Samuɛli 1, 11 - Bibeli do fee

Saulu í jɛ inɛi Amɔɔ ŋa igũ

¹ Si anyiɛ ŋɔi Nahasi ilaalui inɛi Amɔɔ ŋa í naa igũ si inɛi ilui Yabɛsi ŋa si ilɛi Galaadi. Nɔ inɛi Yabɛsi ŋa à sɔ̃ɔ à ni, jɔ̀ ka dĩ akabuu ka jɛ aruɛ ŋa.

² Ŋɔi Nahasi í ni, to, ǹ jɛsi ka dĩ akabuu, amma í gbe bii ǹ nya iju njɛi iŋɛ fei titã ku ba anyɔ ku mu inɛi Izirɛli ŋa fei.

³ Ŋɔi inɛ ngboi ilu ŋau à ni, mu nwa ajɔ mɛɛje titã, aa ka bɛ inɛ ŋa si ilɛi Izirɛli fei sãa sãa. Bii a kù ba inɛ iyi á naa ku sobi wa aa ka jɛsi akabuuu.

⁴ Ŋɔi woo bɛ ŋau à to wa Gibea ilui Saulu nɔ à sɔ̃ zamaau ideu, nɔ aŋa fei à dɔ̃ anu à waa kpata.

⁵ Wee waati bɛɛbɛ Saulu wa baa hai iko do kɛtɛɛ ŋa, ŋɔi í bee í ni, na mii í ce zamaau wa kpata. Nɔ à sɔ̃ɔ bɛi inɛi Yabɛsi ŋa à ni.

⁶ Iyi Saulu í gbɔ ideu ŋɔi hundei Ilaaɔ̃ í naa siɛ do gbugbã nɔ idɔɛ í kɔ̃ hee í caa.

⁷ Ŋɔi í nya kɛtɛ minji í bububuu í bɛi í na woo bɛ ŋau a kooò si ilɛi Izirɛliu fei nɔ a sɔ̃ ŋa a ni, bɛ ihɛ̃i aa cea kɛtɛi inɛ ŋa iyi a kaa too Saulu do Samuɛli igũ. Inɛ ŋau wee à waa ce njoi Aɔ̃ Lafɛ̃ɛ. Ŋɔi à naa à tɔtɔɔ bɛi inɛ akã.

⁸ Ŋɔi Saulu í tɔtɔɔ ŋa ilui Bezɛki í ka ŋa. Inɛi Izirɛli ŋa à dede aŋa dubu cĩɔ mɛɛta (300.000), inɛi Zudaa ŋa mɔ dubu kuntaa (30.000).

⁹ Nɔ à sɔ̃ woo bɛi inɛi Yabɛsi ŋau à ni a koo a sɔ̃ kpaasi nŋa ŋa a ni, ala hee dasã ku maa kpã, aa ba faaba ŋa. Ŋɔi woo bɛ ŋau à koo à sɔ̃ ŋa ideu, nɔ inɔ nŋa í dɔ̃.

¹⁰ Ŋɔi à bɛ inɛ ŋa a koo a sɔ̃ inɛi Amɔɔ ŋa a ni, ala aa ka naa bi tu ŋɛ nɔ i ce nwa bɛi í sĩa nŋɛ.

¹¹ Zakai amɛɛjuumá ŋɔi Saulu í kpɛ̃ inɛɛ ŋa wuaa mɛɛta à bɛi à lɔ si asɔi inɛi Amɔɔ ŋa à wasi ku kpa ŋa hee dasã wa bɔ ku kpã. Inɛ ŋa iyi à gbe mɔ à fangaa hee a kaa yɛ baa amanɛ minji inya akã.

¹² Ŋɔi inɛi Izirɛli ŋau à sɔ̃ Samuɛli à ni, iwoi inɛ ŋa iyi a kù bi Saulu ku jɛ ilaaluu à wa. A naaò ŋa wa ku ba ka kpa ŋa.

¹³ Amma Saulu í jɛ nŋa í ni, aawo, a kaa kpa inɛ kãma nnyi, domi Aɔ̃ Lafɛ̃ɛ í jɔ̀ à jɛ igũ.

¹⁴ Si anyiɛ ŋɔi Samuɛli í sɔ̃ ŋa í ni, i nyi wa ka bɔ Giligali ŋa káa ce ile ku fitai bomma ku jɛi Saulu.

¹⁵ Ŋɔi zamaau fei í koo í jɛ jingaui ile ku fitau Giligali si wajui Aɔ̃ Lafɛ̃ɛ. Tengi bɛi à ce kuwee ŋa iyi à ya saabuò Ilaaɔ̃. Nɔ Saulu do inɛi Izirɛli ŋau fei à wa si inɔ didɔ̃ nla nla.