Samuɛli 1, 12 - Bibeli do fee

Samuɛli í ba inɛi Izirɛli ŋa ide ku fɔ

¹ Ŋɔi Samuɛli í sɔ̃ inɛi Izirɛli ŋa í ni, ǹ gbɔ ide iyi ì fɔ ŋa fei nɔ ǹ so nŋɛ ilaalu.

² Hai nsɛi nŋui á maa cua nŋɛ, domi amu ǹ gbo nɔ ntoi irim fei í fũuta, nɔ amam ŋa mɔ à ce inɛ ngbo bɛi iŋɛ mɔ. Amui ǹ cua nŋɛ wo hai awaasũm hee ku naa nnyi.

³ Amu wee si waju nŋɛ. I fɔ si wajui Aɔ̃ Lafɛ̃ɛ do si wajui ilaalu iyi í cica bii í jɛ ǹ raraa inɛ gɔ nŋɛ. Ǹ gba kɛtɛi inɛ gɔ? Walakɔ gbankɛlɛi inɛ gɔ? Ǹ takii inɛ gɔ nŋɛ? Mà ǹ wahala inɛ gɔ nŋɛ. Mà ǹ gba fiai inɛ gɔ si asii na n maà n yɛ taaleɛ. Bii ǹ ce mii ŋau bɛ fei, an sã nŋɛ.

⁴ Ŋɔi à jɛaa à ni, i kù takii wa, i kù wahala wa, i kù nɔ i kù gba nkãma si asii.

⁵ Ŋɔi í sɔ̃ ŋa í ni, Aɔ̃ Lafɛ̃ɛ do ilaalu à jɛ sɛɛda iyi i kù yɛ taalem si nkãma ŋa. Nɔ inɛ ŋau à ni, ntɔi.

⁶ Ŋɔi Samuɛli í sɔ̃ ŋa má í ni, ntɔ ntɔ Aɔ̃ Lafɛ̃ɛ í jɛ sɛɛda, nŋu iyi í cica Moizi do Arɔ̃ɔ na mba a nya bala nŋɛ ŋa wa hai ilɛi Ezibiti.

⁷ Bɛbɛi i naa wa awaɛ ŋa ka bɔ kiiti si wajui Aɔ̃ Lafɛ̃ɛ, an ye ŋɛ gigii mii jiida ŋa iyi í cea iŋɛ do bala nŋɛ ŋa fei.

⁸ Ì mà ŋa iyi Zakɔbu do inɛɛ ŋa à bɔ ilɛi Ezibiti, [nɔ inɛi Ezibiti ŋau à kpã tɔku nŋa ŋa iju]. Ŋɔi à tɔɔ Aɔ̃ Lafɛ̃ɛ ku naa ku sobi ŋa. Nɔ Aɔ̃ Lafɛ̃ɛ í bɛ Moizi do Arɔ̃ɔ a koo a fitaò ŋa wa a baa a naa a buba si ilɛu ihɛ̃.

⁹ Amma si anyii nŋu à gbɛjɛ idei Aɔ̃ Lafɛ̃ɛ nŋa. Na nŋu, í jɔ̀ Sisera inɛ ngboi soogei ilui Hasɔɔ ŋa do inɛi Filisi ŋa do ilaalui inɛi Moabu ŋa à jɛ ŋa igũ.

¹⁰ Ŋɔi à tɔɔ Aɔ̃ Lafɛ̃ɛ à waa ni, à ce dulum bi tɛɛ, domi à sinda à tooɛ anyi nɔ à koo à waa tɔɔ iwɛ̃ gɔ ŋa iyi à ya kpe Baali do Asitaate ŋa. Bɛbɛi, nya wa hai si awɔi mbɛɛ nwa ŋa, ku ba ka tɔɔɛ.

¹¹ Na ŋɔi í jɔ̀ Aɔ̃ Lafɛ̃ɛ í cica Zedeɔ̃ do Baraki do Zɛfutee, si anyi nŋa nɔ í cica amu mɔ ku ba ka nya ŋɛ hai si awɔi mbɛɛ ŋa iyi à waa kaako ŋɛ. Nɔ do yaase bɛɛbɛi ì wɛɛò laakai ku sũ si ilɛu ŋa.

