Samuɛli 1, 14 - Bibeli do fee

Zonatãa í bɔ asɔi inɛi Filisi ŋa igũ ku ce

¹ Ajɔ nŋu gɔ Zonatãa amai Saulu í sɔ̃ amaacɛɛ iyi wa so jĩnɛi igũɛ ŋau í ni, nɛ wa, ka bɔ hee asɔi soogei inɛi Filisi ŋa iyi à wa cingaa ikpa ihɔ̃. Amma kù sɔ̃ baaɛ ide kãma.

² Waati bɛɛbɛ Saulu í wa Migɔrɔ̃ɔ kɔkɔi Gibea si abɛi jĩi ndii gerenadi gɔ. Sooge ŋa iyi à wa bi tɛɛ à dede zakai amanɛ cĩɔ mɛɛfa (600).

³ Wee Ahiya woo weeu í wa si inɔi inɛ ŋau wa dasi efodu [ibɔ iyi woo wee ŋa à ya dasi a beeò Ilaaɔ̃ ide]. Ahiyau amai Ahitubui. Ahitubu do Ikabɔdu ifɔɛ amai Fineɛzi ŋai, Fineɛzi mɔ amai Eliii, nŋu iyi í jɛ woo weei Aɔ̃ Lafɛ̃ɛ Siloo wo. Si inɔi sooge ŋau, kãma nŋa kù mà iyi Zonatãa í fita.

⁴ Waati iyi Zonatãa do amaacɛɛu à maai asɔi soogei Filisi ŋau, ŋɔi à to inɔ afei iri kuta minji gɔ ŋa. Iri kutau akã Bosesi à ya kpoo, akã mɔ Sene.

⁵ Iri kuta minji ŋau, akã í wa do ikpa awɔ njɛi kpãai inunu si wajui Mikimasi, akã mɔ do ikpa awɔ cangai kpãai inunu si wajui Gibea.

⁶ Ŋɔi Zonatãa í sɔ̃ amaacɛɛ í ni, nɛ wa ka bɔ bi hai ce bango ŋau ihɛ̃. Á yɔkɔ ku jɛ Aɔ̃ Lafɛ̃ɛ á sobi wa, domi nkãma kàa ganjiɛ ku sobi wa baa bii a kù kpɔ.

⁷ Nɔ amaacɛɛu í jɛaa í ni, ce mii iyi ì bi fei. Ka bɔ tengi bii ì bi fei, ǹ tã sɔɔlu n tooɛ.

⁸ Ŋɔi Zonatãa í ni, to, ka koo bi tu ŋa nɔ ka jɔ̀ a yɛ wa.

⁹ Bii í jɛ à ni ka leekĩ hee aŋa a naa bi tu wa, inya akã bɛi aa ka maa leekĩ nɔ a kàa ka tɛkɛɛ si ŋa má.

¹⁰ Amma bii aŋai à ni, i naa wa ŋa, aa ka koo. Nŋu bɛi á jɛ nwa nyinda iyi Aɔ̃ Lafɛ̃ɛ á so ŋai ku da nwa si awɔ.

¹¹ Ŋɔi aŋa minji fei à bɔ tengi bii inɛi Filisi ŋa aa yɛ ŋa, ŋɔi inɛi Filisi ŋau à waa ni, inɛi Ebɛɛ ŋa wee à waa fita wa hai inɔ isa ŋa bii à waa manji wo.

¹² Ŋɔi à sɔ̃ ŋa à ni, i gũ wa bi tu wa ihɛ̃ ŋa aa ka nyisi ŋɛ bɔ̃nɛ. Ŋɔi Zonatãa í sɔ̃ amaacɛɛu í ni, toom wa, domi Aɔ̃ Lafɛ̃ɛ í so ŋa í daa inɛi Izirɛli ŋa si awɔ.

¹³ Ŋɔi Zonatãa í gũ wa koo do awɔɛ do kutɛɛ ŋa nɔ amaacɛɛu wa tooɛ. Iyi à to bɛ ŋɔi à lɔ si igũ. Inɛi Filisi ŋa iyi Zonatãa í cã í kɔ̃ɔɛ fei, amaacɛɛui í ya tambɔɛ.

