Samuɛli 1, 10 - Bibeli do fee

¹ Ŋɔi í so ama kpaabai ikpo í tontoo ikpou si irii Saulu, í bɛi í sakoɛ í ni, Aɔ̃ Lafɛ̃ɛ takaɛi í cicaɛ i jɛ ilaalui inɛɛ ŋa.

² Nsɛi wee aa nɛ i jɔ̀m. Nɔ si ilɛi dimii Bɛnzamɛɛ ŋa ilui Sɛlisa aa ko inɛmɔkɔ minji gɔ ŋa kɔkɔi balɛi Rasɛli. Aa sɔ̃ɛ a ni à yɛ gbankɛlɛ ŋa iyi ì waa dɛdɛ ŋau ŋa. Amma baaɛ í gbɛjɛ idei gbankɛlɛ ŋau, bɛbɛi zigiɛ wa daò ŋɛ, nɔ wa bee araɛ ide wa ni, bɛirei an ce n yɛ amam má.

³ Bii ì mu kpãa ì waa nɛ, waati iyi aa to kɔkɔi jĩi ndii Tabɔɔ, tengi bɛi aa ko inɛmɔkɔ mɛɛta gɔ ŋa iyi à waa bɔ ku cea Ilaaɔ̃ kuwee ilui Betɛli. Inɛ sinteu á maa mu ama iwo mɛɛta, inɛ minjisiau á maa mu pɛ̃ɛ mɛɛta, inɛ mɛɛtasiau mɔ jɔlɔi vɛ̃ɛ.

⁴ Aa ceɛ fɔɔ nɔ a muuɛ pɛ̃ɛ minji, nɔ i gba.

⁵ Si anyiɛ aa to Gibea-Elohimu, tengi bii soogei Filisi ŋau à wa. Bii ì waa lɔ inɔ iluu aa ko wuaai walii gɔ ŋa iyi à waa kita wa hai geete bi kuweeu à waa ce walii. Inɛ ŋa a maa cua nŋa a maa cã mɔɔlɔ do ama gãgã do yee do kitigbo.

⁶ Nɔ hundei Aɔ̃ Lafɛ̃ɛ á naa siɛ do gbugbã. Waati bɛɛbɛi idɔɛ á kpaasi nɔ awɔ mɔ aa ce walii do aŋa ajɔ.

⁷ Waati iyi nyinda ŋau bɛ fei sãa sãa à ce, koo ce mii iyi ì ba fei, domi aa mà iyi ntɔ ntɔi Ilaaɔ̃ í wɛɛ do awɔ.

⁸ Si anyiɛ nɔ i cuam Giligali. Amu takam an naa n baɛ bɛ n ce kuwee iyi à ya jo si ina fei sãa sãa do kuwee iyi à ya saabuò Ilaaɔ̃. Aa degbem nii ajɔ mɛɛje. Waati iyi an to wa an sɔ̃ɛ mii iyi ì nɛ i ce.

⁹ Iyi Saulu í sinda í tooa Samuɛli anyi wa nɛ ŋɔi Ilaaɔ̃ í kpaasi idɔɛ. Nɔ nyinda ŋau fei sãa sãa í kɔ̃ ajɔ nŋu bɛ.

¹⁰ Iyi à to Gibea ŋɔi wuaai walii gɔ ŋa à waa kò ŋa wa, nɔ hundei Ilaaɔ̃ í naa si Saulu do gbugbã nɔ wa ce walii aŋaò ŋa ajɔ.

¹¹ Ŋɔi inɛ ŋa iyi à tako à màa wo à yɛ wa ce walii aŋaò walii ŋau nɔ à wasi njɛ ku bee ide à waa ni, mii í ba amai Kisi. Saulu mɔ waliii?

¹² Ŋɔi inɛi Gibea gɔ í ni, inɛ ŋa iyi à gbe mɔ ni. Yooi í jɛ baa nŋa. Hai waati bɛɛbɛi à kpa mɔnda gɔ à ni, Saulu mɔ í jɛ walii bɛbɛi?

¹³ Iyi Saulu í ce waliiu í tã ŋɔi í bɔ geete bii à ya ce kuweeu.

¹⁴ Iyi í to bɛ ŋɔi ifɔi baaɛ í beeɛ í ni, iwoi ì bɔ ŋa. Ŋɔi Saulu í jɛaa í ni, à bɔ gbankɛlɛ ŋa ku dɛdɛi, amma si na iyi í jɔ̀ a kù yɛ ŋa ŋɔi à bɔ bi Samuɛli.

