Samuɛli 1, 15 - Bibeli do fee

Ilaaɔ̃ í kɔ̀si Saulu

¹ Ŋɔi Samuɛli í sɔ̃ Saulu í ni, amui Aɔ̃ Lafɛ̃ɛ í bɛ wa wo n naa n tontooɛ ikpo si iri ku ba i jɛ ilaalui inɛi Izirɛli ŋa iyi à jɛ inɛɛ ŋa. Na nŋu, sotĩ i gbɔ ide iyi Aɔ̃ Lafɛ̃ɛ wa fɔ.

² Aɔ̃ Lafɛ̃ɛi lele do ilɛ í ni, an sãa inɛi Amalɛki ŋa mii iyi à cea inɛi Izirɛli ŋa si iyi à da nŋa kpãa waati iyi à fita wa hai ilɛi Ezibiti.

³ Nsɛi, dede bɛbɛi i koo si ŋa. Koo ce asɔɔi mii ŋa iyi à nɛ fei nɔ i maà ce araare nŋa. Kpa mii ŋa iyi à wɛɛ fei, hai inɛmɔkɔ do inaabo do amu ŋa do ama kpɔtɔɔ ŋa hee do kɛtɛ ŋa do angudã ŋa do iwo ŋa ku koo si kpookpo do gbankɛlɛ ŋa fei.

⁴ Ŋɔi Saulu í tɔtɔɔ zamaaɛ ŋa fei nɔ í ka ŋa ilui Telaimu. Akpɔ nŋa í dede amanɛ dubu cĩɔ minji (200.000), inɛi Zudaa ŋa mɔ aŋa dubu mɛɛwa (10.000).

⁵ Nɔ à bɔ hee kɔkɔi ilui inɛi Amalɛki ŋa à bɛi à ce sɔɔlu bɛi aa ce a zamba ŋa hai lɔɔma bɛ.

⁶ Ŋɔi Saulu í sɔ̃ inɛi Keni ŋa í ni, i fita hai si inɔi inɛi Amalɛki ŋa ku ba iŋɛò ŋa i maà ku ajɔ ŋa, domi ì cea inɛi Izirɛli ŋa mii jiida ŋa waati iyi à waa fita wa hai ilɛi Ezibiti. Nɔ inɛi Keni ŋa à fita hai inɔi inɛi Amalɛki ŋa.

⁷ Ŋɔi Saulu í jɛ inɛi Amalɛki ŋa igũ hai Havila hee ku bɔ Suu iyi í wa do nunui daakɔi ilɛi Ezibiti.

⁸ Í kpa zamaau fei do taakuba, í gbe Agagi ilaalu nŋa nŋu akã iyi í mu.

⁹ Saulu do soogeɛ ŋa à jɔ̀ Agagi do mɛɛmu ŋa iyi à nɛ gbugbã à re. À jɔ̀ kɛtɛ jiida ŋa do angudã ŋa do ama angudã ŋa hee do mɛɛmu kaasãanɛ ŋa fei a kù bi a kpa ŋa. Mɛɛmu kusu do hai nɛ bɛɛrɛ ŋa, aŋa akãi à kpa.

¹⁰ Ŋɔi Aɔ̃ Lafɛ̃ɛ í ba Samuɛli ide ku fɔ í ni,

¹¹ inɔm í fɔ do iyi ǹ cica Saulu i jɛò ilaalu, domi í sinda hai bi tom nɔ kù waa jirima idem má. Ŋɔi idɔi Samuɛli í kɔ̃ nɔ í ce kutɔɔ hai idũu hee iju í koo í máu.

¹² Daadaakɔu ŋɔi í bɔ Saulu ku dɛdɛ. Nɔ à sɔ̃ɔ à ni, Saulu í bɔ ilui Kaamɛli í koo í maa araɛ ngɔgɔ ku ba inɛ ŋa a maa yeò gigiɛ. Hai bɛ má nɔ í nyi í bɔ Giligali.

¹³ Iyi Samuɛli í to bi Saulu ŋɔi Saulu í sɔ̃ɔ í ni, Aɔ̃ Lafɛ̃ɛ ku weeɛ. Ǹ jirima idei Aɔ̃ Lafɛ̃ɛ.

¹⁴ Nɔ Samuɛli í beeɛ í ni, hai iwoi anu ku dɔ̃i angudã do ti kɛtɛ ŋa iyi ǹ wa n gbɔu ihɛ̃ wa naa.

¹⁵ Ŋɔi Saulu í jɛaa í ni, sooge ŋau a kù kpa mɛɛmu jiidai inɛi Amalɛki ŋa, amma à naaò ŋa wa ihɛ̃ ku ba ka cea Aɔ̃ Lafɛ̃ɛɛ kuwee. Iyi í gbe fei à kpa ŋa.

¹⁶ Ŋɔi Samuɛli í ni, coko, an sɔ̃ɛ ide iyi Aɔ̃ Lafɛ̃ɛ í sɔ̃m idũ ana. Nɔ Saulu í ni, fɔ.