¹⁴ Bɛɛbɛi si ija sinteu Zonatãa do amaacɛɛu à kpa zakai amanɛ kɔnfia si bantuma nyankuti.

¹⁵ Ŋɔi zigii inɛi Filisi ŋa iyi à wa asɔu hee do inɛ ŋa iyi à wa amɛɛ bɛ fei í da. Njo í mu hee do sooge woo degbe ŋau do sooge ŋa iyi à tako à bɔ asɔɔ ku ceu wo. Iyi í re mɔm, ilɛ í wasi ku yaya nɔ Aɔ̃ Lafɛ̃ɛ í jɔ̀ zigiida nla nla í naa si ŋa.

¹⁶ Ŋɔi sooge woo degbei Saulu ŋa iyi à wa Gibea à yɛ inɛi Filisi ŋau à fangaa à waa sa bii fei.

¹⁷ Ŋɔi Saulu í sɔ̃ inɛɛ ŋa í ni, i ka inɛ ŋa iyi à wa inɔ nwa ihɛ̃ ku ba ka mà inɛ iyi í fita hai ihɛ̃ í koo si ŋa. Iyi à ka njɛ ŋɔi à ba í gaizia Zonatãa do amaacɛɛ.

¹⁸ Nɔ Saulu í sɔ̃ Ahiya í ni ku naaò kpakoi akabuui Ilaaɔ̃ wa. Wee waati bɛɛbɛ kpakou í wa bi inɛi Izirɛli ŋa.

¹⁹ Waati iyi Saulu wa ba woo weeu ide ku fɔ, ŋɔi hoya hoyai inɛi Filisi ŋau wa kɔ̃ɔsi. Ŋɔi í sɔ̃ woo weeu í ni, jɔ̀ɛ, [a kàa ka bee Ilaaɔ̃ ide kãma má].

²⁰ Ŋɔi Saulu í tɔtɔɔ soogeɛ ŋa nɔ à bɔ bii igũu wa ce nɔ à ba wee mbɛɛ nŋa ŋa à waa kpa njɛ do taakubai aŋa duusɔ̃ɔ do hoya hoya nla nla.

²¹ Nɔ inɛi Ebɛɛ ŋa iyi à tako à wa bi inɛi Filisi ŋa à waa ba ŋa igũ ku ceu, à sa à baa bi Saulu do Zonatãa bɛbɛi à sobi inɛi Izirɛli ŋa.

²² Inɛi Izirɛli ŋa iyi à waa manji si iri kutai ilɛi Efaraimu ŋau à gbɔ iyi inɛi Filisi ŋau à waa sa, ŋɔi aŋa mɔ à fita à lɔ si igũ à waa lele ŋa,

²³ nɔ à ce igũ à bɔ hee alalai Bɛti-Avɛni. Bɛɛbɛi ajɔ nŋu bɛ Aɔ̃ Lafɛ̃ɛ í jɔ̀ inɛi Izirɛli ŋa à jɛ igũ.

Soogei inɛi Izirɛli ŋa à faaba Zonatãa

²⁴ Ajɔ nŋu bɛ inɛi Izirɛli ŋa à wahala ntɔ ntɔ si na iyi í jɔ̀ Saulu í ni wo, inɛ iyi á jɛ sɔnda gɔ hee alɛ ku maa lɛ nɔ n kù ce igũ do mbɛɛm ŋa n kù tã wa, Ilaaɔ̃ ku ceekpe lafɛ̃ɛ. Na nŋu, inɛ kãma kù jɛ sɔnda.

^25-26 Iyi inɛi Izirɛli ŋau à to inɔ agbo gɔ ŋɔi à yɛ nyikɔ̃ í cã wa hee í naa ilɛ. Amma inɛ kãma kù nya nyikɔ̃u ku jɛ domi à waa ce njoi ikpei Ilaaɔ̃.

