aɔ̃ Lafɛ̃ɛ kù cica baa akã nŋa.

¹¹ Ŋɔi Samuɛli í beeɛ í ni, fei ndii amu ŋa iyi ì nɛi ihɛ̃? Nɔ í jɛaa í ni, aawo. Í gbe ifɔ kɔdaa nŋa iyi wa degbe angudã ŋa. Ŋɔi Samuɛli í sɔ̃ɔ í ni, jɔ̀ a koo a dɛdɛɛ wa, domi bii kù to wa a kaa ka jɛ ijɛi kuweeu.

¹² Ŋɔi Izai í jɔ̀ a koo a dɛdɛɛ wa. Nɔ wee awaasũ kaasãanɛi nɔ amanɛ nkpai, í nɛ iju kusĩa nɔ wajuɛ í sĩa. Ŋɔi Aɔ̃ Lafɛ̃ɛ í sɔ̃ Samuɛli í ni, dede i tontooaa ikpo si iri, domi nŋui ǹ cica.

¹³ Samuɛli í so ngou í tontooa Davidi ikpo si iriɛ si wajui igbãɛ ŋa. Ŋɔi hundei Aɔ̃ Lafɛ̃ɛ í naa si Davidi hai ajɔ nŋu bɛ. Si anyii nŋu ŋɔi Samuɛli í nɛ Rama.

¹⁴ Hai waati bɛɛbɛi hundei Aɔ̃ Lafɛ̃ɛ í fita si Saulu, nɔ Aɔ̃ Lafɛ̃ɛ í jɔ̀ inɛi inɔɔko gɔ í na wa wahalaɛ.

¹⁵ Ŋɔi akaweɛ ŋa à sɔ̃ɔ à ni, Ilaaɔ̃ í jɔ̀ inɛi inɔɔko gɔ í naa wa wahalaɛ.

¹⁶ Sɔ̃ wa iyi ì bi ka ceɛ, awa wee. Bii ì bi, aa ka dɛdɛɛ inɛ gɔ iyi í mà mɔɔlɔ ku cã, nɔ waati iyi inɛi inɔɔkou á naa siɛ á yɔkɔ ku lɛlɛɛ bii wa cã mɔɔlɔu.

¹⁷ Nɔ Saulu í jɛ nŋa í ni, i dɛdɛɛm inɛ iyi í mà mɔɔlɔ ku cã jiida jiida wa nɔ i naaɛ wa bi tom ŋa.

¹⁸ Ŋɔi inɛ akãi akaweɛ gɔ í ni, ǹ mà amai Izai inɛi Betelehɛmuu í mà mɔɔlɔ ku cã. Ilu wɔɔkɔi nɔ í nɛ gbugbã. Í ya fɔ ide do yaase jiida nɔ í jɛ awaasũ kusĩa. Iyi í re mɔm Aɔ̃ Lafɛ̃ɛ í wɛɛ do nŋu.

¹⁹ Ŋɔi Saulu í bɛ inɛ gɔ ŋa bi Izai í ni a koo a sɔ̃ɔ ku jɔ̀ Davidi amaɛ, woo degbe angudã ŋau, ku naa bi ti nŋu.

²⁰ Ŋɔi Izai í kãa gbankɛlɛ akã pɛ̃ɛ ŋa do bɔgɔ batai vɛ̃ɛ do ama iwo akã, í bɛò Davidi bi Saulu.

²¹ Iyi Davidi í to bi Saulu ŋɔi wa ceaa icɛ. Saulu í nɛ kubiɛ jiida jiida nɔ í coo woo so jĩnɛi igũɛ ŋa.

²² Ŋɔi Saulu í samba anu bi Izai í ni, ǹ wa n tɔɔɛi, jɔ̀ Davidi ku wa ihɛ̃ ku maa ceem icɛ, domi ǹ nɛ kubiɛ jiida.

²³ Hai waati bɛɛbɛ, bii inɛi inɔɔkou í naa si Saulu Davidi í ya so mɔɔlɔɛi ku cãa. Nŋui í ya lɛlɛ Saulu nɔ ku jɔ̀ inɛi inɔɔkou ku tɛkɛɛ siɛ.