¹⁵ Ŋɔi ifɔi baaɛu í sɔ̃ɔ í ni, debɛi sɔ̃m ide ŋa iyi Samuɛli í sɔ̃ ŋɛ wa.

¹⁶ Ŋɔi Saulu í jɛaa í ni, í sɔ̃ wa iyi à yɛ gbankɛlɛ ŋau. Amma kù sɔ̃ɔ idei bomma iyi á na ku jɛ.

À ta kpasa à so Saulu ilaalu

¹⁷ Si anyii nŋu Samuɛli í tɔtɔɔ inɛi Izirɛli ŋa tengi bii à ya ce kuwee ilui Misipa.

¹⁸ Nɔ í sɔ̃ ŋa í ni, iyi Aɔ̃ Lafɛ̃ɛ nŋɛ í fɔ wee. Í ni, amu Aɔ̃ Lafɛ̃ɛi ǹ nya ŋɛ wa hai ilɛi Ezibiti, amui ǹ faaba ŋɛ hai si awɔi inɛi Ezibiti ŋa do hai si awɔi ilaalu ŋa iyi à wahala ŋɛ fei.

¹⁹ Ŋɔi Samuɛli í ni má, iŋɛ wee ì kɔ̀si Ilaaɔ̃ Lafɛ̃ɛ nŋɛ nnyi ŋa, nŋu iyi í faaba ŋɛ hai si laalɔ do wahala nŋɛ fei, nɔ ì waa ni ŋa, dɛdɛ nwa ilaalu. To, i tɔtɔɔ wa bɛbɛi si wajui Aɔ̃ Lafɛ̃ɛ ŋa si dimi ikã ikã nŋɛ ŋa do si kpasɛ̃ nŋɛ ŋa.

²⁰ Ŋɔi Samuɛli í jɔ̀ inɛi Izirɛli ŋau à sɛkɛɛ siɛ wa dimiò dimi nɔ í ta nŋa kpasa, ŋɔi kpasau í so dimii Bɛnzamɛɛ.

²¹ Ŋɔi í jɔ̀ dimii Bɛnzamɛɛ í sɛkɛɛ siɛ wa kpasɛ̃ do kpasɛ̃, nɔ kpasau í so kpasɛ̃i Matiri. Si kpasɛ̃i Matiriu nɔ í so Saulu amai Kisi. Nɔ à dɛdɛ Saulu amma a kù yɔɔ.

²² Ŋɔi à bee Aɔ̃ Lafɛ̃ɛ à ni, Saulu í bɛi í wa ihɛ̃ mbɛ? Ŋɔi Aɔ̃ Lafɛ̃ɛ í jɛ nŋa í ni, oo, wa manji inɔ aso ŋa.

²³ Ŋɔi à sɛi à koo à mu Saulu wa hai bii wa manjiu, ŋɔi í naa í leekĩ si aninii zamaau. Wee í gboka í re aŋa fei do iri.

²⁴ Ŋɔi Samuɛli í sɔ̃ zamaau í ni, i cɔ, inɛ iyi Aɔ̃ Lafɛ̃ɛ í cicau wee. Si zamaau ihɛ̃ inɛ kãma kù yɛ bɛi nŋu. Ŋɔi aŋa fei à dɔ̃ anu à waa ni, Ilaaɔ̃ ku jɔ̀ hundeɛ ku sɔ.

²⁵ Ŋɔi Samuɛli í sɔ̃ ŋa woodai bommau nɔ í kɔ si tia gɔ í bɛi í koo í jilɔɔ si wajui Aɔ̃ Lafɛ̃ɛ. Si anyiɛ nɔ í jɔ̀ inɛ fei í bɔ ideɛ.

²⁶ Saulu mɔ í bɔ ideɛ ilui Gibea, nŋu do ilu wɔɔkɔ gɔ ŋa iyi Aɔ̃ Lafɛ̃ɛ í da nŋa si idɔ à suu.

²⁷ Amma mɔngantɛ̃ gɔ ŋa à waa ni, inɛɛu ihɛ̃ á yɔkɔ ku sobi wai bɛ? Ŋɔi à yaakoɛ a kù naaò amua kãma wa. Amma Saulu wa cokoɛ.