¹² Amma si bɛi ì yɛ Nahasi ilaalui inɛi Amɔɔ ŋau wa naa igũ si ŋɛ, na ŋɔi í jɔ̀ ì ni n so nŋɛ ilaalu ŋa baa do iyi Aɔ̃ Lafɛ̃ɛ nŋɛ í jɛ ilaalu nŋɛ tã.

¹³ Ì tɔɔ Aɔ̃ Lafɛ̃ɛ ku mu nŋɛ ilaalu nɔ í na ŋɛ. Ilaalu nŋɛ wee.

¹⁴ Bii ì mà bɛɛrɛi Aɔ̃ Lafɛ̃ɛ ŋa nɔ ì waa tɔɔɛ ŋa nɔ ì waa gbɔ ideɛ ŋa nɔ i kù waa kɔ̀si woodaɛ ŋa, nɔ bii ì waa too Aɔ̃ Lafɛ̃ɛ nŋɛ ŋa, iŋɛ do ilaalu nŋɛ, mii fei á nɛ nŋɛi dee dee.

¹⁵ Amma bii i kù waa gbɔ idei Aɔ̃ Lafɛ̃ɛ ŋa nɔ bii ì kɔ̀si woodaɛ ŋa, Aɔ̃ Lafɛ̃ɛ á kpã ŋɛ ijui bɛi í kpã bala nŋɛ ŋa iju wo.

¹⁶ Bɛbɛi i leekĩ ŋa nɔ i cɔ maamaake nla nla iyi Aɔ̃ Lafɛ̃ɛ á ce si waju nŋɛ.

¹⁷ Si waatii bilee ku mui à wa si, mà iboi. An tɔɔ Aɔ̃ Lafɛ̃ɛ ku jɔ̀ i gbɔ kulai ijĩ ŋa nɔ ku jɔ̀ ijĩ ku wɔ wa ku ba i mà ŋa bɛi dulum du ŋɛ í la í to si wajuɛ na ilaalu iyi ì waa tɔɔ ŋa.

¹⁸ Ŋɔi Samuɛli í tɔɔ Aɔ̃ Lafɛ̃ɛ nɔ ajɔ nŋu bɛ Aɔ̃ Lafɛ̃ɛ í jɔ̀ à gbɔ kulai ijĩu nɔ ijĩ í wɔ. Ŋɔi zamaau fei í ce njoi Aɔ̃ Lafɛ̃ɛ do Samuɛli.

¹⁹ Ŋɔi à sɔ̃ Samuɛli à ni, tɔɔ Aɔ̃ Lafɛ̃ɛɛ na iri nwa ku ba ka maà ku, domi à kɔ̃ɔsi dulum du wa ŋai si bɛi à tɔɔ ilaalu.

²⁰ Ŋɔi Samuɛli í sɔ̃ ŋa í ni, i maà ce njo má ŋa. Ntɔi ì ce laalɔ ikã ikã fei ŋa. Do nŋu fei, i maà kɔ̀si Aɔ̃ Lafɛ̃ɛ ŋa, amma i jɔ̀ i tɔɔɛ do idɔ nŋɛ fei ŋa.

²¹ I maà sinda i koo i maa tɔɔ iwɛ̃ nfe ŋa. Iwɛ̃ ŋa a kaa naa nŋɛ aranfãani kãma wa nɔ a kaa yɔkɔ a faaba ŋɛ, domi a kù jɛ nkãma.

²² Aɔ̃ Lafɛ̃ɛ kaa kɔ̀si ŋɛ domi do idɔɔbiɛi í so ŋɛ i jɛ titɛɛ ŋa nɔ nŋui á maa mu ŋɛ na iri nlaɛ.

²³ Bɛɛbɛi amu mɔ n kaa n gbɛɛjiò kutɔɔ ku ce nŋɛ waati kãma fei nɔ n nyisi ŋɛ kpãa jiidau, domi bii n kù coo, dulum nii.

²⁴ Amma iŋɛ mɔ i jɔ̀ i mà bɛɛrɛi Aɔ̃ Lafɛ̃ɛ nɔ i tɔɔɛ do ntɔ do idɔ nŋɛ fei ŋa, domi ì yɛ mii nla nla ŋa iyi í ce si waju nŋɛ.

²⁵ Amma bii ì waa ce laalɔ ŋa, aa ce nfe ŋai, iŋɛ do ilaalu nŋɛ.