¹⁷ Ŋɔi Samuɛli í ni, tako wo, baa do iyi i kù cɔ araɛ inɛ nla, Aɔ̃ Lafɛ̃ɛ í soɛ i jɛò inɛ ngboi dimii Izirɛli ŋa. Í cicaɛ i jɛ ilaalu nŋa,

¹⁸ nɔ í jilɛɛ icɛ iyi aa ce í ni i bɔ bi inɛi Amalɛki woo ce dulum ŋau i ba ŋa igũ ku ce nɔ i kpa ŋa fei.

¹⁹ Na mii í ce i kù jirima idei Aɔ̃ Lafɛ̃ɛu. Na mii í ce ì koo ì so mii ndu nŋa ŋa ì ceò mii iyi kù dɔ̃aa si.

²⁰ Ŋɔi Saulu í jɛaa í ni, ǹ jirima idei Aɔ̃ Lafɛ̃ɛ ntɔ ntɔ nɔ ǹ ce icɛ iyi í jilɛɛm. Ǹ kpa inɛi Amalɛki ŋa fei, í gbe ilaalu nŋa Agagi nŋu akã iyi ǹ mu ǹ baaò wa ihɛ̃.

²¹ Amma soogem ŋa à cica mɛɛmu jiida ŋa iyi à re si inɔi mɛɛmu ŋa iyi à nɛ ku kpaò wa ku ba ka ceaò Aɔ̃ Lafɛ̃ɛɛ kuwee Giligali ihɛ̃.

²² Nɔ Samuɛli í ni, Aɔ̃ Lafɛ̃ɛ í bi inɛ ŋa a jirima idei nŋu í re a cea nŋu kuwee, domi ideɛ ku gbɔ í tia kuwee ŋa, nɔ iri ilɛ ku sũ í tia ikpoi angudã ŋa.

²³ Ntɔ ntɔ, kugaabui Aɔ̃ Lafɛ̃ɛ ku kɔ̀si í yɛi bɛi alisi ku ce, nɔ kugaabui woodaɛ ku donda mɔ í yɛi bɛi iwɛ̃ ku tɔɔ. Si na iyi í jɔ̀ ì kɔ̀si idei Aɔ̃ Lafɛ̃ɛ, nŋu mɔ á kɔ̀siɛ nɔ ku nyaɛ bomma.

²⁴ Nɔ Saulu í sɔ̃ Samuɛli í ni, ǹ ce dulum domi n kù jirima idei Aɔ̃ Lafɛ̃ɛ do ide iyi ì fɔ. Ǹ ce njoi soogem ŋa nɔ ǹ ce bɛi à bi.

²⁵ Bɛbɛi ǹ wa n tɔɔɛi, ceem suurui dulum dom. Toom wa ku ba n koo n tɔɔ Aɔ̃ Lafɛ̃ɛ.

²⁶ Amma Samuɛli í sɔ̃ɔ í ni, aawo. N kaa n tooɛ, domi ì kɔ̀si idei Aɔ̃ Lafɛ̃ɛ nɔ nŋu mɔ í kɔ̀siɛ nɔ í nyaɛ bomma.

²⁷ Si bɛi Samuɛli í sinda wa nɛ ŋɔi Saulu í ya itĩi ibɔɛ í faa nɔ ibɔu í ga.

²⁸ Ŋɔi Samuɛli í sɔ̃ɔ í ni, bɛɛbɛ mɔi hai nnyi Aɔ̃ Lafɛ̃ɛ á gba bommau ku na inɛ gɔ iyi í tiaɛ.

²⁹ Ilaaɔ̃, nŋu iyi wa na inɛi Izirɛli ŋa amboe, kaa sɔ ibo nɔ ci ya kpaasi idɔ bɛi amanɛ.

³⁰ Ŋɔi Saulu í ni má, ǹ ce dulum. Amma ǹ wa n tɔɔɛi, bii anyim si wajui inɛ ngbo ŋa do inɛi Izirɛli ŋa fei. Toom wa nɔ n koo n tɔɔ Aɔ̃ Lafɛ̃ɛɛ.

³¹ Ŋɔi Samuɛli í sinda í too Saulu nɔ Saulu í koo í tɔɔ Aɔ̃ Lafɛ̃ɛ.

³² Si anyii nŋu, ŋɔi Samuɛli í ni a naaò Agagi ilaalui inɛi Amalɛki ŋau wa. Nɔ Agagi wa naa bi tɛɛ do inɔ didɔ̃ wa tamaa bɛi a kaa kpa nŋu mái.

³³ Amma Samuɛli í sɔ̃ɔ í ni, do taakubaɛi ì kpaò inɛ ŋa ì jɔ̀ iyei amu ŋa à kua ama nŋa ŋa. Bɛɛbɛ mɔi iyeɛ á kua amaɛ. Nɔ Samuɛli í cafeɛ si wajui Aɔ̃ Lafɛ̃ɛ Giligali bɛ.

³⁴ Si anyiɛ nɔ Samuɛli í nɛ Rama nɔ Saulu mɔ í bɔ kpasɛ̃ɛ Gibea bɛ.

³⁵ Hee Samuɛli í koo í kuò, kù bɔ Saulu ku cɔ má. Do nŋu fei, í ya maa kpata na iriɛi. Nɔ Aɔ̃ Lafɛ̃ɛ takaɛ mɔ inɔɛ í fɔ do iyi í so Saulu ilaalui inɛi Izirɛli ŋa.