²⁷ Wee Zonatãa nŋu kù gbɔ ide iyi baaɛ í tako í fɔ wo. Ŋɔi í so goloɛ í gũsi nyikɔ̃u í jɛ nɔ ijuɛ í má.

²⁸ Ŋɔi sooge akã gɔ í sɔ̃ɔ í ni, baaɛ í sɔ̃ wa wo í ni Ilaaɔ̃ á ceekpe inɛ iyi í jɛ sɔnda gɔ nnyi. Na ŋɔi í jɔ̀ awa fei à gbɛɛji.

²⁹ Ŋɔi Zonatãa í jɛaa í ni, baam wa wahala inɛ ŋa. I kù yɛ bɛi ijum í má si na iyi í jɔ̀ ǹ tiɛ nyikɔ̃u ihɛ̃?

³⁰ Bii í jɛ sooge nwa ŋa à so sɔndai inɛi Filisi ŋa à jɛ nnyi wo aa ka kpa si ŋa inɛ ku re baa bɛ ihɛ̃.

³¹ Ajɔ nŋu bɛ inɛi Izirɛli ŋa à kpa inɛi Filisi ŋa à lele ŋa hai Mikimasi à bɔò ŋa hee Ajalɔ̃ɔ. Ŋɔi à gbɛɛji hee í caa

³² í jɔ̀ à katasi mii ndii inɛi Filisi ŋa. Ŋɔi à mu angudã nŋa ŋa do iwo nŋa ŋa do kɛtɛ do ama kɛtɛ nŋa ŋa nɔ à saka ŋa gbakã nɔ à ŋɔ ŋa do njɛ ajɔ.

³³ Ŋɔi inɛ gɔ í koo í sɔ̃ Saulu í ni, wee sooge ŋau à waa ce dulum à waa ŋɔ iŋa do njɛ ajɔ. Ŋɔi Saulu í ni, dulum nla nlai ì ce ŋa. I bimbili kuta nla gɔ i naaò wa ihɛ̃ ŋa.

³⁴ Si anyiɛ, i koo i sɔ̃ inɛ fei ku naaò kɛtɛɛ wa do angudãɛ ku na ku sakaɛ ihɛ̃. Waati nŋu aa ŋɔɔ nɔ kaa jɛ dulum nii ì ce má ŋa si na iyi í jɔ̀ i kù ŋɔɔ do njɛ ajɔ má ŋa. Idũu bɛ gbakã inɛ fei í naaò kɛtɛɛ wa nɔ à sakaɛ si antaii kutau.

³⁵ Do yaase bɛɛbɛi Saulu í cea Aɔ̃ Lafɛ̃ɛ bi kuwee. Nɔ bi kuwee sinte iyi í cea Aɔ̃ Lafɛ̃ɛ mbɛ.

³⁶ Ŋɔi Saulu í ni má, ka bɔ bi inɛi Filisi ŋa idũuyi káa lele ŋa nɔ ka so mii ndu nŋa ŋa iyi à nɛ fei nɔ ka kpa aŋa fei hee iju ku maa má. Ŋɔi soogeɛ ŋa à jɛaa à ni, ce bɛi í sĩaɛ fei. Amma woo weeu í ni, ka tɔɔ Ilaaɔ̃ titã.

³⁷ Ŋɔi Saulu í bee Ilaaɔ̃ í ni, n koo si inɛi Filisi ŋau má? Aa so ŋa i daam si awɔ má? Amma Ilaaɔ̃ kù jɛaa ide kãma ajɔ nŋu bɛ.

³⁸ Ŋɔi Saulu í tɔtɔɔ inɛ ngboi soogei Izirɛli ŋa wa fei bi titɛɛ nɔ í ni, i jɔ̀ ka dɛdɛ dulum iyi à ce nnyi ŋa.

³⁹ Ǹ gbasi do Aɔ̃ Lafɛ̃ɛ fei, nŋu iyi í jɛ woo faabai inɛi Izirɛli ŋa, inɛ iyi í ce dulum nɔu á kui baa bii í jɛ Zonatãa amam nii í coo. Amma si inɔ nŋa inɛ kãma kù jɛaa.

