Samuɛli 1, 13 - Bibeli do fee

Inɛi Izirɛli ŋa à ce igũ do inɛi Filisi ŋa do kurarai Saulu

¹ Wee Saulu i nɛ zakai adɔ̃... waati iyi í jɛ bommau. Iyi í ce adɔ̃ minji si bomma ku jɛɛu

² ŋɔi í cica amanɛ dubu mɛɛta (3.000) iyi aa koo a ce igũ. Amanɛ dubu minjii (2.000) í wa bi tɛɛ si geete ŋau. À wai si afei Mikimasi do Betɛli. Nɔ amanɛ dubu (1.000) iyi ihɔ̃ ŋa mɔ à wa bi amaɛ Zonatãa si ilui Gibea ilɛi Bɛnzamɛɛ. Inɛ ŋa iyi à gbe mɔ, Saulu í ni a bɔ ide.

³ Ŋɔi ajɔ nŋu gɔ Zonatãa í lɔ si wuaai soogei Filisi ŋa iyi í wa Gibeau í kãmia ŋa, nɔ inɛi Filisi ŋau à gbɔ ideu. Ŋɔi Saulu í jɔ̀ à fã kãakãakĩ si ilɛi Izirɛli fei à ni, í gbe inɛi Ebɛɛ ŋa fei a gbɔ laabaauu.

⁴ Bɛɛbɛi inɛi Izirɛli ŋa fei à gbɔ iyi Saulu í kãmia soogei Filisi ŋa hee idɔ nŋa í kɔ̃. Ŋɔi Saulu í kpe soogeɛ ŋau fei í ni a naa wa bi ti nŋu Giligali bɛ.

⁵ Ŋɔi inɛi Filisi ŋau à tɔtɔɔ ku ba a ba inɛi Izirɛli ŋau igũ ku ce. À nɛ sarɛtii igũ dubu mɛɛta (3.000) do masa dubu mɛɛfa (6.000) do sooge ŋa iyi akpɔ nŋa í to baa sãai acĩi ido. Ŋɔi à na à buba ilui Mikimasi ikpa nunui daakɔi Bɛti-Avɛni.

⁶ Ŋɔi inɛi Izirɛli ŋa à yɛ iyi aŋa à wa si mbiisi nla nla si na iyi í jɔ̀ à ce amɛɛ si ŋa wa, nɔ à sa à waa manji si inɔ isai kuta ŋa do si abɛ wua ŋa do si afei kuta ŋa do si inɔ isa ŋa do si inɔ isɔ̃ ŋa.

⁷ Inɛ gɔ nŋa ŋa mɔ à sa à kua idoi Zuudɛ̃ɛ à koo à manji si ilɛi Gadi do ilɛi Galaadi. Waati nŋu bɛ Saulu í wa Giligali, nɔ zigii soogeɛ ŋa fei í da.

⁸ Ŋɔi í degbe ajɔ mɛɛje si bɛi Samuɛli í jilɔɔ wo amma Samuɛli kù to wa. Ŋɔi sooge ŋau à wasi ku sa nɔ à fangaa à jɔ̀ Saulu.

⁹ Ŋɔi Saulu í ni a náa nŋu iŋai kuwee iyi à ya jo si ina fei sãa sãa do ti kuweei anu akã. Iyi à naaò wa ŋɔi nŋu takaɛ í ce kuwee iyi à ya jo si ina fei sãa sãau.

¹⁰ Iyi í ce kuweeu í tã ŋɔi Samuɛli mɔ wa to wa. Ŋɔi Saulu í fita wa bɔ ku kòo nɔ ku coo fɔɔ.

¹¹ Ŋɔi Samuɛli í beeɛ í ni, mii ì ce bɛ. Nɔ Saulu í jɛaa í ni, ǹ yɛ soogem ŋa à sa nɔ awɔ mɔ i kù to wa si bɛi ì jilɔɔ nɔ iyi í re mɔm inɛi Filisi ŋau à tɔtɔɔ Mikimasi.

¹² Ǹ tamaa bɛi aa naa a ba wa igũ ku ce hee n maa n tɔɔ sobii Aɔ̃ Lafɛ̃ɛi. Nɔ ǹ dasi kookaai n ceò kuweeu.

¹³ Ŋɔi Samuɛli í jɛaa í ni, iyi ì ceu bɛ kù nɛ yaase. I kù jirima woodai Aɔ̃ Lafɛ̃ɛɛ. Bii ì yɔkɔ ì jirimaɛ wo, á jɔ̀ tɔkuɛ ŋa a ya maa jɛ bomma si ilɛi Izirɛli hee do ajɔ fei.

¹⁴ Amma nsɛi bomma ku jɛi nyaanzeɛ ŋa kaa kpɛ má. Aɔ̃ Lafɛ̃ɛ í cica inɛ mmu gɔ iyi idɔi aŋaò í kò. Nɔ nŋui í jilɛ ku na ku jɛ bommau, si na iyi í jɔ̀ i kù jirima woodai Aɔ̃ Lafɛ̃ɛ.

¹⁵ Bɛɛbɛi Samuɛli í dede hai Giligali í bɔ Gibea si ilɛi Bɛnzamɛɛ. Nɔ Saulu í ka sooge ŋa iyi à gbe bi tɛɛ nɔ à dede zakai cĩɔ mɛɛfa (600).

¹⁶ Saulu do amaɛ Zonatãa do sooge ŋa iyi à gbe bi tu ŋa à koo à buba Gibea nɔ inɛi Filisi ŋa mɔ à buba Mikimasi.

¹⁷ Ŋɔi inɛi Filisi ŋa à nya wuaa mɛɛta gɔ ŋa iyi à bɔ asɔɔ ku ce si ilɛi inɛi Izirɛli ŋa. Wuaa akã í too kpãai Ofara iyi wa bɔ ilɛi Suali, do ikpa awɔ njɛi kpãai inunu,

¹⁸ akã mɔ í too kpãai Bɛti-Horɔ̃ɔ do ikpa nunui alɛ, mɛɛtasiau mɔ í too kpãa iyi wa bɔ kɔɔi ilɛi Bɛnzamɛɛ do ikpa nunui daakɔ. Kpãau wa cɔ lɔɔmai Seboimu ikpa gbaau.

¹⁹ Nɔ si awaati nŋu gbɛdɛ kãma kù wa si ilɛi Izirɛli, domi inɛi Filisi ŋau à ni aŋa a kù bi inɛi Izirɛli ŋa a ce taakuba ŋa do kaka ŋa.

^20-21 Nɔ inɛi Izirɛli fei í ya bɔi bi inɛi Filisi ŋa ku ba ku cange sɔkui kaakoi kɛtɛɛ do dunduusuɛ do dagbaɛ do koto ku kɔ iŋaɛ, do mii ku gbangaa fɔfɔɛ nɔ ku teese isɔi goloi kɛtɛɛ. Nɔ icɛu caadai à ya ce ŋa.

²² Na nŋu, ajɔi igũu inɛi Izirɛli ŋa kãma kù nɛ taakuba hee má jɛ kaka, í gbe Saulu do Zonatãa aŋa akã.

²³ Ŋɔi wuaai inɛi Filisi gɔ ŋa à koo à buba si afei kuta minjii Mikimasi.