⁴⁰ Ŋɔi Saulu í ni má, i tɔtɔɔ do cingaa akã ŋa nɔ amu mɔ do amam Zonatãa ka bɔ do cingaa akã. Nɔ à sɔ̃ɔ à ni, ce bɛi ì bi.

⁴¹ Ŋɔi Saulu í sɔ̃ Aɔ̃ Lafɛ̃ɛ í ni, awɔ Lafɛ̃ɛi inɛi Izirɛli ŋa, jɔ̀ ka mà ntɔu do saabui kpasa iyi aa ka ta. Ŋɔi à ta kpasau, nɔ kpasau í so Zonatãa do Saulu nɔ sooge ŋau à nɛ ara nŋa.

⁴² Ŋɔi Saulu í ni má, i ta nwa kpasa má ŋa amu do Zonatãa. Nɔ kpasau í so Zonatãa.

⁴³ Ŋɔi Saulu í bee Zonatãa í ni, sɔ̃m daa iyi ì ce. Nɔ Zonatãa í sɔ̃ɔ í ni, ǹ tiɛ nyikɔ̃ nyankuti do imɔi golom. Amu wee, ǹ tã sɔɔlu n ku.

⁴⁴ Ŋɔi Saulu í sɔ̃ Zonatãa í ni, Ilaaɔ̃ ku kpãm iju, Zonatãa, bii i kù ku.

⁴⁵ Ŋɔi sooge ŋau à sɔ̃ Saulu à ni, bɛirei Zonatãa á ce ku ku, nŋu iyi í faaba inɛi Izirɛli ŋa. Kaa ce. À gbasi hee do Aɔ̃ Lafɛ̃ɛ fei à ni a kaa ka jɛ baa a lu Zonatãa, domi do sobii Ilaaɔ̃i í ceò bɛɛbɛ. Bɛɛbɛi zamaau í faaba Zonatãa, kù ku má.

⁴⁶ Ŋɔi Saulu kù lele inɛi Filisi ŋa má, nɔ inɛi Filisi ŋau à nɛ ide nŋa.

Bomma ku jɛi Saulu do nyaanzeɛ ŋa

⁴⁷ Si anyii iyi Saulu í jɛ bommai ilɛi Izirɛli í ce igũ do inɛi Moabu ŋa do inɛi Amɔɔ ŋa do inɛi Edɔmu ŋa do ilaalui Soba ŋa do inɛi Filisi ŋa, mbɛɛ ŋa iyi à kaakoɛ bii fei. Nɔ bii fei í ya jɛ igũi.

⁴⁸ Bɛɛbɛi í nyisi gbugbãɛ í kpaò inɛi Amalɛki ŋa nɔ í faaba inɛi Izirɛli ŋa hai si awɔi inɛ ŋa iyi à ya maa so mii ndu nŋa ŋa.

⁴⁹ Saulu í nɛ ama inɛmɔkɔ mɛɛta, ama sinteu Zonatãa, ama minjisiau Yisive, mɛɛtasiau mɔ Malikisua. Í nɛ ama inaabo ŋa mɔ aŋa minji. Ama inaabo minjiɛ ŋau, inɛ ngboui à ya kpe Merabu, ifɔu mɔ Mikali.

⁵⁰ Aboɛi à ya kpe Ahinoamu amai Ahimasi. Inɛ ngboi soogeɛ ŋa mɔ à ya kpooi Abinɛɛ amai Nɛɛ ifɔi baai Saulu.

⁵¹ Kisi, baai Saulu, do Nɛɛ, baai Abinɛɛ, aŋa mɔ amai Abiɛli ŋai.

⁵² Si kuwɛɛi Saulu fei igũ nla nlai í ce do inɛi Filisi ŋa. Na ŋɔi í jɔ̀ bii Saulu í yɛ ilu wɔɔkɔ do kaasãanɛ gɔ í ya sooi ku dasi inɔ soogeɛ ŋa.